Jope 6 - AI VOLA TABU

Sa tukuna ko Jope ni sa sega ni tagi wale, 1-7. Sa via mate me cegu, 8-13. Sa vunauci iratou na wekana e na vuku ni nodratou tawa loloma, 14-30.

¹ A SA vosa ko Jope, ka kaya,

² Me vakatovolei dina mada na kena bibi ni noqu rarawa, ia me vakatauvatani e nai vakarau ni bibi kei na ka ca sa yacovi au!

³ Ni na sa qai bibi vakalevu ka vakalailai na nuku ni wasawasa: o koya o qo kaʼu sa dredre kina ni vosa.

⁴ Ni sa lau ki lomaqu na gasau i Koya sa Kaukauwa; sa gunuva na yaloqu na kena gaga: sa tuvai valu kivei au na ka rerevaki mai vua na Kalou.

⁵ Sa tagi beka na asa kila ni sa tu na kena co? se via tagi na karavau ni sa kana tiko?

⁶ sa kani rawa beka na ka velavela ni sa sega ni vakamasima? se kamikamica na weli ni yaloka?

⁷ A ka sa bese ni tara na yaloqu, sa qai yaco me vaka na kequ kakana ni tagi.

⁸ Me vakayacori mada na noqu kerekere; ka solia mada na Kalou na ka kaʼu sa domona!

⁹ Ia me vinaka vua na Kalou me vakarusai au; me sereka na ligana, me muduki au tani!

¹⁰ Au na qai cegu rawa; io, au na qai vakaukauwataki au e na rarawa: me kakua ni vosota ko koya; niʼu a sega ni vunia na vosa i Koya sa Yalosavasava.

¹¹ A cava na noqu kaukauwa, meʼu vakararavi kina? se cava na noqui otioti, meʼu via vakabalavutaka kina na noqu bula?

¹² A noqu kaukauwa na kaukauwa beka ni vatu? se parasa beka na lewequ?

¹³ Sa sega vei au meʼu vukei au, a sa se tani vei au na vuku.

¹⁴ O koya sa tauvi mate e dodonu me loloma kina na wekana; ia ka sa biuta ga na rerevaki Koya sa Kaukauwa.

¹⁵ Eratou sai valavala vakailasu na wekaqu mo vaka na uciwai, eratou sa vaka na soniwai e dautakali yani;

¹⁶ a ya sa vuvu e na vuku ni wai sa cevati, sa vuni kina talega na uca-vulavula:

¹⁷ ni sa katakata mai o qori, sa yali: ni sa cilavi siga, sa takali sara mai na kena yasana.

¹⁸ Sa lesu tani na sala ni kenai davedave; sa yaco ga me segai, me yali sara:

¹⁹ era sa vakasaqara ko ira nai vavakoso lewe ni sala mai Tema; era sa waraka ko ira na lewe ni sala mai Sepa:

²⁰ era sa madua e na vuku ni ra a vakararavi kina; era sa lako mai kina, a ra sa taqaya.

²¹ Ni dou sa qai vaka na ka wale; dou sa raica niʼu sa biuti sobu, ia dou sa rere.

²² Seʼu sa kaya beka, Dou kauta mai na ka vei au? se, Dou solia vei au nai loloma mai na nomudoui yau?

²³ se, Dou vakabulai au mai na liga ni meca? se, Dou voli au mai na liga ni kaukauwa?

²⁴ Dou vakavulici au, kaʼu na tiko lo; ia dou vakatakila vei au na ka kaʼu sa cala kina.

²⁵ A ka kaukauwa vakaidina na vosa dodonu! ia ka cava beka na betena na nomudou vunauci au?

²⁶ Dou sa nanuma beka me vunauca na vosa, ia na ka sa cavuta ko koya sa luvu na lomana, sa vaka na cagi?

²⁷ Io, dou sa lutuki koya na lu-veniyali, ka kelia na kenai keli na nomudoui tau.

²⁸ Ia dou lomavinaka mada, dou raici au mai; ni sa macala ga vei kemudou kevaka kaʼu lasu.

²⁹ Dou saumaki mada mai, kakua ni kaya ni sai valavala ca; ia dou saumaki mada, ni sa tu kina na noqu caka dodonu.

³⁰ Sa tiko beka nai valavala ca e yamequ? a gusuqu beka sa sega ni kila rawa na ka e ca?