NA SAME 31 - AI VOLA TABU

A reki kei na masu ni tamata lotu dina.

Vua na Domo-ni-meke. A Meke i Tevita.

¹ I JIOVA, kaʼu sa vakararavi vei iko; kakua ni laivi au meʼu madua: vakabulai au e na nomu yalododonu.

² Vakala na daligamu vei au; mo vakabulai au kusarawa: mo noqu Uluvatu kaukauwa, na noqu vale ni tauba meʼu vakabulai kina.

³ Ni ko sa noqu Uluvatu kei na noqu tauba; ia mo tuberi au, ka liutaki au, e na vuku ni yacamu.

⁴ Kaliraki au mai na lawa era sa kitaka vuni vei au; ni ko sa noqu kaukauwa.

⁵ Au sa solia na yaloqu ki na ligamu; o a vakabulai au, Jiova, na Kalou daudina.

⁶ Au sa cati ira era sa nanuma na ka lasu wale; ia koi au, kaʼu sa vakararavi vei Jiova.

⁷ Au na reki ka marau e na nomu yalololoma; ni ko sa nanuma na noqu rarawa; ko a kila na yaloqu e na veivakararawataki;

⁸ ka sa sega ni sogolati au e na liga ni meca; ko sa vakatura na yavaqu e na vanua lalaga.

⁹ Lomani au, Jiova, niʼu sa rarawa: sa rusa na mataqu e na tagi, io, na yaloqu kei na ketequ.

¹⁰ Ni sa takali na noqu bula e na rarawa, kei na noqu yabaki e na vutugu; sa oti na noqu kaukauwa e na vuku ni noqu caka cala, a sa vuca na suiqu.

¹¹ Au sai rogo ca vei ira kece na noqu meca, ka vakalevu vei ira na kai noqu, a ra sa rerevaki au ko ira keitou sa veikilai: o ira era kunei au etautuba era sa dro tani vei au.

¹² Au sa guilecavi me vaka na mate sa tawa nanumi; kaʼu sa vaka na bilo sa kavoro.

¹³ Niʼu sa rogoca na nodra vosa ca na lewe vuqa; sa vakavolivoliti au na rere; ni ra sa bosei au meʼu ca, era sa bukia na noqu mate.

¹⁴ Ia kaʼu a vakararavi vei iko, Jiova; kaʼu a kaya, O iko ga na noqu Kalou.

¹⁵ Sa tu e na ligamu na noqu gauna; vakabulai au mai na ligadra na noqu meca, maivei ira talega era sa vakacacani au.

¹⁶ Me cilava na nomu tamata na matamu; vakabulai au e na vuku ni nomu loloma.

¹⁷ I Jiova, kakua ni laivi au meʼu madua; niʼu sa masu vei iko: me ra madua na tamatai valavala ca, me ra galu ga e nai bulubulu.

¹⁸ Me vagalui na tebenigusu daulasu; era sa vosalevu taka na tamata yalododonu e na viavialevu kei na veivakalialiai.

¹⁹ A ka vakaidina na nomu loloma, ko sa maroroya me nodra era sa rerevaki iko; ko sa vakarauta me nodra era vakararavi vei iko e matadra na luve ni tamata!

²⁰ O na vunitaki ira e na yasana vuni e matamu, mai na nodra vere na tamata; o na vunitaki ira tiko e na nomu vale tabu mai na veileti ni yamedra.

²¹ Me vakarokorokotaki ko Jiova: ni sa vakatakila vei au na nona loloma vakaidina e na koro kaukauwa.

²² Ia koi au kaʼu a kaya niʼu sa kidroa, Kaʼu sa muduki tani mai na matamu: ia ko sa rogoca ga na domo ni noqu masu niʼu sa tagi vei iko.

²³ Dou lomani Jiova, koi kemudou kecega na nona tamata yalosavasava: ni sa maroroi ira ko Jiova era sa lomadina, a sa cudruvi ira vakalevu era daucakacaka va-qaciqacia.

²⁴ Dou gumatua, ena qai vakaukauwataka na yalomudou ko koya, oi kemudou kecega sa vakararavi vei Jiova.