Luke 24 - AI VOLA TABU

Sa tukuna na agilose e rua vei ira na yalewa ni sa tu cake tale mai ko Jisu, 1-12. Sa rairai ko Jisu vei rau na tamata e lewe rua, ka emuri vei ira kecega, ka vakavulici ira, 13-49 Sa qai lako cake ki lomalagi ni ra sa raica tiko, 50-53.

¹ IA e nai matai ni siga ni wiki, e na mataka caca sara, eratou sa lako mai ki nai bulubulu, a ratou sa kauta mai na veika boivinaka eratou a vakarautaka, kei iratou tale e so vata kei iratou.

² A ratou sa kunea ni sa vaqiqici tani na vatu mai nai bulubulu.

³ Ia ni ratou sa curu, eratou sa sega ni kunea na yago ni Turaga ko Jisu.

⁴ A sa yaco, ni ratou sa kidacala vakalevu kina, raica, e lewe rua na tamata sa tu voleka vei iratou e nai sulu lumilumisa:

⁵ ia ni ratou sa rere, ka cuva sobu na matadratou ki na qele, erau sa kaya vei iratou, Dou sa vakasaqarai koya sa bula e na kedra maliwa na mate e na vuku ni cava?

⁶ Sa sega eke ko koya, a sa tu cake tale: nanuma na nona vosa vei kemudou ni sa tiko kei kemudou mai Kalili,

⁷ ni sa kaya, Ena soli yani na Luve ni tamata ki na ligadra na tamata ca, ka na vakoti ki na kauveilatai, ka tu cake tale e nai katolu ni siga.

⁸ A ratou sa qai nanuma na nona vosa.

⁹ A ratou sa qai suka tani e nai bulubulu, a ratou sa tukuna na ka kecega o qo vei iratou na tinikadua, vei ira kece talega sa vo.

¹⁰ O iratou eratou sa tukuna na veika o qo vei iratou nai apositolo, o Meri na kai Makitala, kei Joana, kei Meri na tina i Jemesi, vata kei ira na yalewa tani.

¹¹ A sa vaka nai tukutuku walega vei ira na nodratou vosa, a ra sa sega ni vakadinata.

¹² Sa qai ia ko Petero, ka cici ki nai bulubulu; ia ni sa cuva sobu, sa raica na gatu wale ni sa no, a sa qai lako tani, a sa kidacala c lomana e na vuku ni ka sa yaco.

¹³ Ka raica, sa lewe rua vei ira sa lako e na siga dina ko ya ki na dua na koro lailai ko Emeo na yacana, e vitu na maili ka savu na kena vakayawa ki Jerusalemi.

¹⁴ A rau sa veivosakitaka na ka kecega o qo sa qai yaco.

¹⁵ A sa yaco, ni rau sa veivosaki ka veitarogi, sa toro voleka ko Jisu, ka lako vata kei rau.

¹⁶ A sa vakamatawataki na matadrau me rau kakua ni kilai koya.

¹⁷ A sa kaya vei rau ko koya, Ai tukutuku cava o qo drau sa talanoataka, ni drau sa lako voli, ka vakaveveku mata kina?

¹⁸ A sa dua vei rau, na yacana ko Kilopa, sa vosa ka kaya vua, O iko duadua beka na vulagi mai Jerusalemi, ka sega kina ni kila na veika sa qai yaco kina e na gauna o qo?

¹⁹ A sa tarogi rau ko koya, A ka cava? A rau sa kaya vua, A ka kei Jisu na kai Nasareci, a parofita sa levu e na cakacaka kei na vosa e na mata ni Kalou ka e matadra kecega na tamata:

²⁰ a sa soli koya ko ira na bete levu kei ira na neimami turaga me lewai me mate, a ra sa vakota ki na kauveilatai.

²¹ Ia keimami a vakasama ni sai koya ga o qo ena vakabulai ira na Isireli: ia o qori talega, sa kenai katolu ni siga edaidai ni sa caka oti na veika o qo.

²² Ia ka so talega na neimami yalewa, eratou sa vakidacalataki keimami, ni ratou sa lako ki nai bulubulu e na mataka caca;

²³ ia ni ratou sa sega ni kunea na yagona, eratou sa lako mai, ka tukuna, ni ratou a raica e so na agilose sa sikavotu vei iratou, ka kaya ni sa bula ko koya.

²⁴ O iratou talega e so eratou sa dautiko vata kei keimami, eratou sa lako ki nai bulubulu, a ratou sa kunea ni sa vaka na ka eratou a kaya na yalewa: ia ka ratou sa sega ni kunei koya.

²⁵ A sa kaya vei rau ko koya, Drau sa sesewa, ka tawa via vakabauta na ka kecega sa tukuna ko ira na parofita:

²⁶ e sega beka ni kilikili kei koya na Karisito me vosota mada na veika o qo, me qai curu ki na nonai ukuuku?

²⁷ A sa vakatekivu maivei Mosese ka yacovi ira kecega na parofita, a sa tusanaka vei rau mai nai Vola kecega na vosa ka tukuni kina ko koya.

²⁸ A ratou sa torova na koro lailai erau sa lako kina: a sa lako ko koya me vaka sa via lako vaka kiliu.

²⁹ A rau sa cikeva matua, ka kaya, Tiko ga mai vei keirau, ni sa qai yakavi, a sa kala na siga. A sa curu ko koya me tiko vei rau.

³⁰ A sa yaco, ni ratou sa tiko kaya me kana, sa taura na madrai ko koya, ka vatonaka, ka dovia, ka solia vei rau.

³¹ A sa qai lau na matadrau, a rau sa kilai koya; a sa takali ko koya mai na matadrau.

³² A rau sa veikayaka vakai rau, Sa sega li ni kama eloma na yalodaru, ni datou sa veivosaki kaya e na gau-ni-sala, ni sa vakamacalataka talega vei kedaru nai Vola ko koya?

³³ A rau sa tu cake e na tiki-ni yakavi ga ko ya, ka lesu tale ki Jerusalemi, a rau sa kunei iratou na lewe tinikadua ni ratou sa soqoni vata mai, kei ira era dautiko vata kei iratou;

³⁴ a ra sa kaya, Sa dina ni sa tu cake tale na Turaga, a sa rairai vei Saimoni.

³⁵ A rau sa tukuna talega na veika ni gau-ni-sala, ni rau sa kilai koya talega ni sa dovia tiko na madrai.

³⁶ Ia ni ra sa vosa tiko vakaoqo, sa tu sara e na kedra maliwa ko Jisu, ka kaya vei ira. Dou vakacegu ga.

³⁷ A ra sa kidroa ka rere sara, a ra sa vakasama ni ra sa raica e dua na yalo.

³⁸ A sa kaya vei ira ko koya, Dou sa kidroa e na vuku ni cava? a sa tubu na vakanananu e na lomamudou e na vuku ni cava?

³⁹ raica na ligaqu kei na yavaqu, ni sai au dina ga: tarai au, ka raica; ni sa sega ni vakalewena se vaka-suina na yalo, me vaka dou sa raica ni sa tu vei au.

⁴⁰ Ia ni sa vosa oti vakaoqo ko koya, sa vakaraitaka vei ira na ligana kei na yavana.

⁴¹ Ia ni ra sa sega ni vakabauta e na vuku ni ra sa reki, ka kidacala, sa tarogi ira ko koya, Sa dua na kakana sa tu eke vei kemudou, se segai?

⁴² A ra sa solia vua e dua na tiki ni ika tavu, ka so mai na qa-ni-oni sa tawa.

⁴³ A sa taura ko koya, ka kana e matadra.

⁴⁴ A sa kaya vei ira ko koya, O qo na vosa kaʼu a daukaya vei kemudou niʼu a tiko kei kemudou, ni na yaco kecega na vosa sa tukuni au, sa volai e na vunau i Mosese, kei na nodrai vola na parofita, kei na Veisere.

⁴⁵ Sa qai basuka na lomadra ko koya, me ra kila rawa nai Vola,

⁴⁶ a sa kaya vei ira, Sa volai vakaoqo, a sa kilikili kei koya na Karisito me vosota vakakina, me tu cake talega mai na mate e nai katolu ni siga:

⁴⁷ me vunautaki talega na veivutuni, kei na bokoci ni valavala ca, e na vuku ni yacana, vei ira na lewe ni veivanua kecega, me vakatekivu e Jerusalemi.

⁴⁸ Ia koi kemudou, dou na dautukutuku e na veika o qo.

⁴⁹ Ia ka raica, au sa tala vei kemudou na ka sa yalata ko Tamaqu: ia dou tiko ga e na koro ko Jerusalemi, me yaco mada vei kemudou na kaukauwa maicake.

⁵⁰ A sa kauti ira ki nai bili ki Pecania, a sa qai laveta cake na ligana, ka vosavakalougatataki ira.

⁵¹ A sa yaco, ni sa vosavakalougatataki ira tiko, sa kau tani vei ira, a sa kau cake ki lomalagi.

⁵² A ra sa soro vua, ka lesu tale ki Jerusalemi, ka reki vakalevu:

⁵³ a ra sa dautiko e na vale ni soro, a ra sa vakarokorokotaka tiko na Kalou, ka vakavinavinaka vua. Emeni.