Maika 6 - AI VOLA TABU

A Kalou, ni sa lewai ira na kai Jutia me cala, sa tukuna vei ira na cakacaka sa vinaka vua, 1-8. Sa vunauci ira e na vuku ni nodrai valavala tawa dodonu, 9-12, kei na nodra dauqarava na kalou lasu, 13-16.

¹ DOU rogoca mada na ka sa kaya ko Jiova, Tu cake, mo ia na veilewai e matadra na veiulu-ni-vanua, me ra rogoca talega na domomu na veiulu-ni-koro.

² Dou rogoca, na veiulu-ni-vanua, na ka e veiletitaka ko Jiova, oi kemudou talega, na yavu kaukauwa kei vuravura: ni sa dua na ka e veiletitaka ko Jiova kei ira na nona tamata, io, kei ira na Isireli ena ia na veilewai ko koya.

³ Na noqu tamata, a cava kaʼu sa cakava vei iko? ia e na cava kaʼu sa vakaocataki iko kina? tukuni au mai.

⁴ Niʼu a kauti iko cake mai na vanua ko Ijipita, mai na vale ni bobula talega kaʼu a vakabulai iko; ka talai iratou ko Mosese, kei Eroni, kei Miriami, me liutaki iko.

⁵ Na noqu tamata, dou vakananuma mada na ka sa kerea ko Palaki na tui Moapi, kei na ka sa kaya vua ko Palami na luve i Piori; kei na ka ko ya mai Sitimi ka yaco sara ki Kilikali; mo dou kila kina nai valavala dodonu i Jiova.

⁶ Ai soro cava meʼu torovi Jiova kaya? ka cuva kaya e na mata i koya na Kalou cecere? meʼu torovi koya e nai soro kama, e na karavau e so e yabaki dua?

⁷ Ena vinakata beka ko Jiova na sipi tagane e vakaudolu, na uciwai waiwai e vakaoba? meʼu cabora beka na noqu ulumatua mei soro ni noqu talaidredre, na vua ni yagoqu mei bulubulu ni valavala ca ni yaloqu?

⁸ Sa vakatakila oti vei iko, tamata, na ka e vinaka: ia na cava sa taroga ko Jiova maivei iko, mo caka dodonu ga, ka vinakata me yalololoma, mo yalomalumalumu talega mo drau lako vata kaya na nomu Kalou?

⁹ A domo i Jiova sa kaci ki na koro, ia ko koya sa vuku ena vakananuma na yacamu: dou rogoca na kuita, kei koya sa lesia.

¹⁰ Sa tu li e nona vale na tamata ca, nai yau ni ca, kei nai vakarau lailai ca e vakasisila?

¹¹ Meʼu sa tamata dodonu li ni sa tu vei au nai vakarau ni bibi e tawa dodonu, kei na taga vatu e lasu?

¹² O ira na kena tamata vutuniyau era sa vutu ni valavala kaukauwa, o ira talega na lewena era sa vosa lasu, io, na yamedra talega e gusudra sa dauveivakaisini.

¹³ Io koi au, kaʼu na yaviti iko vakararawa sara, ka vakalalataki iko e na vuku ni nomui valavala ca.

¹⁴ O iko, ko na kana; ka sega ni mamau; ni na bibi na lomamu; o na toki, ka sega ni drotaka rawa; ia na ka ko sa drotaka kaʼu na solia ki nai seleiwau.

¹⁵ O iko, ko na kaburaka na sila, ka sega ni tamusuka; o iko, ko na butuka na olive, ka sega ni lumuti iko e na kena waiwai; na vua ni vaini talega ni waini vou, ia ko na sega ni gunuva na kena waini.

¹⁶ Ni sa dauvakabauti na ka sa lesia ko Omiri, kei na cakacaka kecega ni mataqali i Eapi, dou sa muria talega na nodrai vakavuvuli; meʼu cakavi iko kina mo lala sara, kei ira na lewemu me ka e vakasiusiu taki: ia na kedrai rogorogo ca na noqu tamata dou na colata.