Isikeli 44 - AI VOLA TABU

A matamata-ni-koro ki cake me sa nona ga na turaga, 1-3. Sa ra vunauci na bete e na vuku ni nodra vakadukadukalitaka na vale tabu, 4-8. O ira sa ra qarava na kalou lasu sa ra tabu ni ia na cakacaka vakabete, 9-14. Era lesi na luve i Satoki me cakava, 15, 16. Nai vakaro vei ira na bete, 17-31.

¹ SA qai kauti au tale ko koya ki na matamata-ni-koro ni tikina tabu etaudaku sa qaradonu ki cake; a sa sogo tu.

² Sa qai kaya vei au ko Jiova; A matamata-ni-koro o qo me sogo tu ga, me kakua ni dolavi, ia mo kakua e dua na tamata me curu mai kina; ni sai Jiova, na Kalou nei Isireli, sa curu mai kina, o koya o qo ena sogo tu kina.

³ Sa nona na turaga; io na turaga, ena tiko kina ko koya me kana madrai e na mata i Jiova; ena curu mai ko koya e na sala ni curucuru ni matamata-ni-koro ko ya, e na sala talega ko ya ena curu yani kina kitautuba.

⁴ Sa qai kauti au ko koya e na sala ni matamata-ni-koro ki tokalau ki na mata ni vale tabu: ia kaʼu a vakasarava, ka, raica, sa curuoso nai ukuuku i Jiova e na vale i Jiova: kaʼu sa qai bale vakatoboicu.

⁵ A sa kaya vei au ko Jiova, Na luve ni tamata, mo vakasara na lomamu, mo raica e na matamu, ka rogoca e na daligamu na ka kecega kaʼu sa kaya vei iko e na vuku ni lesilesi kecega ni vale i Jiova, kei na kena vunau kecega; ka vakasara na lomamu vei ira era curu mai ki na vale, kei ira kece era lako tani mai na tikina tabu.

⁶ Ia mo kaya vei ira na dautalaidredre, io ki na mataqali nei Isireli, Sa vosa vakaoqo na Turaga ko Jiova; Me kena levu o qo ni nomudoui valavala vakasisila kecega, oi kemudou na mataqali nei Isireli,

⁷ ni dou a kauti ira mai na kai tani, sa tawa cilivi na yalodra, ka tawa cilivi na yagodra, me mai tiko e na noqu tikina tabu, me vakacacana o qori, io na noqu vale, ni dou a cabora tiko na qau madrai, kei na uro kei na dra, a ra sa vakacacataka na noqu veiyalayalati e na vuku ni nomudoui valavala vakasisila kecega.

⁸ Ia dou a tawa taura dina na cakacaka ni noqu ka tabu: ia dou a lesia e so me ra taura na noqu cakacaka e na noqu tikina tabu me nomudou.

⁹ Sa vosa vakaoqo na Turaga ko Jiova: Me kakua e dua na kai tani e tawa cilivi na yalona, ka tawa cilivi na yagona, me curuma na noqu vale tabu, io e dua vei ira na kai tani sa tiko vata kei ira na luve i Isireli.

¹⁰ Ia ko ira na luve i Levi sa ra lako vakayawa tani vei au, ni ra sa lako sese na Isireli, ka lako sese tani vei au me muria na nodra matakau; era na colata dina ga na nodra caka cala.

¹¹ Ia ka ra na tiko ga e na noqu tikina tabu me ia na veiqaravi, me vakatawa na matamata-ni-koro ni vale, ka qarava na vale: era na vakamatea nai soro kama kei na nodrai soro na tamata, a ra na tu e matadra me qaravi ira.

¹² E na vuku ni ra sa qaravi ira e na mata ni nodra matakau, ka vakacalai ira na mataqali nei Isireli: o koya o qo kaʼu sa laveta cake kina na ligaqu vei ira, sa kaya na Turaga ko Jiova, a ra na colata ga na nodra caka cala.

¹³ A ra na sega ni toro mai vei au, me ia na cakacaka vakabete vei au, se torova e dua na noqu ka tabu, e na tikina tabu sara: ia era na colata ga na nodra madua, kei na nodrai valavala vakasisila era sa kitaka.

¹⁴ Ia kaʼu na lesi ira me taura na cakacaka ni vale, me ra ia na kena dauveiqaravi kecega, kei na ka kece ena caka kina.

¹⁵ Ia ko ira na bete na luve i Levi, era luve i Satoki, sa ra taura tikoga na cakacaka ni noqu tikina tabu ni ra lako sese tani vei au na luve i Isireli, sai ira era na toro mai vei au me qaravi au, a ra na tu mai e mataqu me vakacabora vei au na uro kei na dra, sa kaya na Turaga ko Jiova:

¹⁶ sai ira era na curuma na noqu tikina tabu, sai ira talega era na torova na noqui kanakana, me qaravi au, a ra na taura na noqu cakacaka.

¹⁷ Ia ena yaco, ni ra sa curuma na matamata-ni-koro ki na lomanibai eloma, mei sulu laino ga me ra vakaisulu kina; me kakua ga ni ra vakaisulu e na vutika ni sipi, ni ra ia na cakacaka e na matamata-ni-koro ni lomanibai eloma, kiloma sara talega.

¹⁸ Mei sala laino ga me vakaisala kina na uludra, kai sulu laino mei sulu ni tolodra; me ra kakua ni vauca tei ira e dua na ka bunobunoa.

¹⁹ Ia ni ra curu yani ki na lomanibai kitaudaku, ki na lomanibai kitaudaku vei ira na tamata, me ra qai luvata tani na nodrai sulu era cakacaka kina, ka virikotora e na veitikina tabu, me ra vakaisulu e nai sulu tani; me ra kakua ni vakatabui ira na tamata e na nodrai sulu.

²⁰ Ia na uludra me ra kakua ni tasia, kei na drau ni uludra me kakua ni balavu; ni ra kotiva, me ra kotiva vakavinaka.

²¹ A waini talega me kakua ni gunuva e dua na bete, ni ra curu ki na lomanibai kiloma.

²² Ia e dua na alewa dawai, so dua sa biu tani, me ra kakua ni veiwatini kaya: me gonealewa ga sa ra kawa ni mataqali nei Isireli, se dua na alewa dawai ka watina e dua na bete sa mate, me ra kauta.

²³ Ia na noqu tamata me ra vakavulica ni sa dua tani na ka tabu ka dua tani na ka tawa tabu, ka dua tani na ka savasava ka dua tani na ka tawa savasava, me ra kila kina.

²⁴ Ia e na ka sa veiletitaki me ra tu ga me ia na veilewai; me ra veilewayaka me vaka na noqu lewa dodonu: a noqu vunau talega kei na noqui lesilesi e na noqu solevu kecega, me ra vakabauta; kei na noqu siga tabu me ra vakatabuya.

²⁵ Ia e dua na tamata sa mate me ra kakua ni torova me vakadukadukalitaki ira kina: e na vuku ni tamadra, se na tinadra, se na luvedra tagane, se na luvedra alewa, se na tacidra, se na ganedra sa tawa vakawati, me ra vakadukadukalitaki ira ga kina.

²⁶ Ia ni sa vakasavasavataki oti ko koya, me bogi vitu me ra wilika vua.

²⁷ Ia e na siga sa qai curu kina ko koya ki na tikina tabu, ki na lomanibai kiloma, me cakacaka e na tikina tabu, me qai cabora ko koya na nonai soro ni valavala ca, sa kaya na Turaga ko Jiova.

²⁸ Ia ena yaco o qori me nodrai votavota: sai au na nodrai votavota: ia e dua nai votavota vanua mai Isireli dou kakua ni solia vei ira: sai au ga na nodrai votavota.

²⁹ Nai madrali laukana, kei nai soro ni valavala ca, kei nai soro ni caka cala, era na kania; kei na ka kece e cabori mai Isireli ena nodra ga.

³⁰ Kei na vetana kece ni sevu kece ni ka kecega, kei nai madrali kece ni vuata kece e na nomudoui madrali kecega, me nodra ga na bete: kei na vetana kece ni nomudou madrai droka mo dou solia ga vua na bete, me vakatauca ko koya na ka e veivakalougatataki ki na nomu vale.

³¹ E dua na ka sa mate walega, se dresulaki, se sa manumanu vuka se na manumanu ni vanua, me kakua ga ni kania ko ira na bete.