Marika 7 - AI VOLA TABU

Sa vunauci ira na tisaipeli i Jisu ko ira na Farisi, a sa vunauci ira na Farisi ko Jisu, 1-13. A veika era ca dina kina na tamata, 14-23. Sa Vakabula e dua na gonealewa ko Jisu, 24-30. Sa vakabula e dua sa didivara, ka kaka, 31-37.

¹ SA qai soqoni vata vua ko ira na Farisi, kei na vu-ni-vola e so, era sa lako mai Jerusalemi.

² Ia ni ra sa raica na nona tisaipeli e so ni ra sa kana ni sa dukadukali na ligadra, a ya sa sega ni vuluvulu oti, era sa vakaucacataka.

³ Ia ko ira na Farisi, kei ira kecega na kai Jutia, era sa sega ni kana ni ra sa sega ni vuluvulu vinaka mada, ni ra sa vakabauta na nodrai vakavuvuli na qase.

⁴ Ia ni ra sa tale mai na veivoli, era sa vuluvulu mada, a ra sa qai kana. A sa vuqa tale na ka tani era sa taura me vakabauta, na sava na veibilo ni gunu, kei na veibilo i vakarau, kei na veibilo parasa, kei na veitiko-tiko.

⁵ Sa qai tarogi koya ko ira na Farisi, kei ira na vu-ni-vola, Era sa sega ni muria na nodrai vakavuvuli na qase ko ira na nomu tisaipeli e na vuku ni cava, ni ra sa kana ka sega ni vuluvulu mada na ligadra?

⁶ A sa vosa ko koya, ka kaya vei ira, Sa tukuni kemudou vinaka eliu ko Isaia, koi kemudou na dauveivakaisini, me vaka sa volai, O ira na tamata o qo, era sa vakarokorokotaki au e na belenigusudra, ia na yalodra sa yawa tani vei au:

⁷ a sa sega ni yaga na nodra masuti au, ni ra sa vakatavuvulitaka na vunau ni tamata mei vakavuvuli.

⁸ Ni dou sa biuta tani na vunau ni Kalou, ka vakabauta nai vakavuvuli ni tamata, na sava na veibilo i vakarau, kei na veibilo ni gunu; a sa vuqa tale na ka tani sa vakakina dou sa cakava.

⁹ A sa kaya vei ira ko koya. Sa vinaka beka mo dou biuta na vunau ni Kalou, mo dou vakabauta na nomudoui vakavuvuli.

¹⁰ Ni sa kaya ko Mosese, Vakarokoroko vei rau na tamamu kei na tinamu; ia, Ko koya sa vosavakacacataka na tamana se na tinana, me sa vakamatei.

¹¹ Ia dou sa kaya, Kevaka sa dua na tamata ena kaya vei tamana se tinana, Sa Koripani (a kenai balebale, Sa taba) na noqu ka sa yaga vei iko;

¹² dou sa qai tarova me kakua ni cakava e dua na ka me yaga vua na tamana se na tinana:

¹³ dou sa vakatawayagataka kina na vunau ni Kalou e na nomudoui vakavuvuli, a ya dou sa dauvakatavulica: a sa vuqa na ka vakaoqo dou sa kitaka.

¹⁴ Ia ni sa kacivi ira kecega mai na lewe vuqa ko koya, sa kaya vei ira, Dou rogoci au koi kemudou kecega, ka vakasama:

¹⁵ Sa sega na ka e taudaku ni tamata, ni sa curuma sa vakadukadukalitaka rawa; ia na veika sa curu yani mai vua, o qori ga sa vakadukadukalitaka na tamata.

¹⁶ Kevaka e dua na tamata sa vakadaligana me rogoca, me mani rogoca sara.

¹⁷ Ia ni sa biuti ira na lewe vuqa ko koya, ka curu ki vale, sa tarogi koya ko iratou na nona tisaipeli e na vuku ni vosa vakatautauvata.

¹⁸ A sa kaya vei iratou ko koya, Oi kemudou talega, dou sa tawa kila rawa vakaoqo, ne? Dou sa sega beka ni kila, ni ka kecega etaudaku sa curuma na tamata, sa sega ni vakadukadukalitaka rawa;

¹⁹ ni sa sega ni curu dina ki na yalona, ki ketena walega, a sa qai lako tani ki nai benubenu, a sa caka kina me savasava na kakana kecega?

²⁰ Sa kaya talega ko koya, A ka sa curu yani mai na tamata, o qori ga sa vakadukadukalitaka na tamata.

²¹ Ni sa curu yani mai loma, mai na yalodra na tamata, na nanuma ca, na dauyalewa, na daudara, na daulaba,

²² na daubutako, na daukocokoco, nai valavala ca, na dauveivakaisini, na daugarogaro, na mata ca, na vosa vakacaoa, na qaciqacia, na lialia:

²³ a ka ca kecega o qo sa curu yani mai loma, a sa vakadukadukalitaka na tamata.

²⁴ A sa ia ko koya, ka lako tani maikeri kivaka ki na veiyasana i Teiri kei Saitoni, a sa curu ki na dua na vale, a sa sega ni vinakata me dua na tamata me kila: a sa sega ni vuni rawa ko koya.

²⁵ Ni sa dua na yalewa ka curuma na luvena sa gonealewa e dua na yalo tawa-savasava, sa rogoca na kenai tukutuku, a sa lako mai ka bale ki na yavana:

²⁶ (sa yalewa mai na dua na matanitu kisau, a kai Siro-finisia;) a sa masuti koya me vakasava na tevoro mai na luvena-yalewa.

²⁷ A sa vosa vua ko Jisu, Me ra mamau mada ko ira na gone; ni sa sega ni vinaka me kau na kedra na gone, ka biuta vei ira na koli.

²⁸ A sa vosa na yalewa, ka kaya vua, E dina ya, Turaga; ia ko ira na koli e ruku ni kanakana era kania na meme ni kedra na gone.

²⁹ Sa qai kaya vua ko koya, E na vuku ni vosa o qo, mo lako yani; sa lako tani mai na luvemu-yalewa na tevoro.

³⁰ Ia ni sa yaco ki nona vale, sa kunea ni sa lako tani na tevoro, a sa davo e nai mocemoce na luvena-yalewa.

³¹ A sa lesu tale ko koya mai na veiyasana i Teiri kei Saitoni, a sa lako e loma ni yasayasa vaka-Tikapoli, ki na wai mai Kalili.

³² A sa kau mai vei koya e dua sa didivara, a sa kaka; a sa masuti ko koya me tabaka e na ligana.

³³ A sa rauti koya vakatikitiki maivei ira na lewe vuqa, a sa daramaka na nonai qaqalo ki na daliga ruarua ni tamata, a sa kasivi, ka tara na yamena;

³⁴ sa qai ta cake ki lomalagi, ka vutugu, ka kaya vua, Efaca, a kenai balebale, Mo rogo mai.

³⁵ A sa dolavi sara na daligana ruarua, a sa sere na wa ni yamena, a sa vosa vinaka.

³⁶ Sa qai vakarota vei ira ko koya, me ra kakua ni tukuna vua e dua na tamata: ia ni sa vakarota vakalevu vei ira ko koya, era sa dautukuna vakalevu sara kina;

³⁷ ka sa kidacala vakalevu sara ko ira, ka kaya, Sa cakava vinaka na ka kecega ko koya; sa daukitaki ira na didivara me ra rogo, kei ira talega na galu me ra vosa.