Jope 19 - AI VOLA TABU

Sa cavuta ko Jope na nodra tawa loloma na wekana, 1-22. Sa tukuna na nona, vakabauta nai Vakabula, 23-29.

¹ A SA vosa ko Jope, ka kaya,

² A cava na kena dede mo dou vakararawataka na yaloqu, ka butuqaqi au e na vosa?

³ Sa vakatini na nomudou vosavakacacataki au: dou sa sega ni madua ni dou sa loma-kaukauwa vei au.

⁴ Ia keʼu sa cala dina ga, ke sa tiko ga vei au na noqu cala.

⁵ Kevaka e dina ni dou sa via vakalevulevui kemudou vei au, ka via cavuta vei au na ka kaʼu rogo ca kina:

⁶ dou kila o qo ni sai koya na Kalou sa vakabalei au, ka sa lawavaki au e nona lawa.

⁷ Raica, kaʼu sa qoqolou e na vuku ni valavala kaukauwa, ia ka sa sega e rogo mai: au sa kaci vakadomoilevu, ia sa sega e lewa mai.

⁸ Sa sogolatia na noqu sala ko koya meʼu dredre ni lako, a sa vaka-butobutotaka na noqui lakolako.

⁹ Sa luvata tani vei au na noqui ukuuku, a sa kauta tani nai sala e na uluqu.

¹⁰ Sa vakarusai au e na veiyasana, ia kaʼu sa yali: a sa cavuivuvu na ka kaʼu sa vakararavi kina, me vaka na kau.

¹¹ Sa vakacaudreva talega vei au na nona cudru, a sa nanumi au meʼu vaka e dua vei ira na nona meca.

¹² Sa lako vata mai ko ira na nonai valu, era caramaka na nodra sala me rawai au, era vakavolivolita vakaivalu na noqui tikotiko.

¹³ Sa vakayawataka vei au na wekaqu, a ra sa qai lomavakatani mai vei au ko ira na kai noqu.

¹⁴ Sa ra yali na wekaqu, a ra sa guilecavi au ko ira na noqui tau.

¹⁵ O ira era tiko e noqu vale, kei ira na noqu vada, era nanumi au me vulagi: au sa kai tani e matadra.

¹⁶ Au a kaciva na noqu tamata, a sa sega ni vosa mai; au a vakamasuta e na gusuqu.

¹⁷ Sa ka tani vua na watiqu na noqu cegu, io, niʼu a vakamasuta ga e na vukudra na luve ni yagoqu.

¹⁸ Ia ko ira na lalai era beci au; au a tu cake, a ra sa vosacataki au.

¹⁹ Sa vakasisilataki au ko ira kece na tamata keitou a bose vata: ia ko ira kaʼu a lomana era sa vuki rubu vei au.

²⁰ A suiqu sa kabita na kuliqu kei na lewequ, ia kaʼu sa dro bula ga kei na kuli ni batiqu.

²¹ Dou lomani au mai, dou lomani au mai, oi kemudou na wekaqu; ni sa tarai au na liga ni Kalou.

²² A cava dou sa vakacacani au kina me vaka na Kalou, ka sa sega ni dou cegu e na yagoqu?

²³ Me volai mada na noqu vosa! me ceuti mada ki nai vola!

²⁴ me ceuti e na peni aironi kei na uma ki na vatu me tawa oti rawa!

²⁵ Niʼu sa kila ni sa bula tiko na noqui Vakabula, ena tu talega e vuravura e na siga maimuri:

²⁶ ia ni sa cucula oti na kuliqu o qo, kaʼu na kunea ga na Kalou e na yagoqu:

²⁷ o koya kaʼu na raica vakai au ga, ka kunea e na mataqu, ka sega ni dua tani; ni sa vakarusai oti e lomaqu na noqui ivi.

²⁸ Ia dou kaya, Keitou sa vakacacani koya e na vuku ni cava? ni sa kune vei au na vu ni ka dina.

²⁹ Dou rerevaka nai seleiwau: ni sai sau ni cudru nai seleiwau, mo dou kila ni sa dua na siga ni lewa.