NA SAME 120 - AI VOLA TABU

Sa masu Tevita ni sa lasutaki ka vakararawataki.

A Meke ni cabecabe.

¹ E NA noqu rarawa kaʼu a tagi vei Jiova, a sa vakarorogo vei au.

² Mo vakabula na yaloqu, Jiova, mai na tebenigusu daulasu, mai na yame dauveivakaisini.

³ A cava me soli vei iko? se cava me caka vei iko, na yame lasu?

⁴ Na gasau gagata ni tamata qaqa, kei na qilaiso ni juniperi sa waqa tu.

⁵ Ule niʼu sa tiko vulagi kei ira na Meseki, niʼu sa tiko torova na veivale i Kitari!

⁶ Sa dede ni sa tiko vata na yaloqu kei koya sa cata na sautu.

⁷ Oi au, kaʼu sa sautu: ia ko ira, niʼu sa vosa, era sa ia nai valu.