Jope 41 - AI VOLA TABU

Sa tukuna na livaiacani na Kalou.

¹ O SA yavia rawa beka mai na livaiacani e na siwa? se na yamena e na dali ko sa vakatukuca sobu?

² O na coka beka na ucuna e na gasau? se cula basika na gale-galena e na voto ni kau?

³ Ena masuti iko vakalevu beka? ena vosa vakamalumalumu vei iko?

⁴ Ena ia beka na veiyalayalati kei iko? o na kauti koya me nomu tamata ka tawa mudu, ne?

⁵ Drau na qito beka kaya me vaka kei na manumanu? se ko na vauca me nodra na nomu vada?

⁶ O ira na veitokani, era na cakava beka me kedra ka ni solevu? era na vota beka vei ira na dauveivoli?

⁷ O na vakaosoosoya beka na kulina e na saisai? se na uluna e na moto ni ika?

⁸ Mo tabaka e ligamu, nanuma na veivaluti, kakua ni kitaka tale.

⁹ Raica, sa tawa yaga na nanuma me rawai koya: ena domobula e sa raica walega, se segai?

¹⁰ Sa sega na lomaqa me via vakacudruya: ia ko cei na yatedei me qai tu rawa e mataqu?

¹¹ O cei sa taumadataki au, meʼu sauma tale vua? a ka kece sa tu e ruku ni lomalagi sa noqu ga.

¹² Au na sega ni vunia na tikina, se nona kaukauwa, se nona vatukai vinaka.

¹³ O cei me vakatakila na mata ni nonai sulu? se ko cei me toro vua me taqaruataka na nonai tarovi?

¹⁴ O cei me dolava nai sogo ni matana? sa rerevaki tu na batina e sa tu volita.

¹⁵ Sa dokai kova e na vuku ni varina, sa sogodregati matua vata sara;

¹⁶ sa vakata vata e dua na tikina ki na dua na tikina, me dredre kina ni curuma na cagi;

¹⁷ sa sema vata e dua na tikina ki na kenai sa, sa veikabi ga, me dredre kina ni tawase.

¹⁸ Ni sa suru ko koya, sa cila mai na rarama; ia na matana sa vaka ni sa kida na mataka:

¹⁹ sa lako mai na gusuna na cina caucaudre, sa rika maikina na lidi ni buka:

²⁰ sa lako tani e na ucuna na kubou, me vaka mai na kuro sa kere, se na lovo:

²¹ a nona cegu sa vakawaqaca na qilaiso ni buka, a sa lako mai na gusuna na yameyame-ni-buka.

²² Sa tiko na kaukauwa e na domona, a sa vuki na rarawa me reki e matana.

²³ A ua ni lewena sa veikabi: sa kaukauwa tu; sa sega ni yavala rawa.

²⁴ Sa kaukauwa na lomana me vaka na vatu: io, sa qaqa me vaka na tiki ni vatu i qaqi sa no e ra.

²⁵ Ni sa tu cake ko koya, era sa rere na qaqa: ni sa rika, sa yali na yalodra.

²⁶ Ai seleiwau i koya sa yavita sa sega ni lau: so na moto, se nai ula, se na saisai.

²⁷ Sa nanuma na aironi ko koya me co malai, kei na parasa me kau vuca.

²⁸ Ena sega ni dro e na vuku ni gasau: a vatu sa rabotaki sa vukica me vu-ni-sila.

²⁹ Ai wau sa nanuma me vu-ni-sila: sa dredre vaka na rorogo ni moto.

³⁰ Sa tu e rukuna na caca ni kuro gagata: sa koto e na ka gagata e na oruoru.

³¹ Sa vakerea na wai titobu me vaka na kuro: sa vakerea na waitui me tautauvata kei na kuro wali.

³² A we ni nonai lakolako sa caucaudre: eda vakasama na wai titobu me sika mai.

³³ Sa sega e vuravura me tautauvata kaya, e sa cakavi me tawa rere rawa.

³⁴ Sa rai sobu ki na ka cecere kecega: sa turaga ko koya vei ira kecega na gone dauviavialevu.