Jope 13 - AI VOLA TABU

Sa vunauci iratou na wekana ko Jope, 1-12; a sa tukuna na nona vakabauta, 13-19. Sa vakamamasu ko koya vua na Kalou, 20-28.

¹ RAICA, a ka kecega o qori sa kunea na mataqu, sa rogoca na daligaqu ka kila.

² A ka dou sa kila, kaʼu sa kila talega; kaʼu sa sega ni uasivi sobu vei kemudou.

³ E dina, kaʼu sa via vosa vei Koya sa Kaukauwa, au sa vinakata me keirau vei-tarogi kaya na Kalou.

⁴ Ia koi kemudou, dou sa dautulia na lasu, dou sa vuniwai tawa yaga kecega.

⁵ Mo dou tiko lo sara mada! ena sa nomudou vuku ga o qori.

⁶ Dou rogoca mada na noqu vakatusa, ia dou vakarorogo ki na vosa veilewai ni tebenigusuqu.

⁷ Dou na vosa ca beka e na vukuna na Kalou? dou na vosa veivakaisini e na vuku i koya?

⁸ Dou na vinakata loa beka na matana? dou na ia na veileti e na vuku ni Kalou?

⁹ Sa vinaka beka me vakatarogi kemudou ko koya? se dou sa vakalialiai koya, me vaka ni sa ia na veivakalialiai na tamata?

¹⁰ Ena vunauci kemudou dina ko koya, kevaka dou sa vakadonui ira lo na tamata.

¹¹ Ena sega beka ni vakarerei kemudou na nona ka vakaturaga? ena tawa tauci kemudou na rerevaki koya?

¹² A nomudou vosa vakaibalebale nai bole dravu, a yagomudou na yago qele.

¹³ Dou galuvi au mada ga, meʼu vosa koi au, me qai veitalia se cava ena yacovi au.

¹⁴ A cava meʼu taura kina na lewequ e batiqu? ka tokara na noqu bula e ligaqu?

¹⁵ Kevaka sa vakamatei au ko koya, kaʼu na vakararavi ga vua: ia na noqui valavala kaʼu na vakadinadinataka e matana.

¹⁶ Sai koya talega kaʼu na bula kina; ni sa sega na tamata dauveivakaisini me toro ki matana.

¹⁷ Dou rogoca vakavinaka na noqu vosa, kei na noqu vakatusa e na daligamudou.

¹⁸ Raica, kaʼu sa qai vakarau tu ki na veilewai: au sa kila niʼu na vakadonui.

¹⁹ O cei ena veilewai kei au? kevaka kaʼu na qai galu o, kaʼu na ciba.

²⁰ E rua ga na ka mo kakua ni kitaka vei au: kaʼu na qai sega ni vunitaki au vei iko.

²¹ Mo kauta vakayawa tani vei au na ligamu: me kakua talega ni vakarerei au na ka rerevaki maivei iko.

²² Mo qai kaci mai, kaʼu na qai vosa: seʼu vosa koi au, mo qai vosa mai vei au.

²³ E vakavica beka na noqu caka cala, kei na noqui valavala ca? mo vakatakila vei au na noqu talaidredre kei na noqui valavala ca.

²⁴ A cava ko sa vunia kina na matamu, ka nanumi au me nomu meca?

²⁵ O na vutu vorota beka na dra-ni-kau sa cagina? se cicimuria na vu-ni-sila mamaca?

²⁶ Ni ko sa vola na ka vakararawa vei au, ka votai au e na noqui valavala ca niʼu a cauravou.

²⁷ O sa vesuka talega na yavaqu e nai vesu kau, ka vakaraica matua na noqui lakolako kecega; a sa vakawena na qeteqete ni yavaqu:

²⁸ ia ko koya o qori sa malai yani me vaka na ka sa vuca, me vaka nai sulu sa kania na sarasara.