NA SAME 34 - AI VOLA TABU

Ai vakaro vei ira na tamata me ra vakavinavinaka vua na Kalou, ka vakararavi vua, ka rerevaki koya ni ra na kalougata kina.

A Meke i Tevita, ni sa dua tani mai na nonai valavala e na mata i Apimeleki: o koya ka vakatalai koya tani, a sa lako.

¹ AU na vakavinavinaka vei Jiova e na gauna kecega; ena tiko ga e na gusuqu na vakamolimoli vua.

² Ena marautaki Jiova na yaloqu; ena rogoca ko ira na yalomalumalumu, ka reki kina.

³ Tou mai vakacaucautaka na yaca i Jiova, ia me da doka vata na yacana.

⁴ Au a vakasaqarai Jiova, a sa rogoci au, a sa vakabulai au mai na noqu rere kecega.

⁵ Era sa ta cake vua, a ra sa vakararamataki; a sa sega ni madua na matadra.

⁶ Sa tagi na tamata dravudravua o qo, a sa vakarorogo ko Jiova, ka vakabulai koya mai na nona rarawa kecega.

⁷ Na agilose i Jiova, sa tiko vakavolivoliti ira era sa rerevaki koya, a sa vakabulai ira.

⁸ Dou tovolea ka raica ni sa yalovinaka ko Jiova; sa kalougata na tamata sa vakararavi vua.

⁹ Dou rerevaki Jiova, koi kemudou na nona tamata yalosavasava: ni sa sega na ka me yali vei ira era sa rerevaki koya.

¹⁰ Era sa dravudravua na luve ni laioni, ka viakana; ia ena sega na ka vinaka me yali vei ira era sa vakasaqarai Jiova.

¹¹ Dou lako mai, vakarorogo mai vei au, na gone; kaʼu na vakavulici kemudou me rerevaki Jiova.

¹² O cei na tamata sa vinakata na bula, ka sa via raica na veisiga vinaka?

¹³ Tarova na yamemu mai na ca, kei na tebenigusumu me kakua ni vosataka na ka lasu.

¹⁴ Lesu tani mai na ca, ka kitaka na ka vinaka; vakasaqara na veivinakati, ka muria sara.

¹⁵ Sa wanonovi ira na tamata yalododonu na mata i Jiova, a sa qara tu na daligana ki na nodra masu.

¹⁶ Sa dua tani na mata i Jiova vei ira sai valavala ca, me muduka tani e vuravura na kedrai nanumi.

¹⁷ Era sa tagi na yalododonu, a sa rogoca ko Jiova, a sa vakabulai ira mai na nodra rarawa kecega.

¹⁸ Sa voleka ko Jiova vei ira e sa ramusu na yalodra; a sa vakabulai ira sa dasila na lomadra.

¹⁹ Sa vuqa na ka sa rarawa kina na yalododonu; a sa vakabulai koya ko Jiova mai na ka kecega.

²⁰ Sa maroroya kecega na suina; sa sega e dua sa musu-laki.

²¹ Ena vakamatei ira na tamata ca na ka ca: era na cala ko ira sa cati koya na yalododonu.

²² Sa vakabula na yalodra na nona tamata ko Jiova: ia ena sega ni cala e dua vei ira sa vakararavi vua.