Jope 17 - AI VOLA TABU

Sa vakadodonutaka na nona vosa vua na Kalou, 1-5. Era na kidacala na tamata yalododonu e na vukuna, ia ka ra na tawa yalolailai kina, 6-10. Sa vakanananu ki na mate ko koya, 11-16.

¹ SA takali na noqu cegu; sa oti na noqu siga; sa noqu ga nai bulubulu.

² O ira na veivakalialiai era sa tiko kei au? a mataqu sa koto vata kei na nodra veivakararawataki, se segai?

³ Mo virikotora mada, me daru veivakadinadinataki; o cei ko koya ena veitauri liga kei au?

⁴ Ni ko sa tabonaka na lomadra me ra kakua ni vuku; o koya o qo ko na sega kina ni vakalevui ira.

⁵ O koya sa vosaveicavilaki vei ira na wekana, ena boko na matadratou na luvena.

⁶ Sa cakavi au talega ko koya meʼu tukuni me ka lialia vei ira na tamata; ia kaʼu sa ka vakasisila e matadra.

⁷ A sa kabukabu na mataqu e na vuku ni rarawa, a sa vaka na yaloyalo na tikiqu kecega.

⁸ Ena kidroa ko ira na yalododonu e na ka o qo, ena yavala na tawa cala me vorati koya na dauveivakaisini.

⁹ Ia na yalododonu ena lako dei e na nona sala, o koya talega sa liga savasava ena kaukauwa cake tikoga.

¹⁰ Ia koi kemudou kecega, dou saumaki mada mai: niʼu sa sega ni kunea e dua na tamata vuku vei kemudou.

¹¹ Sa lako tani na noqu siga; sa muduki tani na noqui naki, ia na vakanananu ni lomaqu.

¹² Sa vuki na siga me bogi; sa lekaleka na rarama e na vuku ni rarawa.

¹³ Au sa waraka nai bulubulu me noqu vale: au sa cakava na noqui mocemoce e na butobuto.

¹⁴ Au a kaci yani ki na vuca, Sa tamaqu ko iko: ki na baca, O; sa tinaqu kei na ganequ.

¹⁵ Sa qai evei na ka meʼu nanuma? ia na ka kaʼu sa nanuma, o cei ena kunea?

¹⁶ Ena lako sobu ga ki nai sogo ni bulubulu; ni keirau vakacegu vata e na kuvu-ni-soso.