Joni 17 - AI VOLA TABU

Sa masuti Tamana ko Jisu me vakarokorokotaki koya, 1-5. Sa masulaki iratou na nona tisaipeli, 6-19. Sa masulaki ira kecega era na vakabauti koya, 20-26.

¹ SA vosataka na vosa o qo ko Jisu, ka ta cake na matana ki lomalagi, ka kaya, Tamaqu, sa yaco mai na gauna: vakarokorokotaka na Luvemu, me vakarokorokotaki iko talega na Luvemu:

² me vaka ko sa solia vua me veitaliataki ira na tamata kecega, me solia ko koya na bula tawa mudu vei ira yadua ko sa solia vua.

³ Ia sai koya o qo na bula tawa mudu, me ra kilai iko na Kalou dina duaduaga, kei Jisu Karisito ko koya ko a tala mai.

⁴ Au sa vakarokorokotaki iko e vuravura: au sa vakaotia na cakacaka ko a solia mai vei au meʼu kitaka.

⁵ Ia o qo, Tamaqu, vakarokorokotaki au me daru tiko vata, e na vakarokoroko sa tu vei au ni daru a tiko vata ni sa sega ni caka ko vuravura.

⁶ Au sa vakatakila na yacamu vei ira na tamata ko sa solia mai vei au mai vuravura: era sa nomu, ia ko sa soli ira mai vei au: a ra sa talairawarawa ki na nomu vosa.

⁷ Era sa qai kila ni sa taka maivei iko na ka kecega ko sa solia mai vei au:

⁸ niʼu sa solia vei ira na vosa ko a solia mai vei au; a ra sa vakabauta, ka kila dina niʼu sa lako maivei iko, ka ra sa vakadinata ni ko a talai au mai.

⁹ Au sa masulaki ira: au sa sega ni masulaki vuravura, o ira ga ko sa solia maivei au; ni ra sa nomu.

¹⁰ A sa nomu na noqu ka kece, a sa noqu na nomu ka kece; ia kaʼu sa vakarokorokotaki e na vukudra.

¹¹ Ia kaʼu na sega ni tiko e vuravura, ia ko ira o qo, era sa tiko e vuravura, ia koi au, kaʼu sa lako yani vei iko. Tamaqu yalododonu, maroroi ira e na yacamu, ko ira ko a solia mai vei au, me ra dua bauga me vakataki kedaru.

¹² Niʼu a tiko vata kei ira e vuravura, au a daumaroroi ira e na yacamu: o ira ko sa solia mai vei au kaʼu sa maroroya, a sa sega ni yali e dua vei ira, o koya ga sa yaga me rusa; me vakayacori kina nai Vola.

¹³ Au sa qai lako yani vei iko: ia na veika o qo kaʼu sa vosataka e vuravura, me levu sara na nodra marau e na vukuqu.

¹⁴ Au sa solia vei ira na nomu vosa; a sa cati ira ko vuravura, e na vuku ni ri sa sega ni vakavuravura, me vaka kaʼu sa sega ni vakavuravura.

¹⁵ Au sa sega ni masu mo kauti ira tani e vuravura, a ya ga mo maroroi ira mai na vu-ni-ca.

¹⁶ Era sa sega ni vakavuravura, me vaka kaʼu sa sega ni vakavuravura.

¹⁷ Vakatabui ira e na nomui vakavuvuli dina: sa ka dina na nomu vosa.

¹⁸ Me vaka ko a talai au ki vuravura, au sa talai ira vaka talega kina ki vuravura.

¹⁹ Ia kaʼu sa vakatabui au e na vukudra, me ra vakatabui talega e nai vaka-vuli dina.

²⁰ Ia kaʼu sa sega ni masu e na vukudra walega o qo, ia e na vukudra talega era na vakabauti au e na vuku ni nodra vosa:

²¹ me ra dua bau kecega; me vaka edaru sa dua bau, Tamaqu, me ra dua bau kei kedaru: me vakadinata ko vuravura ni ko sa talai au mai.

²² Ia na vakarokoroko ko a solia mai vei au, kaʼu sa solia vei ira; me ra dua bau, me vaka edaru sa dua bau:

²³ meʼu tu vei ira, ka mo tu vei au, me ra qisi sara me ra dua bauga; ia me kila kina ko vuravura ni ko sa talai au mai, ka sa lomani ira me vaka ko sa lomani au.

²⁴ Tamaqu, au sa vinakata me ra tiko talega kei au e na vanua kaʼu sa tiko kina, o ira ko sa solia mai vei au; me ra raica na noqu serau ko a solia mai vei au: ni ko a lomani au ni sa sega ni tekivu ko vuravura.

²⁵ Tamaqu yalododonu, sa sega ni kilai iko ko vuravura: ia kaʼu sa kilai iko, a ra sa kila ko ira o qo ni ko sa talai au mai.

²⁶ Ia kaʼu sa vakatakila vei ira na yacamu, ia kaʼu na vakatakila tiko: me tu vei ira na loloma ko a lomani au kina, meʼu tiko talega kei ira.