NA SAME 36 - AI VOLA TABU

Era sa rarawa na tamata ca: sa vinaka ga na tamata e na vuku ni loloma ni Kalou.

Vua na Domo-ni-meke. A Meke i Tevita na tamata i Jiova.

¹ SA kaya e na vu ni yaloqu nai valavala ca ni tamata ca, ni sa sega na rere vua na Kalou vei koya.

² Ni sa daudokai koya vakai koya ga, a sa kune ni sa vakasisila na nonai valavala ca.

³ A vosa ni gusuna na lasu kei na veivakaisini: sa mudu ga ni vuku ka caka vinaka.

⁴ Sa vakananuma na ca e na nonai mocemoce; sa vakataudeitaki koya e na sala sa sega ni vinaka; sa sega ni biuta na ca.

⁵ I Jiova, sa yala ki lomalagi na nomu loloma; kei na nomu dina ki na o.

⁶ Sa vaka na ulu-ni-vanua lelevu na nomu yalododonu; a Wasawasa levu na nomu lewa; i Jiova, ko sa maroroya na tamata kei na manumanu.

⁷ A ka talei vakaidina na nomu yalololoma, na Kalou! o koya o qo era vakaruru kina na luve ni tamata ki ruku ni tabamu.

⁸ Era na vakamamautaki sara e na uro ni nomu vale; ia ko na vagunuvi ira e na nomu uciwai ni marau.

⁹ Ni sa tu vei iko na wai vure ni bula: keimami na raica na rarama e na nomu rarama.

¹⁰ Me tu ga na nomu yalololoma vei ira sa kilai iko; kei na nomu yalododonu vei ira era sa yalododonu.

¹¹ Me kakua ni lako vakaca mai vei au na yava ni qaciqacia, me kakua talega ni vakasesei au na liga ni tamata ca.

¹² Era sa bale kike na daucakacaka ca; era sa vakabalei sobu, a ra na sega ni tu cake rawa.