Jope 38 - AI VOLA TABU

Sa qai vosa na Kalou vei Jope, ka tukuna na nona cakacaka, me kila kina ko Jope na nona lialia kei na nona malumalumu.

¹ SA qai vosa mai vei Jope ko Jiova mai na covulaca, ka kaya,

² O cei o qo sa vakabutobutotaka na lewa e na vosa sa sega ni vuku?

³ Mo vauca mada vakatagane na tolomu: niʼu na vakatataro vei iko, ia mo vakatakila mai vei au.

⁴ O a tiko maivei ni kaʼu a tauyavutaki vuravura? mo tukuna mai, kevaka ko sa kila.

⁵ O cei ka virino na kenai vakarau, ni ko sa kila? se ko cei ka dreta kina na dali i vakarau?

⁶ Sa tauyavutaki e na dela ni cava? se ko cei ka vakotora na kena vatu i tutu;

⁷ ni ra a meke vata na kalokalo i volasiga, ka ra kaila e na reki na luve ni Kalou kecega?

⁸ Se ko cei ka sogolatia na wasawasa e nai sogo, ni sa loka, me vaka ni sa curu mai na kete?

⁹ Niʼu a cakava na o me kenai sulu, kei na butobuto vavaku me kenai vau,

¹⁰ niʼu a vakarauta na kenai yalayala, ka cakava na kenai vakadei kei na kenai sogo,

¹¹ ka kaya, Mo yaco mai kike, kakua ni sivia: ia me yala eke na nomu ua viavialevu?

¹² O sa vakarota beka na sabogibogi e na nomu gauna, ka vakatakila ki na mataka na vanua me kida kina?

¹³ me taura nai yalayala kei vuravura, me ra kuretaki tani kina nai valavala ca?

¹⁴ Sa vuki o qori me tautauvata kei na dreta ki na ka sa tabaki kina; a sa tu mai na ka ko ya me vaka nai sulu.

¹⁵ A sa kureitaki vei ira nai valavala ca na kedra rarama, ia ena ramusu na liga viavialevu.

¹⁶ O sa curuma beka nai vurevure ni waitui? se ko sa lako voli e na dreke ni wasawasa;

¹⁷ se sa dola oti vei iko na katuba kei mate? se ko sa kunea na kenai sogo na yaloyalo ni mate?

¹⁸ se ko kila beka na kena raraba ni vuravura? tukuna kevaka ko kila na ka kecega o qori.

¹⁹ Sa evei na sala sa tiko kina na rarama? ia na butobuto, sa evei na kena vanua,

²⁰ mo kauta kina ki na kenai yalayala, mo kila talega kina na sala ki na kena vale?

²¹ O sa kila beka e na vuku ni ko a qai sucu? se na vuku ni sa vuqa nai wiliwili ni nomu siga?

²² O sa curuma beka na lololo ni uca-vulavula? se ko sa raica na lololo ni uca-cevata,

²³ a ya kaʼu sa maroroya ki na gauna ni rarawa, ki na siga ni tuvai valu kei nai valu?

²⁴ A sala cava sa wasewase kina na livaliva, sa veibiuyaki kina na cagi mai cake e vuravura?

²⁵ O cei sa wasea na sala ni wai me tau mai kina ni sa vuabale, se na sala me se kina na kurukuru;

²⁶ me tau kina na uca ki na vanua sa sega kina na tamata; kei na lekutu, sa sega kina na tamata;

²⁷ ka me vakaceguya na vanua sa lala ka tawa teivaki; me cakava talega na mata ni co malumalumu me rovu mai?

²⁸ Sa vakatamani beka na uca? se ko cei beka sa vakasikava na mata ni tegu?

²⁹ a kete i cei sa lako maikina na wai-cevata? a tegu cevata talega ni lomalagi, ko cei sa vakasucuma?

³⁰ Sa tabogo na wai me vaka e na vatu, a sa vauci na dela ni wai titobu.

³¹ O na vauca beka na lewa vinaka kei Peliatisi, se sereka nai vau kei Oreoni?

³² O na kauti Maseroci beka mai e na kena gauna? se tuberi Arikituro yani kei ira na luvena?

³³ O sa kila beka nai valavala ni kena lewai na lomalagi? o sa vakayacora rawa mai na kena lewa ki vuravura?

³⁴ O sa tabalaka rawa beka na domomu ki na o, me tauci iko na wai levu?

³⁵ O na tala beka yani na livaliva, me lako, me mai kaya vei iko, Oi keitou o qo?

³⁶ O cei sa viritu na vuku ki na lomada? se ko cei sa solia na yalomatua ki na tamata?

³⁷ O cei sa wilika rawa na o kei lomalagi e nona vuku? se ko cei me livia rawa na wai mai na tavaya kei lomalagi,

³⁸ ni sa kaukauwa mai na kuvu-ni-soso, ka veikabi sara na qele qa?

³⁹ O na vakasava beka na kena kakana na laioni? se vakamamautaki ira na luve ni laioni ni sa viakana,

⁴⁰ ni ra, sa koto sobu e nodrai kotokoto, ka tiko ga e na tikina vuni ni ra lawaki koto?

⁴¹ O cei sa vakarautaka na kena na reveni? ni sa tagi na luvena vua na Kalou, era sa lako sese voli ni sa sega na kedra.