Joni 11 - AI VOLA TABU

Sa vakaturi Lasaro cake tale mai na mate ko Jisu, 1-44. Era sa lewe vuqa na kai Jutia sa vakabauta, 45, 46. Sa bosei Jisu ko ira na bete levu kei ira na Farisi, ka sa vuni koya ko Jisu, 47-54. Era sa vakasaqarai koya me vakamatea, 55-57.

¹ IA sa dua na tamata sa tauvi-mate, ko Lasaro, na kai Pecania, a nodrau koro ko Meri kei Marica na tuakana. (

² Ia ko Meri o qo sa lumuta na Turaga e na waiwai, ka solota na yavana e na drau ni uluna, a sa tauvi-mate na ganena ko Lasaro.)

³ O koya sa talaki kina koi rau na ganena vei koya, ka kaya, Turaga, raica, ko koya ko sa lomana sa tauvi-mate.

⁴ Ia ni sa rogoca ko Jisu, sa kaya, Ena sega ni ciba ko koya e na mate o qo, ia ena vakarokorokotaki kina na Kalou, ena vakarokorokotaki talega kina na Luve ni Kalou.

⁵ A sa daulomani Marica ko Jisu, kei tacina, kei Lasaro.

⁶ Ni sa qai rogoca ko koya ni sa tauvi-mate ko koya o qori, sa tiko tale ka bogi rua e na tikina ko ya.

⁷ Ni sa oti o qo sa qai kaya vei iratou na tisaipeli, Me datou lako tale ki Jutia.

⁸ Sa kaya vua ko iratou na tisaipeli, Vakavuvuli, era a via viriki iko edaidai walega e na vatu ko ira na kai Jutia; ia ko sa baki lako tale ki na tikina ko ya?

⁹ Sa kaya ko Jisu, Sa sega li ni tinikarua na tikina e na siga? kevaka sa lako e dua e na siga, sa sega ni tarabe ko koya, e na vuku ni sa raica na rarama kei vuravura o qo:

¹⁰ ia kevaka sa lako e dua e na bogi, sa tarabe ko koya e na vuku ni sa sega ni tu vei koya na rarama.

¹¹ Sa vosataka na ka o qo ko koya: ia ka oti sa qai kaya vei iratou, Sa moce na wekadatou ko Lasaro; ia kaʼu sa lako meʼu vakayadrati koya.

¹² Sa qai kaya ko iratou na nona tisaipeli, Turaga, kevaka sa moce ga ko koya, ena bula.

¹³ Ia ka sa vosataka na nona mate ko Jisu: ia eratou sa nanuma ni sa vosataka ko koya na vakacegu ni moce.

¹⁴ Sa qai tukuna vakavinaka vei iratou ko Jisu, Sa mate ko Lasaro:

¹⁵ ia kaʼu sa reki e na vukumudou niʼu a sega ni tiko kina, mo dou vakabauta; ia me datou lako ga vua.

¹⁶ Sa qai kaya ko Tomasi, o koya sa vakatokai ko Titimo, vei iratou na kenai caba na tisaipeli, Me datou lako talega, me datou mate vata kaya.

¹⁷ Ni sa qai lako mai ko Jisu, sa kunea ni sa qai bogi va koto ko koya e nai bulubulu.

¹⁸ A sa voleka ki Jerusalemi ko Pecania, a kena vakayawa e rua beka na maili.

¹⁹ Ia sa lewe vuqa na kai Jutia era a lako mai vei Marica kei Meri, me ra vakalecataki rau e na vuku ni ganedrau.

²⁰ Ni sa qai rogoca ko Marica ni sa lako mai ko Jisu, sa laʼki tavaki koya: a sa tiko ga ko Meri e na vale.

²¹ Sa qai kaya ko Marica vei Jisu, Turaga, kevaka ko a tiko eke, sa sega ni ciba na ganequ:

²² ia kaʼu sa kila ni na solia vei iko edaidai ko na Kalou na ka kecega ko na kerea vua na Kalou.

²³ Sa kaya vua ko Jisu, Ena tu cake tale na ganemu.

²⁴ Sa kaya vua ko Marica, Au sa kila ni na tu cake tale ko koya e na siga maimuri era na tu cake tale kina na tamata.

²⁵ Sa kaya vua ko Jisu, Oi au na vu ni tu cake tale, kei na vu-ni-bula: o koya sa vakabauti au, kevaka sa mate, ena bula ga:

²⁶ ia ko koya yadua sa bula ka vakabauti au, ena sega sara ni mate. O sa vakadinata na ka o qo, se segai?

²⁷ Sa kaya vua ko koya, Io, Turaga: au sa vakadinata ni sai Karisito ko iko, na Luve ni Kalou, o koya sa dodonu me lako mai ki vuravura.

²⁸ Ia ni sa vosa vakaoqo ko koya, sa lako yani, ka kaciva lo na tacina ko Meri, ka kaya, Sa lako mai nai Vakavuvuli, a sa kacivi iko.

²⁹ Ni sa qai rogoca ko koya, sa tu cake sara, ka lako yani vua. (

³⁰ A sa bera ni curu ki na koro ko Jisu, a sa tiko ga e na vanua erau sa veitata kina kei Marica.)

³¹ O ira na kai Jutia era sa tiko vata kei Meri e na vale, ka vakalecataki koya, ni ra sa raica ni sa tu cake sara ko koya, ka lako yani, era sa muri koya, ka kaya, Sa lako ki nai bulubulu ko koya me tagi maikea.

³² Ni sa qai tadu mai ko Meri ki na vanua sa tiko kina ko Jisu, ka raici koya, sa bale sobu ki na yavana, ka kaya vua, Turaga, kevaka ko a tiko eke, sa sega ni ciba na ganequ.

³³ Ni sa qai raica ko Jisu na nona tagi, kei na nodra tagi na kai Jutia era sa lako vata kaya mai, sa vutugu ko koya e na yalona, a sa rarawa na lomana,

³⁴ ka kaya, Evei na vanua dou a vakotori koya kina? Era sa kaya vua, Turaga, lako mai ka raica.

³⁵ Sa tagi ko Jisu.

³⁶ Era sa qai kaya na kai Jutia, Raica na kena levu ni nona loloma vei koya!

³⁷ Ia e so vei ira sa kaya, Sa sega beka ni rawata ko koya o qo, o koya sa basuka na mata ni mataboko, me qisia talega na tamata o qo me kakua ni mate?

³⁸ Sa qai vutugu tale e na yalona ko Jisu, ka lako mai ki nai bulubulu. Ia sa qara-vatu o qo, ka sa kenai sogo e dua na vatu.

³⁹ Sa kaya ko Jisu, Dou kauta tani na vatu. Sa kaya vua ko Marica, a gane i koya sa mate, Turaga, sa qai bona ko koya: ni sa qai bogi va.

⁴⁰ Sa kaya vua ko Jisu, Au a sega li ni kaya vei iko, ni ko na raica na kaukauwa ni Kalou, kevaka ko sa vakabauta?

⁴¹ Era sa qai kauta tani na vatu mai na tikina sa koto kina na mate. A sa ta cake ko Jisu na matana, ka kaya, Tamaqu, au sa vakavinavinaka vei iko ni ko a rogoci au mai:

⁴² ia kaʼu sa kila ni ko sa rogoci au tikoga: ia kaʼu sa vosa e na vukudra na tamata sa tiko eke, me ra vakadinata ni ko sa talai au mai.

⁴³ Ia ni sa vosa oti vakaoqo, sa kaci e na domo levu, Lasaro, lako mai.

⁴⁴ Ia ko koya ka mate sa lako mai, ka viviraki tu na ligana kei na yavana e nai sulu ni bulu: ka viviraki e na uluna e dua nai tavoi. Sa kaya vei ira ko Jisu, Dou sereki koya, ka biuta me lako.

⁴⁵ A ra sa lewe vuqa vei ira na kai Jutia sa lako mai kei Meri, ni ra sa raica na ka sa kitaka ko Jisu, era sa vakabauti kova.

⁴⁶ Ia ko ira e so sa lako yani vei ira na Farisi, ka tukuna vei ira na ka sa cakava ko Jisu.

⁴⁷ Sa qai soqoni vata ko ira na bete levu kei ira na Farisi me ra bosea, a ra sa kaya, A cava mada me da kitaka? ni sa cakava na caka-mana e vuqa na tamata o qo.

⁴⁸ Kevaka eda sa biuti koya vakaoqo, era na vakabauti koya na tamata kecega: era na qai lako mai na kai Roma, ka vaqeavutaka na noda koro kei na noda matanitu.

⁴⁹ A sa dua vei ira, ko Kaiafa, o koya sa bete levu e na yabaki ko ya, sa kaya vei ira, Dou sa sega ni kila e dua na ka,

⁵⁰ se vakananuma ni sa yaga vei keda mo mate e dua na tamata e na vukudra na tamata, ka me kakua ni rusa na matanitu taucoko.

⁵¹ A sa sega ni vosataka na ka o qo ko koya vakai koya: ia ni sa bete levu e na yabaki ko ya, sa vakatakila ko koya ni na mate ko Jisu e na vuku ni matanitu ko ya;

⁵² ka sega e na vuku ni matanitu ko ya duaduaga, a ya talega me vakasoqoni ira vata na luve ni Kalou sa duiveiseyaki me ra dua bau.

⁵³ Mai na siga ko ya era sa qai bosei koya me ra vakamatea.

⁵⁴ 0 koya o qo sa sega kina ni lako votu tale ko Jisu e na kedra maliwa na kai Jutia; a sa lako yani maikea ki na vanua sa voleka ki na veikau, ki na dua na koro na yacana ko Ifireimi, a sa tiko kina kei iratou na nona tisaipeli.

⁵⁵ A sa voleka na nodra solevu ni lako-sivia na kai Jutia: a ra sa lewe vuqa sa lako cake ki Jerusalemi, mai na yasana kisau, ni sa bera na solevu ni lako-sivia, me ra vakasavasavataki ira.

⁵⁶ A ra sa qai vakasaqarai Jisu, ka veivosaki vakai ira ga, ni ra sa tu e na vale ni soro, A cava dou vakananuma? ena lako mai ko koya ki na solevu, se segai?

⁵⁷ Ia sa vakarota ko ira na bete levu kei ira na Farisi, kevaka e dua sa kila na vanua sa tiko kina ko koya, me tukuna mai, me ra mai taura.