Jope 40 - AI VOLA TABU

Sa vakamalumalumutaki koya ko Jope vua na Kalou, 1-5. Sa kitaki Jope ko koya me vakatakila ni sa dodonu, ka kaukauwa, ka vuku, 6-14. Sa tukuni beemoci, 15-24.

¹ A SA vosa tiko vei Jope ko Jiova ka kaya,

² O koya sa veileti kei Koya sa Kaukauwa, me na vakavulici koya beka talega? o koya sa vunauca na Kalou, me vosa mada kina.

³ Sa qai vosa vei Jiova ko Jope, ka kaya,

⁴ Raica, au sa ca; a cava meʼu kaya vei iko? au na tabonaka na gusuqu e na ligaqu.

⁵ Au sa vosa oti vakadua: ia kaʼu na sega ni vosa tale: io, sa vakarua: kaʼu na sega ga ni kuria.

⁶ Sa qai vosa tale vei Jope ko Jiova mai na covulaca, ka kaya,

⁷ Mo vauca mada vakatagane na tolomu: kaʼu na vakatataro vei iko, ia mo vakatakila mai vei au.

⁸ O na vakatawayagataka beka na noqu lewa? o na vakacalai au, mo dodonu ko iko?

⁹ A ligamu beka sa vaka na liga ni Kalou? se ko kitaka rawa beka na kurukuru e domomu me tautauvata kaya?

¹⁰ Mo vakaiukuukutaki iko mada e na ka vakaturaga kei na vakarokoroko; ka vakaisulutaki iko e nai ukuuku kei na lagilagi.

¹¹ Mo duibiubiuti na katakata ni nomu cudru: ka raici ira kece era viavialevu, ka vakamalumalumutaki ira.

¹² Mo raici ira kecega era viavialevu, ka vakasivoya, ka buturaki ira nai valavala ca e nodra yasana.

¹³ Mo vunitaki ira vata e na kuvu-ni-soso, sogolati ira e na vanua vuni.

¹⁴ Kaʼu na qai vakadinadina vei iko, ni sa vakabulai iko rawa na ligamu i matau.

¹⁵ Mo raici beemoci mada, o koya kaʼu sa cakavi kemudrau ruarua: sa daukana co me vaka na karavau.

¹⁶ Mo raica mada, ni sa tiko e tolona na nona kaukauwa, kei na nona gulevu sa tu e nona vicovico.

¹⁷ Sa yavalata na buina ka sa vaka na sitari: a dali ni sagana sa tobe vata.

¹⁸ A suina sa vaka na tiki ni parasa kaukauwa; a suina sa vaka na tiki ni aironi.

¹⁹ O koya na vuna e na cakacaka ni Kalou: o koya sa cakavi koya sa solia vua na nonai yaragi.

²⁰ Sa tubura dina na kena na veiulu-ni-vanua, a ra sa dauqito maikina na manumanu kecega ni vanua.

²¹ Sa koto e ruku ni kau rugurugua, e na ruku ni gasau kei na woruworu.

²² Sa ubi koya na kau rugurugua e na yaloya-lona; sa tu voliti koya na wilou mai na wai drodro.

²³ Raica, ni sa vuabale na uciwai, sa sega ni rere ko koya; sa yate-dei ga ni sa drodro sara mai na Joritani ki na gusuna.

²⁴ Ena rawai koya beka e dua ni sa raica tiko? se na cula rawa na ucuna ni sa coriti?