NA SAME 35 - AI VOLA TABU

Sa masulaki koya ko Tevita, ni sa levu na nona meca.

A Meke i Tevita.

¹ I JIOVA, mo veileti kei ira era sa veileti kei au; veivala kei ira era sa veivala kei au.

² Taura nai sasabai kei nai vakaruru, ka tu cake me vukei au.

³ Ucuna na moto talega, ka vakalatia na nodra sala era sa vakacacani au; kaya mai ki na yaloqu, Oi au na nomui Vakabula.

⁴ Me ra vakidroataki ka vakamaduataki era sa vakasaqara na yaloqu; me ra saumaki tani ka vakataqayataki era bosea na ka meʼu ca kina.

⁵ Me ra vaka na qa-ni-sila sa cagina, me vakasavi ira talega na agilose i Jiova.

⁶ Me butobuto ka tidara na nodra sala, me vakasavi ira talega na agilose i Jiova.

⁷ Ni sa sega na vuna ni ra vunia na nodra lawa e nai keli me rawai au; era kelia meʼu mate wale kina.

⁸ Me yaco vakidacala vua na rusa; ia me rawai koya ga na nona lawa sa vunia; me lutu ga ko koya ki na veivakarusai dina ko ya.

⁹ Ia na yaloqu, ena marautaki Jiova; ena reki ga ni sa vakabulai au ko koya.

¹⁰ Ena kaya talega na suiqu kecega, O cei sa vakataki iko, Jiova, ni ko sa vakabulai koya sa dravudravua mai vua sa qaqa vua, io, na dravudravua kei na luveniyali mai vua sa vakacacani koya?

¹¹ Era sa tu cake mai na dauveibeitaki vakailasu; era sa beitaka vei au na ka kaʼu sa sega ni kila.

¹² Era sa kitaka vei au na ka ca mei sau ni ka vinaka, a sa ca kina na yaloqu.

¹³ Ia koi au, ni sa tauvi mate ko ira, kaʼu sa vakaisulu e nai sulu taqarotu: kaʼu sa vakamalumalumutaki au e na lolo; a sa suka mai ki na lomaserequ na noqu masu.

¹⁴ Au ai valavala vua me vaka vua na wekaqu se na taciqu; kaʼu a lako roko niʼu sa bibi, me vaka e dua sa tagicaka na tinada.

¹⁵ Ia ko ira, niʼu sa gera era sa reki, ka soqoni vata; io, ko ira na lokiloki era sa soqoni vata vakaca vei au, kaʼu a tawa kila ga; era sa dresulaki au ka tawa cegu:

¹⁶ o ira vata kei na dauveivakasewasewani, era sa vakasequruquru vei au e na batidra.

¹⁷ I Jiova, e vica vata na siga ko na vakaraica walega? Vakabula na yaloqu mai na nodra veivakarusai, na yaloqu sa duaduaga maivei ira na luve ni laioni.

¹⁸ Au na vakamolimoli vei iko e nai soqosoqo levu; kaʼu na vakavinavinaka vei iko e na liwadra na lewe vuqa.

¹⁹ Me ra kakua ni reki e na vukuqu ko ira na noqu meca daulasu; me ra kakua talega ni katariva ko ira era cati au walega.

²⁰ Ni ra sa sega ni vosaveivakacegui; ia kivei ira era tiko vinaka e na vanua, era veinanuyaka na vosa dauveivakaisini;

²¹ a ra sa dalaga vakalevu e na gusudra vei au, a ra sa kaya, Ue, ue, sa kunea ko na matada!

²² O sa kunea talega, Jiova, kakua ni ko galu tiko; Turaga, kakua ni yawa vei au.

²³ Mo yavala mai, ka yadra me lewai au, noqu Kalou kei na noqu Turaga, mo totaki au mai.

²⁴ Mo lewai au, Jiova na noqu Kalou, me vaka na nomu yalododonu; ia mo kakua ni laivi ira me ra rekitaki au.

²⁵ Me ra kakua ni kaya e lomadra, Ue, sa yalo i keitou o qo! me ra kakua ni kaya, Keitou sa tilomi koya sara!

²⁶ Me ra madua ka kidroa vata era sa rekitaka na noqu rarawa; me ra vakaisulu e na madua kei na veivakasewasewani era sa vakalevutaki ira vei au.

²⁷ Me ra kaila e na marau, ka reki, era sa domona meʼu vakadonui; io, me ra kaya tikoga, Me vakarokorokotaki ko Jiova, o koya sa vinakata me sautu na nona tamata.

²⁸ Ia na yamequ ena cavuta na nomu lewa dodonu kei na nomu vakavinavinaka e na siga kece ka bogi.