Joni 6 - AI VOLA TABU

Sa vakani ira na tamata e le lima na udolu ko Jisu, 1-15. Sa lako voli e na dela ni wai ko Jisu, 16-21. O ira na tamata era muri koya ki Kaperinaumi. A sa vunauci ira ko Jisu me ra gumatua e na ka vakayalo, 22-58. E so vei ira ma nona tisaipeli era sa vosakudrukudru, 59-65. Sa tukuna ko Petero ni sa Luve ni Kalou ko Jisu; a sa tukuna ko Jisu ni sa dua vei iratou sa tamata ca, 66-71.

¹ NI sa oti na veika o qo, sa lako-kosova ko Jisu na wai mai Kalili, mai Tiperia.

² A sa lewe vuqa sara era sa muri koya, ni ra raica na veika-mana sa kitaka ko koya vei ira sa tauvi-mate.

³ A sa cabeta ko Jisu na ulu-ni-vanua, a sa tiko sobu maikina kei iratou na nona tisaipeli.

⁴ A sa voleka na solevu ni lako-sivia era sa dauia na kai Jutia.

⁵ Ni sa qai ta cake na matana ko Jisu, ka raica ni ra sa lewe vuqa sara sa lako mai vua, sa kaya vei Filipo, Edatou na volia maivei na madrai, me ra kania ko ira o qo? (

⁶ A sa kaya na ka o qo me vakatovolei koya: ni sa kila ko koya na ka sa nakita me kitaka.)

⁷ Sa kaya vua ko Filipo, Ena sega ni rauti ira na madrai sa voli e na tola e tolusagavulu, me ra tauyadua vakalailai ga.

⁸ E dua vei iratou na nona tisaipeli, ko Adriu, a taci i Saimoni Petero, sa kaya vei koya,

⁹ Sa tiko eke e dua na gonetagane sa tu vua e lima nai buli madrai parile, kei na ika lalai e rua: ia ka yaga vakacava o qo vei ira na lewe vuqa vakaoqo?

¹⁰ A sa kaya ko Jisu, Vosa vei ira na tamata me ra tiko sobu. Ia ka levu na co e na yasana ko ya. A ra sa tiko sobu na tamata, era sa lewe lima beka na udolu.

¹¹ A sa taura na veibuli madrai ko Jisu, ka vatonaka, ka vota vei iratou na tisaipeli, ia ko iratou na tisaipeli vei ira sa tiko sobu; ka vaka talega kina na ika me rauti ira.

¹² Ia ni ra sa mamau, sa kaya ko koya vei iratou na nona tisaipeli, Soqona vata na tikina lalai sa vo, me kakua ni yali e dua na ka.

¹³ Eratou sa qai soqona vata, ka vakasinaita nai su e tinikarua e na tikina lalai ni buli madrai parile e lima, sa vo vei ira sa kana.

¹⁴ Ia ni ra sa raica na caka-mana sa kitaka ko Jisu, ko ira na tamata, era sa kaya, Sai koya dina o qo na parofita ko ya e dodonu me lako mai ki vuravura.

¹⁵ Ia ni sa kila ko Jisu ni ra sa nakita me lako mai ka tauri koya vakaukauwa me ra bulia me tui, sa lako duadua tale yani ki na ulu-ni-vanua.

¹⁶ Ia ni sa qai yakavi mai, sa lako sobu ko iratou na nona tisaipeli ki na matasawa,

¹⁷ ka vodoka na waqa, ka lako-kosova na wai kivaka ki Kaperinaumi. A sa qai butobuto mai na vanua, a sa sega ni yaco vei iratou ko Jisu.

¹⁸ A sa vakabiau na wai e na vuku ni cagi levu sa liwa.

¹⁹ Ia ni ratou sa voce yani e tolu na maili ka vakacaca, eratou sa raici Jisu ni sa lako voli e na dela ni wai, ka torova na waqa: a ratou sa rere.

²⁰ A sa kaya vei iratou ko koya, Oi au o qo; kakua ni rere.

²¹ Eratou sa qai vinakata me vodo ki na waqa ko koya: a sa qai udu vakasauri na waqa ki na vanua eratou sa lako kina.

²² E na sabogibogi, o ira na lewe vuqa era sa tu e na tai kadua ni wai, ni ra sa raica ni sa sega maikea e dua tani na velovelo, a ya ga ka vodoka ko iratou na nona tisaipeli, a sa sega ni vodo vata ki na velovelo kei iratou na nona tisaipeli ko Jisu, ia ko iratou na nona tisaipeli eratou a soko yani vakai iratou ga; (

²³ ia ka sa lako mai e so tani na velovelo mai Tiperia, sa voleka ki na yasana era a kana madrai kina, ni sa vatonaka oti na Turaga:)

²⁴ ni ra sa raica na lewe vuqa ni sa sega ni tiko maikea ko Jisu, sei iratou na nona tisaipeli, sa vodo ko ira talega ki waqa, ka lako yani ki Kaperinaumi, me vakasaqarai Jisu.

²⁵ Ia ni ra sa kunei koya mai tai kadua ni wai, era sa kaya vua, Vakavuvuli, o sa lako mai kike ninaica?

²⁶ Sa vosa vei ira ko Jisu, ka kaya, E dina, e dina, au sa kaya vei kemudou, Dou sa sega ni vakasaqarai au e na vuku ni dou sa raica na veika-mana, a ya ni dou a kania na veibuli madrai, ka mamau.

²⁷ Dou kakua ni oca me kemudou na kakana sa oti rawa, ia me kemudou ga na kakana sa tu ki na bula tawa mudu, a ya ena solia vei kemudou na Luve ni tamata: ni sai koya sa vakadinadinataka ko na Kalou ko Tamana.

²⁸ Era sa qai kaya vua, A cava me keitou cakava, me keitou kitaka kina na cakacaka sa vinaka vua na Kalou?

²⁹ Sa vosa ko Jisu, ka kaya vei ira, Sai koya o qo na cakacaka sa vinaka vua na Kalou, mo dou vakabauti koya sa tala mai ko koya.

³⁰ Era sa qai kaya vua, A cava nai vakadinadina ko sa cakava, me keitou raica ka vakabauti iko? a cava ko sa kitaka?

³¹ a noda qase era a kania na mana e na veikau; me vaka sa volai, Sa solia vei ira ko koya na madrai mai lomalagi me ra kania.

³² Sa qai kaya vei ira ko Jisu, E dina, e dina, au sa kaya vei kemudou, Sa sega ni ko Mosese sa solia vei kemudou na madrai ko ya mai lomalagi; a ya ga ko Tamaqu sa solia vei kemudou na madrai dina mai lomalagi.

³³ Ni sai koya o qo na madrai mai na Kalou, ko koya sa lako sobu mai lomalagi, a sa solia na bula vei ira na kai vuravura.

³⁴ Era sa qai kaya vua, Turaga, solia tikoga mai vei keimami na madrai o qo.

³⁵ A sa kaya vei ira ko Jisu, Oi au na madrai ni bula: o koya sa lako mai vei au, ena sega ni viakana; ia ko koya sa vakabauti au, ena sega ni viagunu tale.

³⁶ Ia kaʼu a kaya vei kemudou, Dou a raici au, ia dou a sega ni vakabauta.

³⁷ O ira kecega sa solia mai vei au ko Tamaqu, era na lako mai vei au: ia ko koya ena lako mai vei au, au na sega sara ni biuta tani.

³⁸ Niʼu sa sega ni lako sobu mai lomalagi meʼu kitaka na lomaqu, a ya ga na loma i koya sa talai au mai.

³⁹ Ia sai koya o qo na loma i Tamaqu sa talai au mai, meʼu kakua ni vakayalia e dua vei ira sa solia mai vei au ko koya, ka meʼu vakatura cake tale e na siga maimuri.

⁴⁰ Ia sai koya o qo na loma i koya sa talai au mai, me ra rawata yadua na bula tawa mudu ko ira sa raica na Luvena, ka vakabauti koya; ia kaʼu na vakaturi koya cake e na siga maimuri.

⁴¹ Sa qai vosakudrukudrutaki koya ko ira na kai Jutia, e na vuku ni sa kaya, Oi au na madrai sa lako sobu mai lomalagi.

⁴² A ra sa kaya, Sa sega li ni ko Jisu ko koya o qo, a luve i Josefa, a tamana kei na tinana eda kila? sa qai kaya vakacava mai ko koya, Au sa lako sobu mai lomalagi?

⁴³ O koya o qo sa vosa kina ko Jisu, ka kaya vei ira, Dou kakua ni vosakudrukudru.

⁴⁴ E sega ni lako rawa mai vei au e dua na tamata, kevaka sa sega ni yarataki koya ko Tamaqu sa talai au mai: ia kaʼu na vakaturi koya cake e na siga maimuri.

⁴⁵ Sa vola na parofita e so, Ena vakavulici ira kecega na Kalou. A ra sa lako mai kina vei au ko ira yadua era sa rogoci Tamaqu, ka sa vakavulici.

⁴⁶ Ia ka sega ni raici Tamaqu e dua na tamata; o koya duaduaga sa lako mai na Kalou, sa raici Tamaqu ko koya.

⁴⁷ E dina, e dina, au sa kaya vei kemudou, O koya sa vakabauti au sa rawata na bula tawa mudu.

⁴⁸ Oi au na madrai ko ya ni bula.

⁴⁹ Sa kania na mana mai na veikau ko ira na nomudou qase, a ra sa mate ga.

⁵⁰ Sai koya o qo na madrai, sa lako sobu mai lomalagi, me ra kania na tamata, ka sega ni mate.

⁵¹ Oi au na madrai bula sa lako sobu mai lomalagi; kevaka sa dua e kania na madrai o qo, ena bula tawa mudu: ia na madrai kaʼu na solia sa lewequ, a ya kaʼu na solia me bula kina ko ira na kai vuravura.

⁵² Era sa qai veileti vakai ira na kai Jutia, ka kaya, Sa solia rawa vakaevei na tamata o qo na lewena me da kania?

⁵³ Sa qai kaya vei ira ko Jisu, E dina, e dina, au sa kaya vei kemudou, Kevaka dou sa sega ni kania na lewe ni Luve ni tamata, ka gunuva na nona dra, sa sega vei kemudou na bula.

⁵⁴ 0 koya sa kania na lewequ, ka gunuva na noqu dra, sa rawata na bula tawa mudu; ia kaʼu na vakaturi koya cake e na siga maimuri.

⁵⁵ Ni sa kakana dina na lewequ, a sa ka-ni-gunu dina na noqu dra.

⁵⁶ O koya sa kania na lewequ, ka gunuva na noqu dra, sa tu vei au, koi au talega vei koya.

⁵⁷ Me vaka sa bula tiko ko Tamaqu sa talai au mai, au sa bula talega e na vuku i Tamaqu; sa vaka talega kina ko koya sa kani au, ena bula e na vukuqu.

⁵⁸ Sai koya o qo na madrai sa lako sobu mai lomalagi: sa sega ni tautauvata kei na mana sa kania ko ira na nomudou qase, a ra sa mate ga: o koya sa kania na madrai o qo, ena bula tawa mudu.

⁵⁹ Sa vosataka na veika o qo ko koya e na vale ni lotu, ni sa vakatavuvuli tiko mai Kaperinaumi.

⁶⁰ Era lewe vuqa vei ira na nona tisaipeli ni ra rogoca, era sa kaya, A vosa dredre o qo: o cei sa rogoca rawa?

⁶¹ Ia ni sa kila ko Jisu e na lomana, ni ra sa vosakudrukudru na nona tisaipeli e na vuku ni ka o qori, sa kaya vei ira, Sa vakatarabetaki kemudou na ka o qo, ne?

⁶² Ia dou na raica beka na Luve ni tamata ni sa lako cake ki na tikina ka tiko kina eliu.

⁶³ Na kena vakayalo sa solia na bula: na kena vakalewena sa sega ni yaga: a vosa kaʼu sa vosataka vei kemudou sa vakayalo, a sa vu-ni-bula.

⁶⁴ Ia sa so vei kemudou sa sega ni vakabauta. Ni sa kilai ira mai nai vakatekivu ko Jisu era sa sega ni vakabauti koya, kei koya ena soli koya yani.

⁶⁵ A sa kaya, O koya o qo kaʼu a kaya kina vei kemudou, Sa sega e dua na tamata sa lako rawa mai vei au, kevaka sa sega ni solia vua ko Tamaqu.

⁶⁶ Mai na siga ko ya e le vuqa vei ira na nona tisaipeli era sa suka tani, a ra sa sega tale ni lako vata kaya.

⁶⁷ Sa qai kaya ko Jisu vei iratou na tinikarua, Dou sa via lako tani beka koi kemudou talega?

⁶⁸ Sa qai kaya vua ko Saimoni Petero, Turaga, keitou na lako vei cei? sa tu ga vei iko na vosa ni bula tawa mudu:

⁶⁹ ia keitou sa vakabauta ka kila, ni sai Karisito ko iko, na Luve ni Kalou bula.

⁷⁰ Sa kaya vei iratou ko Jisu, Au a sega li ni digitaki kemudou na lewe tinikarua, ia ka sa dua vei kemudou sa nonai to na tevoro?

⁷¹ Sa vosataki Juta Isikarioti, na luve i Saimoni, ni sai koya o qo ena soli koya yani, a sa dua vei iratou na tinikarua ko koya.