Jope 39 - AI VOLA TABU

Sa tarogi Jope na Kalou e na vuku ni koti kei na teira, 1-4; kei na asa kila, 5-8; kei na yunikoni, 9-12; kei na belo, 13-18; kei na ose, 19-25; kei na taiseni, 26; kei na ikeli, 27-30.

¹ O SA kila beka na tabayabaki sa vakasucu kina na koti kila ni vatu? se ko vakasama na kena vakasucu na teira?

² se ko wilika na vula era yacova? se ko kila na tabayabaki era vakasucu kina?

³ Era koto e ra, era vakasucuma na luvedra, era biuta kituba na nodra yaluma.

⁴ Sa matavinaka na luvedra; era tubu cake mai veikau; era lako tani, ka sega ni lesu tale vei ira.

⁵ O cei sa vakatala lalaga na asa kila? se ko cei sa sereka nai vesu ni asa kila?

⁶ A lekutu kaʼu sa cakava me nona vale, kei na talasiga me nonai tikotiko.

⁷ Sa vakalialiai ira na lewe vuqa ni koro, a sa sega ni rogoca na kaila i koya sa vakasava.

⁸ A nona vanua me kana voli kina na veiulu-ni-vanua, a sa qara na ka drokadroka kecega.

⁹ Ena via qaravi iko beka na yunikoni; se na via tiko e na nomu lomanibai?

¹⁰ O sa vauca beka rawa na yunikoni e na kena dali ki nai siviyara? se na muri iko ni yarai kadrukadru e na buca?

¹¹ O na vakararavi vua e na vuku ni sa levu na nona kaukauwa? se ko na laiva beka vua na nomu cakacaka?

¹² O na vakadinati koya me kauta mai na nomu sila, ka kumuna mai ki na nomu lololo?

¹³ A tabana na manumanu dau marau ka sa reki tu! sa tabana kei lawena beka na belo?

¹⁴ sa laiva no na kena yaloka e na qele, ka vakalakalataka e na kuvu-ni-soso,

¹⁵ a sa tawa nanuma ni na cataka beka na yava, se buturaka na manumanu kila.

¹⁶ Sa kaukauwa na lomana vei ira na luvena, me vaka era sega ni nona; sa oca wale ko koya, ka sa tawa rere;

¹⁷ e na vuku ni sa tawa solia vua na vuku na Kalou, a sa tawa vota vua na yalomatua.

¹⁸ Ni na sa qai tu vakadodonu cake ko koya, ena sa vakalialia na ose kei koya sa vodoka.

¹⁹ O sa solia beka vua na ose na kaukauwa? o sa vakaisulutaka na domona e na kurukuru?

²⁰ o na cakavi koya beka me rika me vaka na vodre? nai ukuuku ni ucuna na ka rerevaki.

²¹ Sa kelia na buca, ka rereki e nona kaukauwa: sa laʼki tavaki ira na tamata era vakaiyaragi.

²² Sa dredrevaka na rere, ka sa tawa taqaya; a sa sega ni lesu tani mai nai seleiwau.

²³ Sa qiriti koya na taga ni gasau, kei na moto makamakalivata kei nai sasabai.

²⁴ Sa tiloma na qele e nona lomakatakata kei na cudru: a sa sega ni tu dei ni sa qai uvuci na davui.

²⁵ Sa vakaueue ki na domo ni davui; a sa boica nai valu ni sa yawa tu, kei na nodra kurukuru na turaga kei na kaila.

²⁶ Sa vuka beka na taiseni e na nomu vuku, ka tevuka na tabana kivakaki na mata ni ceva?

²⁷ Sa vuka cake na ikeli, ka cakava maicake na kena su, e na vuku beka ni nomu vosa?

²⁸ Sa tiko mai na uluvatu ka sa tu dei kina, e na bati ni uluvatu, kei na tikina kaukauwa.

²⁹ Mai na yasana ko ya sa qara na kena; sa irova vakayawa e na matana.

³⁰ A luvena talega sa daugunu dra: ia e na vanua era koto kina na moku, sa tiko kina ko koya.