Jope 35 - AI VOLA TABU

Sa vaka ko Iliu ni sa sega ni ca rawa se vinaka rawa na Kalou e na vuku ni cakacaka ni tamata, 1-8. A sa sega ni kune ka vinaka na tamata e so ni ra sega ni kerea e na vakabauta, 9-16.

¹ SA ia tiko na vosa ko Iliu, ka kaya,

² O sa nanuma beka me ka dodonu o qo, na nomu kaya, Au sa yalododonu vua na Kalou?

³ Ni ko sa kaya, A cava na kena yaga vei iko? A cava na betena vei au, kevaka kaʼu sa vakasavasavataki mai na noqui valavala ca?

⁴ Au na tukuna vei iko, ia vei kemudou vata kei na nomui tokani.

⁵ Mo raica mada na lomalagi, ka sarava: ka vakaraica na o sa cecere vei iko.

⁶ Kevaka ko sai valavala ca, a cava ko sa cakava vua? ia kevaka sa vakalevutaki na nomu talaidredre, a cava ko sa kitaka vua?

⁷ Kevaka ko sa caka dodonu, a cava ko sa solia vua: se cava sa taura maivei iko ko koya?

⁸ Ena ca beka e na nomui valavala ca na tamata vakai iko; ka yaga beka na nomu caka dodonu vua na luve ni tamata.

⁹ E na vuku ni sa levu na veivakasaurarataki, era sa tagi kina ko ira era sa vakasaurarataki: era sa qoqolou e na vuku ni ligadra na kaukauwa.

¹⁰ Ia ka sa sega e dua sa kaya, Sa evei na Kalou ka buli au, o koya sa solia na meke e na bogi,

¹¹ o koya sa vakavulici keda vakalevu, ka vakalailai ki na manumanu ni vanua; a sa cakavi keda me da vuku cake e na manumanu ni lomalagi?

¹² Era tagi maikea e navuku ni nodra viavialevu na tamata ca, ka sega e dua sa vosa mai.

¹³ E dina ena sega ni vakarogoca na masu wale na Kalou, ena sega ni goleva ko Koya sa Kaukauwa.

¹⁴ Ia ni ko sa kaya ni ko na sega ni kunei koya rawa, sa tiko ga vua na lewa dodonu: o koya o qo mo vakararavi kina vua.

¹⁵ Ia o qo, e na vuku ni sa sega ni lako mai ko koya e nona cudru, a sa sega ni nanuma vakalevu na ka ca:

¹⁶ sa dalaga wale kina na gusuna ko Jope, sa vakalevutaka na vosa ka sega ni vuku.