Neumi 2 - AI VOLA TABU

Ai valu ni Kalou e rerevaki ka daugumatua vei Ninive.

¹ SA lako cake mai ko koya na dauveiva-kasevi ki matamu: vakatawa na koro, yadrava na sala, vauca matua na tolomu, vakaukauwataki iko mo kaukauwa sara.

² Ni sa vakasuka mai ko Jiova na nodrai ukuuku na Jekope, me vaka na nodrai ukuuku na Isireli: ni ra a samaki ira sara ko ira na dausamaki vaini, ia na taba ni nodra vaini era sa vakacacataka.

³ Ai sasabai ni nona tamata qaqa sa vakadamu-damutaki, o ira na tamatai valu era sa vakaisulu e nai sulu kulakula: sa vakaiyaragi e nai sele-takelo buka na vale-vodoki e na siga sa vakarau kina ko koya, ia na moto paini ena kabei vakaidina.

⁴ Maitaudaku, sa lako vakaivalu tu na vale-vodoki, sa veiciciyaki e na salatu: sa raici vakacina, sa vaka na liva na kedra cici.

⁵ Sa nanumi ira mai ko koya na nona qaqa: era sa toqi tu e na nodra lako: sa ra kusarawa yani ki na bai ni koro, a sa vakarautaki mai na suva.

⁶ Nai sogo ni uciwai sa basuki mai, ia na vale levu sa luvu laivi yani, ia ka tu vakaukauwa ga.

⁷ Sa vakabobulataki ko Ninive, sa kauti cake yani, ia na kenai tikovaki sa ra liutaki koya ka tagi lako me vaka na ruve, ka tavia na lomaseredra.

⁸ Ia ko Ninive ka vaka na drano wai mai na gauna eliu sara; a ra dro ga: Dou tu! Dou tu! ka sega e rai kimuri.

⁹ Dou tokitaka na siliva, tokitaka na koula: ni sa sega ni oti rawa nai yau e bini tu, sa levu sara nai yaya domoni kecega.

¹⁰ Sa lala, sa lala didi, sa lala didi sara: ia na yalodra sa waicala, a sa dui veiyaviti na durudra, sa yaluma kece sara talega na tolodra, ia na matadra kecega sa ceacea mai.

¹¹ Sa evei li na nodrai tikotiko na laioni, kei na nodrai kanakana na luve ni laioni, na yasana ka tiko lako kina na laioni, na laioni alewa, na luve ni laioni, ka sega o dua e vakarerea?

¹² Na laioni, ka daudresulaka na kedra na luvena, ka cova na kedra na nona laioni alewa, ka vakasinaita na nodra qara e na ka sa dresulaka, kei na nodrai kotokoto e na ka e cova.

¹³ Raica, sai au na nomu meca, sa kaya ko Jiova ni lewe vuqa, ia kaʼu na vakama na nona vale-vodoki me kubou; ia na nomu luve ni laioni, ena kani ira nai seleiwau: au na muduka tani talega mai vanua na ka ko sa dresulaka, ena sega talega ni rogoci tale na domodra na nomui talaki.