Jope 14 - AI VOLA TABU

Ni sa ka lekaleka na bula ni tamata, ka sa tawa bula tale e vuravura ni sa mate, sa masuta na Kalou ko Jope me lomani koya mai.

¹ A TAMATA sa sucu mai na alewa sa vica walega na nona siga, a sa vutu ni rarawa.

² Sa lako mai ko koya me vaka na se ni kau, a sa tamusuki tale: sa dro talega me vaka na yaloyalo, a sa sega ni tiko dei.

³ Ia ko sa yadra va beka e dua sa vakaoqo, ka kauti au mai me daru veilewai kei iko?

⁴ O cei me kauta rawa mai na ka savasava mai na ka tawa savasava? sa sega e dua.

⁵ E na vuku ni sa lokuci tu na nona siga, ka sa tu vei iko nai wiliwili ni nona vula, ni ko sa lesia talega na kenai yalayala me kakua ni sivia;

⁶ mo gole tani mada kina vua, me vakacegu ko koya, me vakaotia mada na nona siga, me vaka na tamata voli.

⁷ Ni sa daudinati, kevaka sa ta sobu na kau, ena tubu tale, ena sega talega ni yali na kena tubu vou mai.

⁸ Kevaka sa vuca mai na wakana e na qele, ka sa mate na vuna e na soso;

⁹ ena tubu mai ni sa boica na wai, ena tubura na tabana me vaka na kau sa tei.

¹⁰ Ia sa mate ga na tamata, a sa ka yaliyali: ia sa ciba na tamata, a sa evei ko koya?

¹¹ Me vaka sa dauyali na wai mai na wasawasa, a sa daudi ka mamaca na uciwai:

¹² sa vakakina vua na tamata, sa daukoto sobu, ka sega ni tu cake tale: era na sega ni yadra, se vakaturi cake mai na nodra moce, ka me yali mada na lomalagi.

¹³ Mo vunitaki au mada e nai bulubulu, ka tabonaki au, me oti mada na nomu cudru, ka lokuca vei au e dua na siga, ka nanumi au!

¹⁴ Kevaka sa ciba na tamata, ena bula tale ko koya? au na waraka na siga kecega sa loku vei au, me yaco mada na noqu vakamataliataki.

¹⁵ O na kaci mai, kaʼu na rogo yani vei iko: o na vinakata na cakacaka ni ligamu.

¹⁶ Ia o qo ko sa wilika nai cavu cavu ni yavaqu: kakua ni daunanuma na noqui valavala ca.

¹⁷ Sa sogodregati e na taga na noqu talaidredre, ia ko sa cula kina na noqui valavala ca.

¹⁸ Sa yaco dina me ka wale na ulu-ni-vanua sa lutu sobu; a vatu talega, sa biuti tani mai na kena yasana:

¹⁹ sa solota na vatu na wai: o sa luvuca na ka sa tubu mai na kuvu-ni-qele; ia ko sa dauvakania talega na vakanananu ni tamata.

²⁰ O sa gumatua tikoga vua, a sa takali ko kova: o sa vakatanitaka na matana, ka vakatalai koya yani.

²¹ Sa vakarokorokotaki mai ko iratou na luvena, a sa sega ni kila ko koya; a ratou sa vakasivoi, a sa sega ni vakasama ko koya.

²² Ia ena rarawa na lewena e ubi kina, ena tagi talega e lomana na yalona.