Marika 5 - AI VOLA TABU

Sa vakasavi ira na tevoro ko Jisu, a ra sa curuma na vuaka, 1-20. Sa vakabula na yalewa sa turidrabalavu, kei na gonealewa sa ciba, 21-43.

¹ A RATOU sa yaco ki tai kadua ni wai, ki na nodra vanua na kai Katara.

² Ia ni sa sobu mai na waqa ko koya, sa sota kaya sara mai na veibulubulu e dua na tamata, sa curumi koya e dua na yalo tawa-savasava;

³ a sa dautiko e na veibulubulu ko koya; a sa sega e dua na tamata sa vesuka rawa, sa sega ga e na sinucodo:

⁴ ni sa vauci vakavuqa e nai vesu kei na sinucodo, a sa drutilaka tani na sinucodo, a sa musulaka nai vesu: a sa sega e dua sa vakamanoataka rawa.

⁵ A sa tiko vakadua, e na bogi kei na siga, e na veiulu-ni-vanua, kei na veibulubulu, a sa dauqoqolou, ka dautava na yagona e na veivatu.

⁶ Ia ni sa raici Jisu ni sa vakayawa tu, sa cici yani ka cuva vua,

⁷ a sa kaci e na domo levu, ka kaya, A cava vei kedaru, i Jisu na Luve ni Kalou cecere sara? au vakarota vei iko e na vuku ni Kalou, mo kakua ni vakararawataki au.

⁸ Ni sa kaya oti vua ko koya, I yalo tawa-savasava, mo lako tani vua na tamata:

⁹ sa tarogi koya talega, O cei na yacamu? A sa vosa ko koya, ka kaya, A yacaqu ko Vavakoso, ni keimami sa lewe vuqa.

¹⁰ A sa masuti koya vakalevu ko koya, me kakua ni vakatalai ira tani e na vanua ko ya.

¹¹ A sa dua maikea na qele-ni-vuaka levu sa vakani, sa voleka ki na veiulu-ni-vanua.

¹² A ra sa masuti koya ko ira kecega na tevoro, ka kaya, Vakatalai keimami kivei ira na vuaka, me keimami curumi ira.

¹³ A sa vakalaivi ira sara ko Jisu. A ra sa qai lako tani na yalo tawa-savasava, ka curumi irana vuaka: a ra sa cici sara na qele e na baba ki na wai, (era sa rua beka na udolu;) a ra sa ora e na wai.

¹⁴ Ia ko ira sa vakani ira na vuaka era sa dro, ka laʼki tukuna e na koro kei na veiyasana kisau. A ra sa lako yani me raica na ka sa caka.

¹⁵ A ra sa yaco vei Jisu, ka raici koya ka curuma ko ira na tevoro, o koya ka tu vua ko nai Vavakoso, ni sa tiko, ka vakaisulutaki, ka yalomatua: a ra sa rere.

¹⁶ Ia ko ira era raica, era sa tukuna vei ira na ka sa yaco vua ka curuma ko ira na tevoro, vei ira talega na vuaka.

¹⁷ A ra sa vakatekivu me masuti koya me lako tani e nodra vanua.

¹⁸ Ia ni sa vodo ki na waqa ko koya, sa masuti koya ko koya ka curuma eliu ko ira na tevoro me mai tiko kaya.

¹⁹ A sa sega ga vei Jisu, ka sa kaya vua, Mo lako ki na nomudou, vei iratou na wekamu, ka tukuna vei iratou na levu ni veika sa cakava vei iko ko na Turaga, ni sa lomani iko.

²⁰ A sa lako ka vakatekivu me tukuna mai Tikapoli na kena levu ni veika sa cakava vua ko Jisu: a ra sa kidacala kecega.

²¹ Ia ni sa lako tale oti ko Jisu e na waqa ki tai kadua, era sa lewe vuqa sara sa soqoni vata vei koya: a sa tiko e na matasawa ko koya.

²² Ka raica, sa lako mai e dua na turaga ni vale ni lotu, o Jairo na yacana; ia ni sa raici koya, sa bale ki na yavana,

²³ a sa masuta vakalevu, ka kaya, Na luvequ-yalewa sa lailai sa voleka sara ni mate: mo lako mai mo tabaki koya e na ligamu, me vakabulai kina; ena qai bula ko koya.

²⁴ A sa lako vata kaya ko koya, a ra sa lewe vuqa sara sa muri koya, ka drigita.

²⁵ A sa dua na yalewa, sa turidrabalavu ka yabaki tinikarua,

²⁶ a sa levu na ka sa vosota vei ira na vu-ni-wai era le vuqa, a sa volitaka kina na nonai yau kecega, a sa sega ni bula, ka levu cake tiko na nona mate,

²⁷ ni sa rogo vua ko Jisu, sa lako mai ki dakuna e na maliwa ni lewe vuqa, ka tara na nonai sulu.

²⁸ Ni sa kaya ko koya, Kevaka kaʼu na tara ga na nonai sulu, au na vakabulai.

²⁹ A sa tirimudu vakasauri nai davedave ni nona dra; a sa vakarogoca e yagona ni sa bula mai na mate ca ko ya.

³⁰ A sa kila sara ko Jisu e lomana ni sa lako tani vua na kaukauwa, a sa vuki e na maliwa ni lewe vuqa, ka kaya, O cei sa tara na noqui sulu?

³¹ A sa kaya vua ko iratou na nona tisaipeli, O sa raica ni sa drigiti iko na lewe vuqa, ia ko sa taroga, O cei sa tarai au?

³² Sa qai rai vakavolivolita, me kunei koya ka cakava na ka ko ya.

³³ A sa rere na yalewa, ka sautaninini, ni sa kila na ka sa caka vua, a sa lako mai ka bale sobu e matana, ka tukuna kecega vua na kena dina.

³⁴ A sa kaya vua ko koya, Na luvequ-yalewa, sa vakabulai iko na nomu vakabauta; mo lako e na vakacegu, ka mo bula mai na nomu mate ca.

³⁵ Ni sa vosa tiko ko koya, sa lako mai e so mai na turaga ni vale ni lotu, era kaya, Sa mate na luvemu-yalewa, o sa vakaoca tale nai Vakavuvuli e na vuku ni cava?

³⁶ Ia ni sa rogoca ko Jisu na vosa era sa kaya, sa qai kaya sara vua na turaga ni vale ni lotu, Kakua ni rere, vakadinata ga.

³⁷ A sa sega ni laiva e dua me muri koya, o iratou ga ko Petero, kei Jemesi, kei Joni na taci i Jemesi

³⁸ A sa yaco ko koya ki na vale ni turaga ni vale ni lotu, a sa raica na nodra tagiyaso, era sa tagi ka qoqolou vakalevu.

³⁹ Ia ni sa curu ko koya, sa kaya vei ira, Dou sa tagiyaso ka tagi e na vuku ni cava? sa sega ni ciba na gonealewa, sa moce ga.

⁴⁰ A ra sa dredrevaki koya. Ia ni sa vakatalai ira kece ki tautuba, sa kauti rau na tama ni gonealewa kei na tinana, kei iratou sa tiko vata kaya, ka curu ki na yasana sa davo kina na gonealewa.

⁴¹ A sa taura na liga ni gonealewa ko koya, ka kaya vua, Talica kumi; a kenai balebale, Gonealewa, au sa kaya vei iko, tu cake mai.

⁴² A sa tu cake sara na gonealewa, ka lako voli; a sa tinikarua na nona yabaki. A ra sa kidacala vakalevu sara.

⁴³ A sa vakarota matua vei ira ko koya, me kakua ni kila o qori e dua na tamata: a sa kaya me soli vua na gonealewa e so na kena.