Jope 16 - AI VOLA TABU

Sa vunauci iratou na wekana ko Jope e na vuku ni nodratou tawa loloma, 1-5; a sa tukuna ni sa ka lomani ko koya, ka sa yalododonu ga, 6-22.

¹ SA qai vosa ko Jope, ka kaya,

² E vuqa na ka vakaoqo kaʼu sa rogoca: na dau-veivakacegui vakararawa koi kemudou kecega.

³ Ena oti ninaica na vosa wale? se na cava beka sa vakadoudoutaki iko mo vosa mai?

⁴ E rawarawa meʼu vosa talega me vakataki kemudou: kevaka kemudou sa noqui sosomi, e rawarawa meʼu vakalevutaka na vosa vei kemudou, ka kurea na uluqu vei kemudou:

⁵ ia kaʼu a qai vakaukauwataki kemudou ga e na gusuqu, ia ni sa yavavala na tebenigusuqu, sa na qai malumu kina na nomudou rarawa.

⁶ Keʼu sa vosa, ke sa sega ni malumu kina na noqu rarawa: kevaka kaʼu sa cegu ni vosa, a cava me seavu kina vei au?

⁷ Ia o qo sa qai vakaocai au ko koya: o sa vakayalia na wekaqu kecega.

⁸ Ia ko sa vauci au matua e na noqu mate, o qori sa tukuni au: ia na noqu suivotu sa tu cake mai, a sa vakatakilai au ki mataqu.

⁹ Sa dresulaki au e na nona cudru, a sa cati au: sa vakase-quruquru vei au e na batina; o koya na noqu meca sa mata cudrucudru mai vei au.

¹⁰ Era sa dalaga vei au e na gusudra; era sa yavita na baluqu e na veivakalialiai; era sa yalovata me vakacacani au mai.

¹¹ Sa soli au yani na Kalou vei ira na tamata ca, a sa biuti au yani ki na ligadra nai valavala ca.

¹² Au a tiko vakacegu, a sa qai musuki au ko koya; sa taura na domoqu talega, ka vorolaki au; sa vakaturi au meʼu nona ka me vanavana kina.

¹³ Sa vakavolivoliti au ko ira na nona dauvanavana; sa tasea na toloqu ko koya, ka sega ni vakacegu; sa livia na miqu ki na qele:

¹⁴ sa daumusuki au wasoma; sa cici vakaivalu mai vei au me vaka na tamata yagolevu.

¹⁵ Au sa cula nai sulu taqarotu ki na kuliqu, ka biuta sobu na noqu totoka ki na kuvu-ni-soso.

¹⁶ A mataqu sa dukave-luvelu e na tagi, a sa tauca na dakudaku-ni-mataqu na yaloyalo ni mate:

¹⁷ sa sega e na vuku ni sa tu e ligaqu nai valavala tawa dodonu: a noqu masumasu talega sa savasava.

¹⁸ I qele, mo kakua ni ubia na kequ dra, me kakua talega na tikina e vuni kina noqu tagi.

¹⁹ O qo talega, raica, sa tiko mai lomalagi ko koya sa vakadinadina vei au, ia sa tiko maicake ko koya sa lewai au.

²⁰ Sa vakalialiai au ko iratou na wekaqu; ia na mataqu sa sovara ga na kena wai vua na Kalou.

²¹ Me tara mada vua na tamata me veilewai kaya na Kalou, me vaka na tamata sa veilewai kaya na wekana!

²² Ni na sa oti mada na yabaki e vica ga, kaʼu na qai lako yani e na sala kaʼu na sega ni lako tale maikina.