Marika 16 - AI VOLA TABU

Sa tukuna e dua na agilose vei iratou na yalewa ni sa tu cake tale mai ko Jisu, 1-8. Sa qai rairai vei iratou e so ko Jisu, 9-14. Sa qai kaya me ia na lako ki na veivanua kecega me tukuni koya, 15-20.

¹ IA ni sa oti na siga ni vakacecegu, o iratou ko Meri na kai Makitala, kei Meri na tina i Jemesi, kei Salomi, eratou sa volia na waiwai vakaisaluaki, me ratou laʼki lumuti koya.

² Ia e na mataka caca sara e nai matai ni siga ni wiki, eratou sa lako mai ki nai bulubulu ni sa qai cabe na siga.

³ A ratou sa kaya vakai iratou, O cei ena vaqiqica tani na vatu vei kedatou mai na katuba ni bulubulu?

⁴ (Ia ni ratou sa raica, eratou sa kunea ni sa vaqiqici tani na vatu:) ni sa levu sara.

⁵ Ia ni ratou sa curu ki nai bulubulu, eratou sa kunea e dua na cauravou sa tiko e na tikina i matau, sa vakaisulu e nai sulu balabalavu ka vulavula; a ratou sa rere.

⁶ A sa kaya ko koya vei iratou, Dou kakua ni rere: dou sa vakasaqarai Jisu na kai Nasareci, o koya ka lauvako ki na kauveilatai: sa tu cake tale mai ko koya: sa sega eke: raica na yasana era a vakotora kina:

⁷ ia dou lako, tukuna vei iratou na nona tisaipeli, vei Petero talega, ni sa liutaki kemudou ko koya ki Kalili; dou na raici koya kina, me vaka na nona vosa vei kemudou.

⁸ A ratou sa lako kusarawa yani, ka dro tani mai nai bulubulu; ia eratou sa sautaninini ka kidroa; eratou sa sega talega ni kaya e dua na ka vua e dua; ni ratou sa rere.

⁹ Ia ni sa tu cake tale ko koya e na mataka e nai matai ni siga ni wiki, sa rairai eliu ko koya vei Meri na kai Makitala, o koya ka vakasava tani vua ko koya na tevoro e lewe vitu.

¹⁰ Sa qai lako na yalewa o qori ka tukuna vei iratou eratou dautiko vata kaya eliu, ni ratou sa rarawa ka tagi.

¹¹ Ia ko iratou, ni ratou sa rogoca ni sa bula ko koya ka sa rairai vei koya, eratou sa sega ni vakadinata.

¹² Sa qai rairai ko koya sa dua tani na yagona ki na lewe rua vei iratou, ni rau sa lako ki na dua na yasana kisau:

¹³ a rau sa lako ka tukuna vei iratou sa vo; a ratou sa sega ni vakadinati rau.

¹⁴ Sa oti, sa rairai ko koya vei iratou na lewe tinikadua ni ratou sa tiko me kana, a sa vunauci iratou e na vuku ni nodratou tawa-vakabauta kei na nodratou lomakaukauwa, ni ratou sa sega ni vakadinati iratou eratou sa raici koya ni sa tu cake tale.

¹⁵ A sa kaya vei iratou, Dou lako yani ki vuravura kecega, ka vunautaka nai tukutuku-vinaka ki na tamata kecega.

¹⁶ 0 koya sa vakabauta ka papitaisotaki ena bula: ia ena cudruvi ga ko koya sa sega ni vakabauta.

¹⁷ Ia na veivakatakilakila o qo era na cakava ko ira sa vakabauta: Era na vakasava tani na tevoro e so e na yacaqu; era na vosataka na vosa ni veivanua tani;

¹⁸ era na tomika na gata e so; ia kevaka era gunuva na ka e gaga sara, era na sega ni ca kina; era na tabaki ira talega sa tauvi-mate e na ligadra, a ra na bula kina.

¹⁹ Ia ni sa vosa oti vei iratou na Turaga, sa kau cake ki lomalagi, ka sa tiko sobu e na liga i matau ni Kalou.

²⁰ Ia ko iratou, eratou sa lako yani, ka vunau e na veiyasana kecega, a sa cakacaka vata kei iratou na Turaga, a sa vakadinadinataka na vosa e na veivakatakilakila sa muri. Emeni.