NA SAME 145 - AI VOLA TABU

A Meke ni vakavinavinaka, a nei Tevita.

¹ AU na vakacaucautaki iko, noqu Kalou, na Tui; ia ena tawa mudu na noqu vakavinavinaka ki na yacamu.

² E na veisiga kecega kaʼu na vakavinavinaka vei iko; ia ena tawa mudu na noqu meketaka na yacamu.

³ Sa levu ko Jiova, a sa dodonu na dauia vua na vakavinavinaka; ia sa tawa kilai rawa na kena levu.

⁴ Ena meketaka na nomu cakacaka nai tabatamata e dua me yacova e dua, ka tukuna na nomu cakacaka kaukauwa.

⁵ Au na cavuta voli nai ukuuku ni kemui rogo vakaturaga levu, kei na nomu cakacaka veivakidacalataki.

⁶ Ia era na vosataka na kena kaukauwa na nomu cakacaka rerevaki: au na tukuna voli talega na kemu levu.

⁷ Era na daucavuta tikoga na ka me nanumi kina na nomu yalololoma levu, ka meketaka na nomu cakacaka dodonu.

⁸ Sa daulomasoli ko Jiova, ka yalololoma; sa berabera ni cudru, a sa levu na nona loloma.

⁹ Sa yalovinaka ko Jiova ki na ka kecega: a sa yacova na nona cakacaka kecega na nona yalololoma.

¹⁰ Sa vakacaucautaki iko, Jiova, na nomu cakacaka kecega; a ra na vakavinavinakataki iko na nomu tamata yalododonu.

¹¹ Era na vosataka nai ukuuku ni nomu matanitu, ka veivosakitaka na nomu kaukauwa.

¹² Me ra vakatakila vei ira na luve ni tamata na nona cakacaka kaukauwa, kei nai ukuuku vakaturaga ni nona matanitu.

¹³ A nomu matanitu sa tiko ga e na gauna vakaaduaga, a sa yacova nai tabatamata kecega na nomu lewa.

¹⁴ Sa tokoni ira kecega era sa bale ko Jiova, a sa vakadodonutaki ira kecega era sa lako roko.

¹⁵ Sa qaravi iko na matadra na ka kecega; ia ko sa solia vei ira ua kedra kakana o na gauna e dodonu.

¹⁶ O sa tevuka na ligamu, ka vakamamautaka na ka bula kecega e na ka era domona.

¹⁷ Sa dodonu ko J iova e na nonai valavala kecega, ka yalololoma e nona cakacaka kecega.

¹⁸ Sa voleka ko Jiova vei ira kecega era sa masu vua, vei ira kecega era masu vua e na yalodina.

¹⁹ Ena vakayacora ko koya na ka era domona ko ira era rerevaki koya: ena rogoca talega na nodra tagi, ka vakabulai ira.

²⁰ Sa maroroi ira kecega ora lomani koya ko Jiova: ia ena vakawabokotaki ira kecega nai valavala ca.

²¹ Ena vosataka na gusuqu na kena vinaka ko Jiova: ia me vakavinavinakataka talega na yacana tabu na tamata kecega, ka tawa mudu.