Jope 11 - AI VOLA TABU

Sa vunauci Jope ko Sofari e na vuku ni nona vakadonui koya, 1-6. Sa tukuna ko koya ni sa ka vakaidina sara na vuku ni Kalou, 7-12; a sa vakarota na veivutuni vei Jope, 13-20.

¹ SA qai vosa ko Sofari na kai Neema, ka kaya,

² Me sega beka ni tabani yani na vosa e vuqa? se na vakadonui beka na tamata dauvosa?

³ me ra tiko lo beka na tamata e na vuku ni nomu lasu? ia me sega beka e vakamaduataki iko ni ko sa ia na veivakaisini?

⁴ ni ko sa kaya, Sa dodonu na noqui vakavuvuli; au sa savasava talega e matamu.

⁵ Ia me vosa mada na Kalou, ka dalaga na tebenigusuna vei iko;

⁶ ka vakatakila vei iko na ka vuku e vuni tu ni sa levu, ka lailai e sa kilai! Mo qai kila ni sa ka lailai e taroga na Kalou vei iko, ka ka levu na nomui valavala ca.

⁷ Ni ko sa vakasaqara, ko na kilai koya rawa beka kina na Kalou? ko na kilai Koya deivaka rawa sa Kaukauwa?

⁸ sa lolovira ko lomalagi; a cava ko kitaka rawa? sa matia ko bulu; a cava ko kila rawa?

⁹ A kenai vakarau sa balavu ka lekaleka ko vuravura, a sa rabailevu ka rabailailai na wasawasa.

¹⁰ Kevaka sa vauca ka sogolatia, ka vakasoqona vata, o cei me tarovi koya?

¹¹ Ni sa kilai ira na tamata lasu; sa kunea talega na caka ca; ia ena sega beka ni vakanananu kina?

¹² Ni sa viaviavuku na tamata lialia, ia ka sa sucu ga me vaka na luve ni asa kila.

¹³ Kevaka ko sa vakarautaka na yalomu, ka dodoka na ligamu vei koya;

¹⁴ kevaka sa tu na ca e ligamu, mo biuta vakayawa, ia me kakua ni tiko nai valavala ca e na nomu veivale.

¹⁵ Ni ko na qai ta cake e na matamu ka tawa tauvi duka; io, ko na tiko dei, ka tawa rere:

¹⁶ ni ko na guilecava na rarawa; ka nanuma me vaka na wai sa lako tani yani:

¹⁷ ia na nomu bula ena uasivi cake e na rarama ni siga levu; o na cila yani, o na tautauvata kei na sabogibogi.

¹⁸ Ia ena dei na lomamu, ni sa namaka na vinaka; ia ko na keli ga, ka koto vinaka sobu.

¹⁹ Ia ko na koto sobu, ka sega e vakarerei iko; a ra na vakamasuti iko na lewe vuqa.

²⁰ Ia ena oca wale na matadra nai valavala ca; ena yali na nodrai drodro, ia na ka era namaka ena vaka na ciba.