NA SAME 25 - AI VOLA TABU

A masu gumatua vua na Kalou, sa ia vata kei na vakabauta.

A Meke i Tevita.

¹ KIVEI iko, Jiova, kaʼu sa laveta cake na yaloqu.

² Noqu Kalou, kaʼu sa vakararavi vei iko: kakua ni laivi au meʼu madua, me ra kakua ni marau na noqu meca e na vukuqu.

³ Ena sega talega e dua sa namaki iko me madua kina: o ira ga era talaidredre walega era na madua.

⁴ I Jiova, mo vakatakila mai vei au na nomu sala; vakavulici au e na nomui lakolako.

⁵ Tuberi au e na nomu dina, ka vakavulici au: ni sai iko na Kalou na noqui vakabula; kaʼu sa namaki iko e na veisiga kecega.

⁶ Nanuma, Jiova, na nomu yalololoma kei na nomu yalovinaka, ni sa ka mailiu sara na ka o qori.

⁷ Kakua ni nanuma na noqui valavala ca kei na noqu caka cala, niʼu a cauravou: me vaka ga na nomu loloma mo nanumi au, e na vuku ni nomu yalovinaka, i Jiova.

⁸ Sa yalovinaka ka yalododonu ko Jiova: o koya o qo ena vakavulici ira kina na tamata ca e na nona sala.

⁹ Ena tuberi ira na yalomalua e na lewa: io, ena vakavulici ira na yalomalumalumu e na nona sala.

¹⁰ A sala kecega i Jiova na loloma kei na ka dina kivei ira era sa taura matua na nona veiyalayalati kei na nonai tukutuku.

¹¹ E na vuku ni yacamu, Jiova, mo kakua ni cudruvi au e na vuku ni noqui valavala ca; ni sa ka levu.

¹² O cei na tamata sa rerevaki Jiova? ena vakavulici koya e na sala ena digitaka ko koya.

¹³ Ena tiko vakacegu na yalona; ena rawa talega na vanua na nona kawa.

¹⁴ A vosa vuni i Jiova sa tu vei ira era rerevaki koya, kei na nona veiyalayalati me vakavulici ira.

¹⁵ Sa gole tikoga vei Jiova na mataqu; ni na kaliraka na yavaqu ko koya mai na lawa.

¹⁶ Mo gole mai vei au, ka lomani au; niʼu sa luveniyali ka vakararawataki.

¹⁷ Sa levu mai na rarawa ni yaloqu: mo kauti au tani mada mai na noqu rarawa.

¹⁸ Vakaraica mai na noqu rarawa kei na noqu yaluma; ka bokoca na noqui valavala ca kecega.

¹⁹ Vakananuma na noqu meca; ni ra sa lewe vuqa; a ra sa cati au e na veicati vakaidina.

²⁰ Mo maroroya na yaloqu, ka vakabulai au; meʼu kakua kina ni madua; niʼu sa vakararavi vei iko.

²¹ Me maroroi au na yalododonu kei nai valavala dodonu; niʼu sa dinati iko tikoga.

²² Mo vakabulai ira na Isireli, Kalou, mai na nodra rarawa kecega.