Joni 21 - AI VOLA TABU

Sa rairai tale vei iratou na nona tisaipeli ko Jisu, a sa kana vata kei iratou, 1-14. Sa vakarota matua vei Petero me vakani ira na nona lami kei ira na nona sipi, 15-17; a sa tukuna na mate i Petero, 18, 19. Sa vunauci Petero ni sa tarogi koya e na vuku i Joni, 20-24. Na kenai vakataotioti, 25.

¹ NI sa oti na veika o qo, sa vakaraitaki koya tale ko Jisu vei iratou na tisaipeli mai na wai mai Tiperia: ia ka vakaraitaki koya vakaoqo:

² Eratou sa tiko vata ko Saimoni Petero, kei Tomasi, sa vakatokai ko Titimo, kei Nacanieli na kai Kena e Kalili, kei rau na luve i Sepeteo, kei na nona tisaipeli e lewe rua tale.

³ Sa kaya vei iratou ko Saimoni Petero, Au sa laʼki qoli. Eratou sa kaya vua, Edatou na lako talega kei iko. Eratou sa lako yani, ka vodoka vakasauri na waqa; a sa sega e rawa e na bogi ko ya.

⁴ Ia ni sa qai mataka mai, sa tu e na matasawa ko Jisu; ia sa sega ni kila ko iratou na tisaipeli ni sai Jisu.

⁵ Sa qai kaya vei iratou ko Jisu, Ragone, sa tu vei kemudou na kakana, se segai? Eratou sa kaya vua, Sa segai.

⁶ A sa kaya vei iratou ko koya, Dou viritaka na lawa ki na yasana i matau ni waqa, ka dou na kunea kina. Eratou sa qai viritaka, a ratou sa qai sega ni yavia rawa, ni sa vuqa sara na ika.

⁷ A ka o qo sa kaya kina vei Petero ko na tisaipeli ko ya, o koya sa lomana ko Jisu, O qori na Turaga. Ni sa rogoca ko Saimoni Petero ni sai koya na Turaga, sa vakasulumi koya e na nonai curucuru vagonedau, (ni sa luvawale,) a sa rika ki wai.

⁸ Ia ko iratou na tisaipeli tani, eratou sa lako e na waqa lailai; (ni sa sega ni yawa na vanua, me vaka ga na katu e limasagavulu,) a ratou sa yarataka na lawa sa sinai e na ika.

⁹ Ia ni ratou sa qai sobu ki vanua, eratou sa raica ni sa tu na qilaiso sa waqa tu, kei na ika sa tu kina, kei na madrai.

¹⁰ Sa kaya vei iratou ko Jisu, Kauta mai e so na ika dou sa qai rawata.

¹¹ Sa lako cake ko Saimoni Petero, ka yavia na lawa ki vanua sa sinai e na ika lelevu, e dua na drau ka limasagavulu ka mani tolu: ia ni sa vuqa vakaoqo, sa sega ni bote kina na lawa.

¹² Sa kaya vei iratou ko Jisu, Mai kana. Ia sa sega e dua vei iratou na tisaipeli sa doudou me tarogi koya, O cei ko iko? ni ratou sa kila ni sai koya na Turaga.

¹³ Sa qai lako mai ko Jisu, ka kauta na madrai, kei na ika talega, ka solia vei iratou.

¹⁴ Sai koya o qo na kenai katolu ni gauna sa vakaraitaki koya kina ko Jisu vei iratou na nona tisaipeli, ni sa tu cake tale mai na mate ko koya.

¹⁵ Ni ra sa qai kana oti, sa kaya ko Jisu vei Saimoni Petero, Saimoni, a luve i Jona, o sa lomani au vakalevu, ka vakalailai ko iratou o qo, se segai? Sa kaya vua ko koya, Io, Turaga; o sa kila niʼu sa lomani iko. Sa kaya vua ko koya, Vakani ira na noqu lami.

¹⁶ Sa kaya tale vakarua vei koya, Saimoni, a luve i Jona, o sa lomani au, se segai? Sa kaya vua ko koya, Io, Turaga; o sa kila niʼu sa lomani iko. Sa kaya vua ko koya, Maroroi ira na noqu sipi.

¹⁷ A sa kaya vakatolu vua, Saimoni, a luve i Jona, o sa lomani au, se segai? Sa rarawa na loma i Petero e na vuku ni sa kaya vakatolu vua ko koya, O sa lomani au, se segai? A sa kaya vua, Turaga, o sa kila na ka kecega; o sa kila niʼu sa lomani iko. Sa kaya vua ko Jisu, Vakani ira na noqu sipi.

¹⁸ E dina, e dina, au sa kaya vei iko, Ni ko a gone, ko a dauvauci iko, ka lako veitalia voli ga: ia ni ko na qase mai, ko na dodoka na ligamu, ka na vauci iko e dua tani, ka kauti iko ki na tikina ko na sega ni vinakata.

¹⁹ Ia sa vosa vakaoqo ko koya, me vakatakila na mate ena vakarokorokotaka kina na Kalou ko koya. Ia ni sa vosa oti vakaoqo ko koya, sa kaya vua, Muri au.

²⁰ Sa qai vuki ko Petero, ka raica na tisaipeli sa lomana ko Jisu, ni sa muri, o koya ka vakararavi talega ki na lomaserena e nai vakayakavi, ka kaya, Turaga, o cei ko koya ena soli iko yani?

²¹ Ni sa raici koya ko Petero, sa kaya vei Jisu, Turaga, ena vakaevei ko koya o qo?

²² Sa kaya vua ko Jisu, Kevaka kaʼu sa vinakata me bula tikoga ko koya ka yacova na siga kaʼu na lako tale mai kina, a cava o qori vei iko? o iko, mo muri au.

²³ Sa qai rogo yani vei ira na veiwekani na vosa o qo, ni na sega ni mate na tisaipeli ko ya: ia ka sega ni kaya vua ko Jisu, Ena sega ni mate ko koya: a ya ga, Kevaka kaʼu vinakata me bula tikoga ko koya ka yacova na siga kaʼu na lako tale mai kina, a cava o qo vei iko?

²⁴ Sai koya o qo na tisaipeli sa tukuna na veika o qo, ka vola na veika o qo: ia eda sa kila ni sa dina na nonai tukutuku.

²⁵ SA vuqa talega na ka tani sa cakava ko Jisu, ia kevaka sa volai kecega, au sa vakasama ni na oso ko vuravura e na veivola ena volai. Emeni.