Isikeli 43 - AI VOLA TABU

Sa lesu mai nai ukuuku ni Kalou ki na vale tabu, 1-6. A vu ni nona tawa tiko dei kina na Kalou na nodrai valavala ca na Isireli, 7-9, vakaroti ira ko Isikieli me veivutuni, ka muria na vunau ni vale, 10-12. A kenai vakarau, 13-17, kei na ka sa lesi me caka e nai cabocabo-ni-soro, 18-27.

¹ SA qai kauti au ko koya ki na matamata-ni-koro, io na matamata-ni-koro sa qaradonu ki cake:

² ka, raica, nai ukuuku ni Kalou nei Isireli sa lako mai na sala mai cake: ia na domona sa vaka na domo ni wai levu: ia ko vuravura sa cilavi e na nonai ukuuku.

³ A sa rairai tautauvata kei na raivotu kaʼu a raica, io me tautauvata kei na raivotu kaʼu a raica niʼu a lako mai me vakarusa na koro: ia na raivotu o qo sa tautauvata kei na raivotu kaʼu a raica mai na uciwai ko Kipari; ia kaʼu sa bale vakatoboicu.

⁴ Ia nai ukuuku i Jiova sa curuma na vale mai na sala ni matamata-ni-koro sa qaradonu ki cake.

⁵ A sa laveti au cake na Yalo, ka kauti au ki loma ni bai eloma; ka, raica, sa curuoso nai ukuuku i Jiova e na loma ni vale.

⁶ Au a qai rogoci koya sa vosa vei au mai na loma ni vale; ia na tamata keirau sa tu vata.

⁷ A sa kaya vei au ko koya, Na luve ni tamata, o qo na tikina ni noqui tikotiko, kei nai tutu ni qeteqete ni yavaqu, a ya kaʼu na tiko kina e na kedra maliwa na luve i Isireli ka tawa mudu, a ra na tawa vakacacana tale na mataqali nei Isireli na yacaqu tabu, se ko ira, se na nodra tui, e na nodra dauyalewa, se na yagodra mate na nodra tui, e na nodra veiyasana cecere.

⁸ Ni ra viritaka vata na nodrai lago kei na noqui lago, kei na nodra duru kei na noqu duru, ia na lalaga ga ka tu e na keimami maliwa, a ra sa vakacacana na yacaqu tabu e na nodrai valavala vakasisila era sa kitaka: kaʼu a vakarusai ira kina e na noqu cudru.

⁹ Ia me ra biuta tani mada na nodra dauyalewa, kei na yagodra mate na nodra tui, mo yawa vei au, kaʼu na qai tiko vata kei ira ka tawa mudu.

¹⁰ O iko na luve ni tamata, mo vakatakila na vale ki na mataqali nei Isireli mo ra maduataka na nodra caka cala: ia mo ra vakarauta na kenai vakarau.

¹¹ Ia ke ra maduataka na ka kece era sa cakava, ke sa kenai vakarau ni vale, kei na kenai valavala, kei na kenai curucuru kituba, kei na kenai curucuru kiloma, kei na kenai vakarau kecega, kei na kenai lesilesi kecega, kei na kenai vakarau kecega, kei na kena vunau kecega, ko na qai vakatakila vei ira; ka vola e matadra, me ra vakabauta taucoko na kenai vakarau, kei na kenai lesilesi kecega, ka cakava o qori.

¹² Sai koya o qo na vunau ni vale e dela ni ulu-ni-vanua, Na kenai yalayala kecega e na veitikina kecega, me sa tabu sara. Raica, sai koya o qo na vunau ni vale.

¹³ A sa vakaoqo na kenai vakarau ni cabocabo-ni-soro ni cagavi. Ia na kena caga rua sa caga rua ka dua na tikina; ia na botona me caga rua na kena cecere, ka caga rua na kena raraba, kei nai yalayala ni bati ni botona me caga dua voli tu: ia me vakaoqo na boto ni cabocabo-ni-soro.

¹⁴ Ia mai na botona e na qele ka yala ki na kena rara lailai me caga va, ka caga rua na kena raraba; ia mai na kena rara lailai ki na kena rara levu me caga walu, ka caga rua na kena raraba.

¹⁵ Ia na delana dina me caga walu; ia me vu mai tutuna ka tu kicake e va na kenai tautauri nai cabocabo-ni-soro.

¹⁶ Ia nai cabocabo-ni-soro me caga ruasagavulu ka va na kena balavu, ka ruasagavulu ka va na kena raraba, me takiveilevu na kena veiyasana e va.

¹⁷ Ia na kena rara me caga ruasagavulu ka walu na kena balavu, ka ruasagavulu ka walu na kena raraba e na kena veiyasana e va; ia na belena e volita me caga dua; ia na rara e botona me caga rua e na veiyasana; ia na kenai kabakaba me qaradonu ga ki cake.

¹⁸ A sa kaya vei au ko koya, Na luve ni tamata, sa vosa vakaoqo na Turaga ko Jiova; Me vakaoqo nai valavala ni cabocabo-ni-soro e na siga era na cakava, me vakacabora kina e delana nai soro kama, ka kureitaka ki delana na dra.

¹⁹ Ia mo solia vei ira na bete na luve i Levi era kawa i Satoki, sa ra torovi au, sa kaya na Turaga ko Jiova, me cakacaka vei au, e dua na luve ni karavau mei soro ni valavala ca.

²⁰ Ia mo kauta e so na kena dra, ka boroya kina na kenai tautauri e va, kei na muana e va ni rara, kei na kenai yalayala e na veiyasana: ia mo sa vakasavasavataka ka sorovaka.

²¹ Mo kauta talega na karavau sai soro ni valavala ca, ia ena vakama ko koya e na kena yasana dodonu ni vale mai taudaku ni vale tabu.

²² Ia e nai karua ni siga mo vakacabora e dua na luve ni koti o tawa ca mei soro ni valavala ca; a ra na vakasavasavataka nai cabocabo-ni-soro, me vaka sa ra vakasavasavataka e na karavau.

²³ Ia ni sa oti na nomu vakasavasavataka, mo qai cabora e dua na luve ni karavau sa tawa ca, kei na sipi tagane mai na qele ni sipi, e dua sa tawa ca;

²⁴ mo mani cabora e na mata i Jiova, ia ko ira na bete me ra kureitaka e so na masima ki deladrau, ka cabora vei Jiova mei soro kama.

²⁵ Me bogi vitu mo cakava tiko e na veisiga e dua na koti mei soro ni valavala ca: e dua na luve ni karavau, kei na sipi tagane mai na qele ni sipi, e dua sa tawa ca, me ra cakava talega.

²⁶ Me bogi vitu me ra sorovaka tiko nai cabocabo-ni-soro, ka vakasavasavataka, ka vakatabui ira.

²⁷ Ia ni sa oti na veibogi ko ya, ka yaco nai kawalu ni siga, me ra qai cakava tiko na bete e nai cabocabo-ni-soro na nomudoui soro kama kei na nomudoui soro ni veivinakati; ia kaʼu na vinakati kemudou, sa kaya na Turaga ko Jiova.