NA SAME 8 - AI VOLA TABU

Nai ukuuku ni Kalou e na nona cakacaka, kei na nona loloma vei ira na tamata.

Vua na Domo-ni-meke e na Kitica. A Meke i Tevita.

¹ I JIOVA na neimami Turaga, a ka talei vakaidina nai rogo ni yacamu e vuravura kecega! o sa viritaka na nomui ukuuku ecake e lomalagi.

² Mai na gusudra na gone lalai kei na gone sa sucu tiko ko sa vakataudeitaka na vakavinavinaka, e na vukudra na nomu meca: mo sa vagalui koya kina na meca kei koya sa dauveisau-saumi.

³ Niʼu sa vakananuma na nomu lomalagi, na cakacaka ni qaqalo ni ligamu, na vula kei na kalokalo ko sa lesia;

⁴ a cava na tamata mo nanumi koya kina? kei na luve ni tamata, mo dautalevi koya kina?

⁵ O sa cakavi koya me uasivi sobu vakalailai vei ira na agilose, a sa vakaisalataka e nai ukuuku kei na vakarokoroko.

⁶ O sa lesia me lewa na cakacaka ni ligamu; o sa viritaka e na ruku ni yavana na ka kecega;

⁷ na sipi kecega kei na karavau, kei na manumanu talega ni vanua;

⁸ na manumanu ni lomalagi, kei na ika ni waitui, kei na ka kecega sa lako voli e na sala e loma ni wasa liwa.

⁹ I Jiova na neimami Turaga, a ka talei vakaidina na yacamu e vuravura kecega!