Jope 8 - AI VOLA TABU

Sa kaya ko Pilitati ni sa dodonu na Kalou e na ka e cakava, 1-7. Sa vaka ni sa daucudruvi eliu na dauveivakaisini, 8-19. Sa kaya talega ni sa ka dodonu sa yaco vei Jope, 20-22.

¹ SA qai vosa ko Pilitati na luve i Sua, ka kaya,

² E bogi vica vata mo cavuta kina na ka vakaoqo? e bogi vica vata me cagi kaukauwa kina na vosa ni gusumu?

³ Sa ia beka na Kalou na lewa tawa dodonu? se vakacala beka na ka dodonu ko Koya sa Kaukauwa?

⁴ Kevaka era sai valavala ca vua ko iratou na luvemu, a sa vakatalai ira tani ko koya e na vuku ni nodra talaidredre;

⁵ kevaka ko sa vakasaqara tau-donu na Kalou, ka ia na nomu vakamamasu vei Koya sa Kaukauwa;

⁶ kevaka ko sa savasava ka dodonu; ena sa qai yadra dina sara mai e na vukumu ko koya, ena vakasaututaka talega na nomui tikotiko e dodonu.

⁷ Kevaka sa ka lailai na nomui vakatekivu, ena ka levu sara ga na nomui otioti.

⁸ Ia mo taroga mada nai tabatamata makawa, ka gumatua ni tarogi ira na nodra qase:

⁹ (ni sa tubu wale e na noa ko keda, ka sega ni kila e dua na ka, ni sa yaloyalo wale na noda siga e vuravura:)

¹⁰ era na sega beka ni vakavulici iko, ka tukuna vei iko, ka cavuta na vosa mai na lomadra?

¹¹ Ena tubu li na vico ni sa sega na oruoru? ena tubu na taria ni sa sega na wai?

¹² Ni sa drokadroka tu, ka sega ni tamusuki, sa malai rawarawa ga o qori, ka dredre na co kecega.

¹³ Sa vakakina na nodra sala kecega era sa guilecava na Kalou: ia ena tawa yaco na ka e namaka na dauveivakaisini:

¹⁴ ena muduki laivi na ka sa namaka ko koya; ena viritalawalawa ga na ka e vakararavi kina.

¹⁵ Ena ravita na nona vale, ia ena sega ni tu: ena taura matua, ia ena sega ni dei.

¹⁶ Sa drokadroka tu ko koya e na mata ni siga, a sa tubu na tabana e nona were.

¹⁷ Sa vere-verea tu na wakana e nai binibini; sa kunea na tikina vatuvatu.

¹⁸ Kevaka ena cavu laivi ga ko koya mai na nona yasana, ena qai cakitaki koya, ka vaka, Au a sega ni kunei iko.

¹⁹ Raica, sa vaka ga o qo na nona reki, ia ena tubu e so tani tale mai na qele ko ya.

²⁰ Raica, ena sega ni biuta tani na tamata yalododonu na Kalou, ena sega talega ni vukei ira nai valavala ca:

²¹ ena vakasinaita mada na gusumu e na dredre, kei na tebenigusumu e na rereki:

²² o ira era cati iko era na vakaisulutaki e na madua; ena yali sara talega na nonai tikotiko nai valavala ca.