Jope 30 - AI VOLA TABU

Sa vaka ko Jope ni sa vuki na nona vakarokorokotaki me vakalialiai, 1-15; kei na nona tiko vakasautu me tiko vakaca, 16-31.

¹ IA o qo sa vakalialiai au ko ira era gone vei au, ko ira kaʼu a nanuma na tamadra me tawa yaga ni wili vata kei na koli ni noqu qele ni sipi.

² Ia ka cava na kena yaga vei au na kaukauwa ni ligadra, ko ira sa qase malumalumu?

³ E na vuku ni viakana kei na dausiga era sa tiko taudua; era dro ki na lekutu loaloa sa lala ka dravuisiga.

⁴ Era tava na co gaga mai veikau, kei na waka ni juniperi me kedra.

⁵ Era vakasevi tani maivei ira na tamata, (era kailataki ira me vaka era daubutako;)

⁶ me tiko e na kikilo rerevaki, e na qara kei vuravura, kei na vatu.

⁷ Era a tagi e loma ni veikau lalai; era soqoni vata e ruku ni kau karokaroa.

⁸ Era luve ni lialia, io, era luve ni kaisi ca: era ca, ka vinaka na qele.

⁹ Ia era sa qai serekali-taki au, io, era sa cavuti au me ka lialia.

¹⁰ Era vakasisilataki au; era dro vakayawa vei au, a ra sa sega ni rere ni kasivita na mataqu.

¹¹ E na vuku ni sa sereka ko koya na nona dali, ka vakararawataki au, era sa laiva talega nai tarovi e mataqu.

¹² Era sa tu cake na cauravou e na ligaqu i matau; era biliraka na yavaqu, ka caramaka na nodra sala dauveivakarusai meʼu ca.

¹³ Era vakacacana na noqu sala, era vinakata na noqu rarawa, a sa sega e vakavulici ira.

¹⁴ Era sa yaco mai me vaka ki na bai e basuki: ni sa ia na veivakarusai era sa drigiti au mai.

¹⁵ Sa lesu mai vei au na ka rerevaki; sa vakasava na yaloqu me vaka na cagi: a sa seavu na noqu tiko vinaka me vaka na o.

¹⁶ Ia sa qai sova yani na yaloqu e lomaqu; sa tauri au na veisiga rarawa.

¹⁷ Sa laucoka na suiqu e na yagoqu e na bogi: a sa sega ni vakacegu rawa na noqu ua.

¹⁸ E na vuku ni kaukauwa ni noqu mate sa duatani mai na noqui sulu: sa vauci au me vaka na bele ni noqui sulu.

¹⁹ Sa biuti au ko koya ki na oruoru, ia kaʼu sa qai vaka na kuvu-ni-soso kei na dravusa.

²⁰ Au sa tagi vei iko, ia ko sa sega ni rogoci au: au sa tu cake, ia ko sa sega ni via kilai au.

²¹ O sa vuki me yalovakatani vei au: o sai valu mai vei au e na ligamu kaukauwa.

²² O sa laveti au kicake ki na cagi; o sa vakavodoki au kina; o sa vakawaicalataki au.

²³ Niʼu sa kila ko na vakalesui au ki na mate, kei na vale sa lesi me nodra kecega era bula tiko.

²⁴ Ia ena sega ni dodoka ko koya na ligana ki nai bulubulu, ia ka ra sa tagi ga ni sa ia na veivakarusai.

²⁵ Au a tagi, se segai, e na vuku i koya ka rarawa? a sa bibi na yaloqu, se segai, e na vukudra na dravudravua?

²⁶ Niʼu a yadrava tiko na ka vinaka, sa qai yaco na ka ca: ia niʼu a waraka na rarama, sa qai yaco na butobuto.

²⁷ Sa kere na ketequ, ka sega ni vakacegu: sa taumadataki au na veisiga rarawa.

²⁸ Au sa tagi lakoga, ka sa sega ni cilavi au na siga: au sa tu cake, kaʼu sa qoqolou e nai soqosoqo.

²⁹ Au sa tacidra na gata, kei na nodrai tokani na lulu.

³⁰ Sa loaloa na kuli ni yagoqu, a sa kama na suiqu e na katakata.

³¹ Sa vuki talega na noqu api me ka ni tagiyaso, kei na noqu kove me domodra na dautagi.