NA SAME 29 - AI VOLA TABU

Ai vakaro vei ira na turaga kei vuravura me ra cuva vei Jiova, ni sa kaukauwa ko koya, ka sa lomani ira na nona tamata.

A Meke i Tevita.

¹ DOU solia vei Jiova, koi kemudou na luve ni qaqa; dou solia vei Jiova na vakarokoroko kei na kaukauwa.

² Dou solia vei Jiova na vakarokoroko ni yacana; dou cuva vei Jiova e nai ukuuku ni yalosavasava.

³ Sa tu e na dela ni wai na domo i Jiova; sa kurukuru na Kalou vakaiukuuku; sa tu e na wai levu ko Jiova.

⁴ Sa rogo vakaukauwa na domo i Jiova; sa rogo vakaturaga na domo i Jiova.

⁵ Sa tasea na sitari na domo i Jiova; io, sa tasea na sitari ni Lipanoni ko Jiova.

⁶ Sa vaka-ridotaka ko koya me vaka ni sa luve ni karavau; ko Lipanoni, kei Sirioni, me vaka ni sa luve ni yunikoni.

⁷ A domo i Jiova sa taya mai na yameyame ni buka.

⁸ Sa kurea na veikau na domo i Jiova; sa kurea na veikau kei Katesa.

⁹ A domo i Jiova sa kitaki ira na teira me taratara, a sa covia na veikaukau; a sa vakavinavinaka na ka kecega e nona vale tabu.

¹⁰ Sa tiko e na waluvu ko Jiova; io, sa tiko ko Jiova me Tui ka tawa mudu.

¹¹ Ena solia ko Jiova na kaukauwa vei ira na nona tamata; ena vakalougatataka ko Jiova na nona tamata e na vakacegu.