Jope 5 - AI VOLA TABU

A ka rarawa sa tubu e na vuku ni ca ni tamata, 1-7. E vinaka vua sa rarawa me nanuma ki na Kalou, 8-16. Ena qai yaga na ka rarawa vua sa vakararavi vei koya, 17-27.

¹ MO ia mada na kaci, de dua beka me via rogo mai vei iko; ia mo gole beka vei cei vei ira na tamata yalosavasava?

² Ni sa vakamatea na tamata lialia na yaloca, a sa vakarusai koya na tawa vuku na vuvu.

³ Au sa kunea na lialia ni sa vakawakana mai: ia kaʼu a kaya vakasauri ni sa ca na nonai tikotiko.

⁴ Sa yawa ni tiko vinaka ko iratou na luvena, a ra sa butuqaqi mai na matamata-ni-koro, a sa sega e Vakabula.

⁵ Sa kania na kedra vuata ko koya sa viakana, a sa kauta tani mai na loma ni kau votovotoa, a sa tiloma na nodrai yau ko koya sa viagunu.

⁶ E dina ni sa sega ni tubu na ca mai na kuvu-ni-soso, a sa sega ni tubu mai na qele na rarawa;

⁷ a sa sucu ga na tamata me rarawa, me vaka ni sa dauvuka cake na lidi-ni-buka.

⁸ Ia koi au kaʼu na qarai koya kina na Kalou, kaʼu na vakalaiva na noqu ka vei koya na Kalou:

⁹ o koya sa cakava tiko na ka levu ka sega ni kilai rawa; na ka e veivakidacalataki sa sega ni wili rawa:

¹⁰ o koya sa solia na uca ki vuravura, a sa vakatauca na wai ki na veiwere:

¹¹ me vakatikori ira kicake era tiko era; me ra laveti cake me tiko vinaka ko ira sa dautagi.

¹² Sa vakalaboca ko koya na nodrai lawaki na tamata qaseqase, a sa sega kina ni kitaka rawa na ligadra na ka era sagati kina.

¹³ Sa coriti ira na vuku e na nodra qaseqase; a sa biligi sobu na nodra lewa na yalovakatani.

¹⁴ Era sa ciciva na butobuto ni sa siga tu, a ra sa vakayayamo voli e na siga levu me vaka e na bogi.

¹⁵ A sa vakabula na dravudravua mai nai seleiwau; mai na gusudra, kei na ligadra na kaukauwa.

¹⁶ A ka o qo sa nanudei kina ko koya na dravudravua, a sa sogorubu na gusuna na tawa dodonu.

¹⁷ Raica, sa kalougata na tamata sa vunauca ko koya na Kalou: a ka o qo mo kakua kina ni beca ni sa yaviti iko ko Koya sa Kaukauwa:

¹⁸ ni sa vakararawataka, a sa vivia talega: sa vuetaka, a sa Vakabula talega e na ligana.

¹⁹ E na ka rarawa e ono, ena vakabulai iko ko koya: ia ni sa qai vitu, ena sega na ca me tauvi iko.

²⁰ Ni sa dausiga, ena vakabulai iko mai na mate: ni sai valu talega, mai na kaukauwa ni seleiwau.

²¹ O na vunitaki mai na kaukauwa ni vosa: ia ni sa lako mai na veivakarusai, ko na tawa rerevaka.

²² O na dredre vaka na veivakarusai kei na dausiga: o na sega talega ni rerevaka na manumanu ni vanua.

²³ Ni dou nai tovata kei na veivatu ni vanua; a ra na veivinakati kei iko na manumanu ni vanua.

²⁴ Ia ko na kila talega ni na sautu na nomu vale; ia ko na taleva na nomui tikotiko, ka sega ni cala.

²⁵ O na kila talega ni na vuqa na luvemu, ia na nomu kawa ena vaka na co ni vanua.

²⁶ O na yaco ki na nomui bulubulu ni ko sa qase vinaka mai, me vaka nai vau sila sa kau mai e na kena gauna.

²⁷ Raica, na ka o qo keitou sa vakasaqara ka kunea, a sa dina ga; mo rogoca, ka kila ko iko.