Marika 15 - AI VOLA TABU

Sa lewai Jisu ko Pilato, a sa sereki Parapa, a sa soli Jisu vei ira na tamata, 1-15. Era sa qai vakacacana, ka vakota ki na kauveilatai, 16-41. Sa buluti Jisu ko Josefa, 42-47.

¹ IA e na mataka era sa qai bose vata ko ira na bete levu kei ira na qase kei ira na vu-ni-vola kei ira kece na mataveilewai, ka vesuki Jisu, ka kauta tani, ka solia vei Pilato.

² A sa tarogi koya ko Pilato, O sa nodra Tui na kai Jutia, se segai? A sa vosa ko koya, ka kaya vua, O sa kaya dina mai.

³ A sa vuqa na ka era sa beitaki koya kina ko ira na bete levu.

⁴ Sa qai tarogi koya tale ko Pilato, ka kaya, O sa sega ni kaya e dua na ka, ne? raica na kena vuqa ni ka era sa beitaka vei iko.

⁵ A sa sega na ka sa kaya ko Jisu; a sa kidacala kina ko Pilato.

⁶ A sa dau nonai valavala e na solevu me sereka vei ira e dua na tamata sa vesu, o koya era sa digitaka.

⁷ A sa tiko e dua, na yacana ko Parapa, sa vesuki vata kei ira e so na tamata ue era a laba ni sa ia na ue.

⁸ A ra sa kaci tiko na lewe vuqa, ka vakatekivu me vakamamasu me vaka sa dau nonai valavala me kitaka vei ira.

⁹ A sa vosa vei ira ko Pilato, ka kaya, Dou sa vinakata meʼu sereka vei kemudou na nodra Tui na kai Jutia, se segai?

¹⁰ ni sa kila ko koya ni ra a soli koya yani ko ira na bete levu ni ra sa vuvutaka.

¹¹ A ra sa vakauqeti ira na lewe vuqa ko ira na bete levu, me sereki Parapa ga vei ira ko koya.

¹² Sa qai vosa ko Pilato, ka kaya tale vei ira, A cava dou sa qai vinakata meʼu kitaka vua dou sa vakatoka me nodra Tui na kai Jutia?

¹³ A ra sa qoqolou tale, Vakota ki na kauveilatai.

¹⁴ Sa qai kaya vei ira ko Pilato, A cava na ka ca sa mai cakava ko koya? A ra sa qai qoqolou vakalevu cake, Vakota ki na kauveilatai.

¹⁵ Ia ni sa vinakata ko Pilato me vakavinavinakataki ira na lewe vuqa, sa sereki Parapa vei ira, a sa soli Jisu yani, ni sa vakanakuitataka mada eliu, me vakoti ki na kauveilatai.

¹⁶ A ra sa kauta tani ko ira na tamatai valu ki na yasana sa vale ni turaga, ka vakasoqoni ira vata na matai valu taucoko.

¹⁷ A ra sa vakasulumi koya e na ka-damudamu, a ra sa talia e dua nai sala e na veiwa-vakavotona, ka salagi koya kina.

¹⁸ A ra sa vakatekivu me kida vaka, Sa loloma, na nodra Tui na kai Jutia!

¹⁹ A ra sa yavita na uluna e na dua na gasau, a ra sa kasivita, a ra sa tekiduru ka masu vua.

²⁰ Ia ni ra sa vakalialia oti, era sa luvata vua na ka-damudamu, ka vakasuluma e na nonai sulu dina, ka kauta yani me ra vakota ki na kauveilatai.

²¹ A sa dua na kai Kirini, o Saimoni, a tamadrau ko Alekisadro kei Rufo, o koya sa lako tu, ni sa lako mai na yasana kisau, a ra sa vakasaurarataki koya me colata na nona kauveilatai.

²² A ra sa kauti koya ki na dua na yasana, ko Kolikoca, (a kenai balebale, A yasana ni qavokavoka.)

²³ A ra sa solia vua na waini sa veiwaki vata kei na mura me gunuva; a sa sega ni taura ko koya.

²⁴ Ia ni ra vakota oti ki na kauveilatai, era sa qai vota na nona veisulu, e na vakawiri madigi, me ra dui kila nodrai votavota.

²⁵ Ia ka sa kenai katolu ni tiki-ni-siga, ni ra sa vakota ki na kauveilatai.

²⁶ A sa vola ecake na ka sa beitaki vua: A NODRA TUI NA KAI JUTIA.

²⁷ A ra sa vakota vata kaya ki na kauveilatai e lewe rua na daubutako; e dua ena ligana i matau, ka dua e nai mawi.

²⁸ A sa vakayacori kina nai Vola, sa kaya, Sa wili vata kei ira na tamatai valavala ca ko koya.

²⁹ Ia ko ira sa lako voli, era sa vosavakacacataki koya, ni ra sa kuretaka na uludra, ka kaya, Drasa, o iko sa basuka na vale ni soro, ka tara e na bogi e tolu,

³⁰ vakabulai iko mada ga, ka kevu sobu mai na kauveilatai.

³¹ A sa vaka talega kina ko ira na bete levu, era sa vakalialia vakai ira, vata kei ira na vu-ni-vola, ka kaya, O koya sa dauvakabulai ira na tani; sa sega ni vakabulai koya rawa:

³² me kevu sobu edaidai mai na kauveilatai na Karisito na nodra Tui na Isireli, me keimami raica ka vakabauta. Oi rau talega eratou a vakoti vata kaya ki na kauveilatai, erau sa vakalialiai koya.

³³ Ia ni sa yaco nai kaono ni tiki-ni-siga, sa butobuto na vanua taucoko, ka yacova nai kaciwa ni tiki-ni-siga.

³⁴ Ia e nai kaciwa ni tiki-ni-siga sa kaci ko Jisu e na domo levu, ka kaya, Iloi, Iloi, lama sapakicani? (a kenai balebale, Noqu Kalou, noqu Kalou, o sa biuti au e na vuku ni cava?)

³⁵ Ia ka so vei ira sa tu voleka, ni ra sa rogoca, era sa kaya, Raica, sa kacivi Ilija ko koya.

³⁶ A sa cici e dua, ka tonisua e dua na vutovuto e na wai wiwi, ka vivia ki na dua na gasau, a sa vagunuvi koya, ka kaya, Biuta mada; me da raica se na lako mai ko Ilija me kevutaki koya sobu mai, se segai.

³⁷ Ia ko Jisu, ni sa kaci e na domo levu, sa qai ciba yani.

³⁸ A sa sei rua nai lati ni vale ni soro mai na tikina ecake ka kauta ki ra.

³⁹ Ia ni sa raica na turaga ni valu, ko koya sa tu voleka ka donui koya, ni sa kaci vakaoqo ko koya, ka qai ciba yani, sa kaya, E dina ga ni sa Luve ni Kalou na tamata o qo.

⁴⁰ E so talega na yalewa era sa vakaraica vakayawa; e dua vei ira ko Meri na kai Makitala, kei Meri na tinadrau ko Jemesi sa gone kei Josese, ko Salomi talega;

⁴¹ (eratou a daumuria, ka dauqarava, ni sa tiko mai Kalili ko koya;) kei ira talega na yalewa e lewe vuqa era a lako vata kaya ki Jerusalemi.

⁴² Ia ni sa yakavi mai, ni sa siga vakarau, na siga sa tarava na siga ni vakacecegu,

⁴³ sa lako mai ko Josefa, na kai Arimacia, a matanivanua, a sa dua vei ira na mataveilewai, a sa waraka me yaco na matanitu ni Kalou, a sa lako doudou vei Pilato, ka kerea na yago i Jisu.

⁴⁴ A sa kidacala ko Pilato ni sa tei mate oti ko koya; a sa kaciva na turaga ni valu, ka taroga se mate tu vakadede ko koya, se segai?

⁴⁵ Ia ni sa kila vua na turaga ni valu, sa solia na yagona vei Josefa:

⁴⁶ a sa volia ko koya e dua na gatu matailalai, a sa kevutaki koya sobu, ka solega e na gatu matailalai, a sa vakotora e na dua nai bulubulu sa ta e na vatu; a sa vaqiqica e dua na vatu ki na katuba ni bulubulu.

⁴⁷ A rau sa raica na yasana sa vakotori kina ko koya, koi rau ko Meri na kai Makitala kei Meri na tina i Josese.