Jope 12 - AI VOLA TABU

Sa tabana yani ko Jope na nodratou vosa na wekana, 1-5; a sa vakadinadina ni sa kaukauwa sara na Kalou, 6-25.

¹ A SA vosa ko Jope, ka kaya,

² Sai kemudou dina ga na tamata, ia na vuku ena mate vata kei kemudou!

³ Ia sa tu talega vei au na lomavuku me vaka sa tu vei kemudou; au sa sega ni uasivi sobu vei kemudou: ia ko cei sa tawa kila na ka vakaoqori?

⁴ Au sa vaka e dua sa vakalialiai e na kai nona, e dua sa masu ki na Kalou, a sa vosa mai vei koya: ia sa vakalialiai na tamata dodonu ka tawa cala.

⁵ O koya sa tiko cegu sa nanuma e lomana ni sa cina e beci ko koya sa voleka ni tidara na yavana.

⁶ Sa sautu na nodrai tikotiko na daubutako, a sa dei na nodra tiko era sa vakacudruya na Kalou; ia na tamata sa dausoli ka kina na Kalou.

⁷ Ia mo taroga mada na manumanu ni vanua, era na vakavulici iko; kei ira na manumanu ni lomalagi, era na tukuna vei iko:

⁸ se vosa ki na vanua, ena vakavulici iko: ia na ika talega ni waitui ena vakatusa vei iko.

⁹ O cei me tawa kila ena ka kecega o qori, ni sa cakava na ka o qo na liga i Jiova?

¹⁰ e sa tiko e ligana na nodra cegu na ka kecega sa bula, kei na yagodra na tamata kecega.

¹¹ Sa sega beka ni vakatovolea na vosa na daliga? ka sega beka talega ni tovolea na kena kakana na gusu?

¹² Sa tu na vuku vei ira na qase; kei na yalomatua vei ira sa vuqa na nodra siga.

¹³ Sa tu vei Koya na vuku kei na kaukauwa; sa nona na lewa dina kei na yalomatua.

¹⁴ Raica, sa basuka sobu ko koya, a sa sega e tara tale: sa sogolatia na tamata, a sa sega e dolava.

¹⁵ Raica, sa tarova na wai, a sa di: sa vakatauca mai, a sa laʼki luvuci vuravura.

¹⁶ Sa tu vei koya na kaukauwa kei na vuku: sa nona ko koya sa vakacalai kei koya sa vakacala.

¹⁷ Sa kauti ira vakabobula tani na daubose, a sa vakasesei ira na dauveilewai.

¹⁸ Sa sereka na nodrai vesu na tui, a sa vauca na tolodra e nai vau.

¹⁹ Sa kauti ira vakabobula tani na turaga, a sa vakabaleti ira na qaqa.

²⁰ Sa vakatakalia na nodra vosa na dau-dina, a sa kauta tani na nodra yalomatua na qase.

²¹ Sa vakaisini ira na turaga, a sa sereka nai vau ni tolodra na qaqa.

²² Sa vakarairaitaka mai na ka titobu mai na butobuto, a sa kauta mai ki na rarama na yaloyalo ni mate.

²³ Sa vakalewevu-qataki ira na veimatanitu, a sa vakarusai ira tale; sa vakalevuya na veimatanitu, a sa vakalailaitaka tale.

²⁴ Sa vakatakalia na nodra yalomatua na turaga ni kai vuravura, a sa vakasesei ira voli e na lekutu sa sega kina na sala.

²⁵ Era vakayayamo voli e na butobuto ka sa sega na rarama, a sa qisi ira me ra yatayata tu me vakataki koya sa mateni.