NA SAME 10 - AI VOLA TABU

Na tamata yalododonu ni sa vakararawataki, sa masu vei Jiova, ka vakararavi vua.

¹ I JIOVA, o sa tu vakayawa e na vuku ni cava? o sa vunitaki iko e na veisiga ni rarawa e na vuku ni cava?

² Ni sa viavialevu na tamata ca sa vakacacani koya sa dravudravua; mo lewa me ra vauci e na vere era sa bukia.

³ Sa dokai koya na tamata ca e na vuku ni gadreva ni yalona, a sa doka nai yau, ka sa beci Jiova.

⁴ Ni sa viavialevu na matana na tamata ca, sa sega ni via vakasaqara na Kalou: sa takali na Kalou e na ka kecega sa nanuma.

⁵ A ka e dauveivakararawataki na nonai valavala e na veisiga kecega; sa yawasivita cake e na ka e sa raica na matana na nomu lelewa: ia na nona meca kece sara sa vakasiusiutaka ko koya.

⁶ Sa kaya e lomana, Kaʼu na sega sara ni vakayavalati; mai nai tabayatamata ka yacova nai tabayatamata, kaʼu na sega ni kunea na rarawa.

⁷ Sa sinai na gusuna e na ruru kei na dauveicavilaki kei na lasu; sa tu e ruku ni yamena na ca kei na veivakacacani.

⁸ Sa tiko ga e na lawa e na veikoro lalai; e na yasana vuni sa labati ira era sa tawa cala; sa vakaraici ira lo na matana me ra ca na malumalumu.

⁹ Sa lawakitaka e na yasana vuni me vaka na laioni e na nonai davodavo; sa lawakitaki ira na malumalumu me vauci ira; sa vauca na malumalumu ni sa lari koya ki na nona lawa.

¹⁰ A sa qai vakamalumalumutaki koya ka sa cuva, me bale e na nona kaukauwa na tamata sa vakararawataki.

¹¹ Sa kaya e lomana, Sa guileca na Kalou; sa vunia na matana, ena sega sara ni raica.

¹² Tu cake, Jiova; dodoka kicake na ligamu, na Kalou; kakua ni guilecavi ira sa vakararawataki.

¹³ Sa beci koya na Kalou na tamata ca e na vuku ni cava? sa kaya e lomana, O na sega ni taroga.

¹⁴ O a kunea ga; ni ko sa vakaraica na vakacaca kei na lomaca, me tara kenai sau: sa laivi koya vei iko na malumalumu; o sa dauvuki koya na luveniyali.

¹⁵ Musuka na rabana na tamata lomaca kai valavala ca: o na vakasaqara na nona ca me sa tawa kune rawa.

¹⁶ A Tui ko Jiova ka tawa mudu; sa kusa na lewe ni veimatanitu mai na nona vanua.

¹⁷ O a rogoca na nona gadreva na malumalumu, Jiova: o na vakataudeitaka na yalodra, o na vakatu daliga me rogoca:

¹⁸ me lewa na luveniyali kei koya sa vakararawataki; me kakua tale ni ia tiko na veivakasaurarataki na turaga kei vuravura.