Joni 5 - AI VOLA TABU

Sa lako ki Jerusalemi ko Jisu, a sa vakabula e dua na tamata sa tauvi-mate, 1-9. O ira na kai Jutia era sa vakacacani Jisu, ka via vakamatei koya, 10-16. Sa vakatakila vei ira ko Jisu ni ka talai koya mai ko na Kalou, 17-39. Sa vunauci ira talega ni ra sa bese ni vakadinata na nona vosa, 40-47.

¹ NI sa oti na veika o qo sa dua na nodra solevu na kai Jutia; a sa lako cake ki Jerusalemi ko Jisu.

² Ia ka sa tu mai Jerusalemi e dua nai silisili e voleka ki na matamata-ni-koro ni sipi, a yacana e na vosa vaka-Iperiu ko Pecesita, a sa lima na kena vale.

³ Sa le vuqa era tauvi-mate sa davo kina, o ira na mataboko, na lokiloki, na wamalai, era sa wawa me vakayavalati mada na wai.

⁴ Ni sa lako sobu mai e dua na agilose e na gauna e so ki nai silisili, ka vakayavalata na wai: ia ko koya sa sobu kina eliu ni sa vakayavalati na wai, sa bula mai na mate kecega sa tauvi koya.

⁵ A sa toka maikina e dua na tamata, sa mate tu ka yabaki tolusagavulu ka mani walu.

⁶ Ni sa raici koya ko Jisu ni sa davo, ka kila ni sa dede, sa kaya vua, O sa via bula, se segai?

⁷ Sa kaya vua ko koya sa tauvi-mate, Sa sega, saka, e dua na noqu tamata me kauti au ki nai silisili, ni sa vakayavalati na wai; ia niʼu sa lako tikoga, sa liu sobu vei au e dua tani.

⁸ Sa kaya vua ko Jisu, Tu cake, taura cake na nomui mocemoce, ka lako.

⁹ A sa bula vinaka vakasauri mai na tamata, ka taura cake na nonai mocemoce, ka lako: ia na siga ko ya na siga ni vakacecegu.

¹⁰ O koya o qo era sa kaya kina na kai Jutia vei koya sa vakabulai, A siga ni vakacecegu o qo: sa sega ni tara vei iko mo colata nai mocemoce.

¹¹ Sa kaya vei ira ko koya, O koya sa vakabulai au, sa kaya vei au ko koya, Taura cake na nomui mocemoce, ka lako.

¹² A ra sa qai tarogi koya, O cei na tamata sa kaya vei iko, Taura cake na nomui mocemoce, ka lako?

¹³ Ia ko koya sa vakabulai, sa sega ni kila se ko cei ko koya; ni sa lako lo yani ko Jisu, ni sa lewe vuqa e na tikina ko ya.

¹⁴ Ni sa oti na veika o qo sa kunei koya ko Jisu e na vale ni soro, ka kaya vua, Raica, o sa qai bula vinaka; kakua ni valavala ca tale, de yaco mai vei iko e dua na ka e ca vakalevu cake.

¹⁵ Sa lako tani na tamata, a sa tukuna vei ira na kai Jutia ni sai Jisu sa vakabulai koya.

¹⁶ Ia e na vuku ni ka o qo sa vakacacani Jisu kina ko ira na kai Jutia, ka gadreva me ra vakamatei koya, ni sa kitaka ko koya na veika o qo e na siga ni vakacecegu.

¹⁷ A sa kaya vei ira ko Jisu, Sa cakacaka tikoga ko Tamaqu, koi au talega, au sa cakacaka.

¹⁸ E na vuku ni ka o qo era sa gadreva vakalevu kina na kai Jutia me ra vakamatea, ni sa sega ni vakacacana walega ko koya na siga ni vakacecegu, ia ka sa kaya talega ni sa Tamana na Kalou, a sa vakatauvatani koya kina kei na Kalou.

¹⁹ Sa qai vosa ko Jisu, ka kaya vei ira, E dina, e dina, au sa kaya vei kemudou, E sega ni rawai a vakai koya ga e dua na ka na Luvena, ia na ka ga sa raica ni sa kitaka ko Tamana; ia na veika sa kitaka ko koya, sa kitaka o qo na Luvena talega.

²⁰ Ni sa lomana na Luvena ko Tamana, a sa vakatakila vua na ka kecega sa kitaka ko koya; ia ena vakaraitaka vua na cakacaka e so sa uasivi cake e na veika o qo, mo dou kurabui kina.

²¹ Me vaka sa vakaturi ira cake na mate ko Tamana, ka vakabula, sa vakabula vakakina ko na Luvena me vaka na nona veitalia.

²² Ni sa sega ni lewa e dua na tamata ko Tamana, ia ka sa lesia na Luvena me ia na lewa kecega;

²³ me ra vakarokorokotaka na Luvena na tamata kecega, me vaka era sa vakarokorokotaki Tamana. O koya sa sega ni vakarokorokotaka na Luvena, sa sega ni vakarokorokotaki Tamana sa talai koya mai.

²⁴ E dina, e dina, au sa kaya vei kemudou, O koya sa rogoca na noqu vosa, ka vakabauti koya sa talai au mai, sa rawata na bula tawa mudu, ena sega talega ni cudruvi; ia ka sa lako tani mai na mate ki na bula.

²⁵ E dina, e dina, au sa kaya vei kemudou, Sa lako mai na gauna, a sa yaco edaidai, me ra na rogoca na domo ni Luve ni Kalou ko ira na mate: ia ko ira sa rogoca era na bula.

²⁶ Me vaka sa bula vakai koya ga ko Tamana; sa solia talega vua na Luvena me bula vakai koya ga:

²⁷ a sa lesi koya talega me ia na lewa, e na vuku ni sa Luve ni tamata.

²⁸ Dou kakua ni kurabui e na ka o qo: ni sa lako mai na gauna era na rogoca kina na domona ko ira kecega e nai bulubulu,

²⁹ a ra na lako maikina; o ira sai valavala vinaka, era na tu cake tale me ra bula; ia ko ira sai valavala ca, era na tu cake tale me ra cudruvi.

³⁰ Au sa sega ni kitaka rawa e dua na ka vakai au ga: au sa lewa me vaka na ka kaʼu sa rogoca: a sa dodonu na noqu lewa; niʼu sa sega ni muria na noqu veitalia, a veitalia i Tamaqu ga o koya sa talai au mai.

³¹ Kevaka sai au sa tukuni au, sa sega ni dina na noqui tukutuku.

³² Sa dua tani sa tukuni au, ia kaʼu sa kila ni sa dina nai tukutuku sa tukuni au kina ko koya.

³³ Dou a talaki vei Joni, a sa tukuna na ka dina ko koya.

³⁴ Ia ka sa sega ni yaga vei au me ra tukuni au na tamata: ia kaʼu sa kaya ga na veika o qo, mo dou bula kina.

³⁵ Ko koya o qori na rarama sa caudre tu ka cila mai; ia dou a vinakata vakadede vakalailai ga mo dou reki e na kena rarama.

³⁶ Ia nai tukutuku kaʼu sa tukuni kina sa levu, ka lailai na nona ko Joni: a cakacaka sa solia mai vei au ko Tamaqu meʼu vakaotia, a cakacaka o qo kaʼu sa kitaka tiko, sa tukuni au, ni sa talai au mai ko Tamaqu.

³⁷ Ia ko Tamaqu, o koya sa talai au mai, sa dautukuni au. Dou a sega ni rogoca na domona e na dua na siga, se raica na nonai tovo.

³⁸ A sa sega ni tiko e na lomamudou na nona vosa; ni dou sa sega ni vakabauti koya sa tala mai ko koya.

³⁹ Dou sa vakasaqaqara e nai Vola; ni dou sa nanuma dou sa rawata kina na bula tawa mudu: ia ko ira o qo sa tukuni au.

⁴⁰ Ia dou sa bese ni lako mai vei au, mo dou rawata kina na bula.

⁴¹ Sa sega ni yaga vei au me ra vakarokorokotaki au ko ira na tamata.

⁴² Ia kaʼu sa kilai kemudou, ni sa sega ni tiko e na lomamudou na loloma vua na Kalou.

⁴³ Au sa lako mai e na yaca i Tamaqu, ia dou sa sega ni vakabauti au: kevaka sa lako mai e dua tani e na yacana walega, dou na vakabauti koya.

⁴⁴ Dou sa vakabauta rawa vakaevei, ni dou sa veivakarokorokotaki tiko vakai kemudou, ka sega ni gadreva na vakarokoroko sa lako mai vua na Kalou duaduaga?

⁴⁵ Dou kakua ni nanuma niʼu na beitaki kemudou vei Tamaqu; sa dua sa beitaki kemudou tiko, ko Mosese, o koya dou sa vakararavi kina.

⁴⁶ Kevaka dou a vakabauti Mosese, dou na vakabauti au: ni sa volai au ko koya.

⁴⁷ Ia kevaka dou sa sega ni vakadinata na nonai vola, dou na vakadinata vakaevei na noqu vosa?