Isikeli 37 - AI VOLA TABU

Ni sa vakaturi cake tale na sui mamaca, me bula, 1-10, sa na vakabutobutotaki tale na nodra dinata na Isireli na vosa ni yalayala ni Kalou vei ira, 11-14. Ni sa vakauturi nai titoko e rua me dua vata ga, sa vakatakilai kina ni ra na yaco na Juta kei na Isireli, me matanitu e dua vata tale e na gauna vinaka ni Mesaia, 15-28.

¹ SA tiko vei au na liga i Jiova, a sa kauti au yani e na Yalo i Jiova, ka vakatikori au e na loma ni buca sa sinai tu e na sui,

² a sa vakalakovi au voli kina meʼu vakavolitaka: ka, raica, sa vuqa sara e na dela ni buca; ka, raica, sa mamaca sara.

³ A sa kaya vei au ko koya, Na luve ni tamata, sa na bula rawa li na sui o qo? Au a kaya, Turaga Jiova, ko sa kila ga.

⁴ A sa kaya tale vei au, Mo ia na parofisai ki na sui o qo, ka kaya kina, Oi kemudou na sui mamaca, dou rogoca na vosa i Jiova.

⁵ Sa vosa vakaoqo na Turaga ko Jiova ki na sui o qo; Raica, au na vakacuruma na cegu vei kemudou, dou na qai bula:

⁶ ia kaʼu na solia vei kemudou na ua, ka vakatubura cake na lewemudou, ka ubi kemudou e na kulina, ka solia vei kemudou na cegu, dou na qai bula; ia dou na kila ni sai au ko Jiova.

⁷ Au a qai ia na parofisai me vaka sa vakaroti vei au: ia niʼu sa ia tiko na parofisai, sa dua mai na rorogo, ka raica, sa yavavala mai, a sa dui veitorovi na sui kei na kenai sa.

⁸ Ia niʼu a vakasarava tu, raica, sa tubu cake mai na kena ua kei na lewena, a sa vakasulumi e na kulina: ia na cegu sa sega ga kina.

⁹ Sa qai kaya vei au ko koya, Mo ia na parofisai ki na cagi, mo ia na parofisai, na luve ni tamata, ka kaya ki na cagi, Sa vosa vakaoqo na Turaga ko Jiova; Mai na mata ni cagi e va mo lako maikina, na cegu, ka ceguvi ira na moku o qo, me ra bula.

¹⁰ Au a qai ia na parofisai me vaka sa vakaroti vei au, a sa curumi ira na cegu, a ra sa bula, ka tu cake mai e na yavadra, nai valu levu sara.

¹¹ Sa qai kaya vei au ko koya, Na luve ni tamata, sa suidra o qo na mataqali kecega nei Isireli: raica, era sa kaya, Sa mamaca na suida, a sa yali na ka eda a vakanananu kina: eda sa drutimudulaki koi keda.

¹² O koya o qo mo ia kina na parofisai, ka kaya vei ira, Sa vosa vakaoqo na Turaga ko Jiova; Raica, au na basia na nomudoui bulubulu, ka vakalakovi kemudou cake mai na nomudoui bulubulu, na noqu tamata, ka kauti kemudou ki na vanua ko Isireli.

¹³ Ia dou na kila ni sai au ko Jiova, niʼu sa basia na nomudoui bulubulu, ka kauti kemudou cake mai na nomudoui bulubulu, na noqu tamata,

¹⁴ niʼu sa viritu talega na Yaloqu vei kemudou, a dou sa bula, niʼu sa vakatikori kemudou talega e na nomudou vanua: dou na qai kila ni sai au ko Jiova kaʼu sa cavuta, ka cakava, sa kaya ko Jiova.

¹⁵ A SA yaco tale vei au na vosa i Jiova, ka vaka,

¹⁶ Ia ko iko, na luve ni tamata, mo taura e dua nai titoko, ka vola kina, A nodra ko Juta, kei ira na luve i Isireli era nonai tokani: mo qai taura e dua tale nai titoko, ka vola kina, A nei Josefa, na nodrai titoko ko Ifireimi, kei ira kece na mataqali nei Isireli era nonai tokani:

¹⁷ ia mo veiuturitaka mei titoko e dua bau vata ga; ena yaco kina me dua bau vata ga e na ligamu.

¹⁸ Ia ni sa vosa mai vei iko ko ira na luvedra na kai nomu, ka kaya, O na sega li ni vakatakila vei keitou se na cava na ka o qori vei iko?

¹⁹ mo qai kaya vei ira, Sa vosa vakaoqo na Turaga ko Jiova; Raica, au na taura nai titoko nei Josefa, o koya e na liga i Ifireimi, kei na veimataqali nei Isireli era nonai tokani, ka vakauturi ira vata kaya, io kei nai titoko nei Juta, ka cakavi ira mei titoko e dua bau vata ga, a ra na yaco me dua bau vata ga e na ligaqu.

²⁰ Ia nai titoko ko sa volavola kina, me na tu ga e na ligamu e matadra.

²¹ Ia mo qai kaya vei ira, Sa vosa vakaoqo na Turaga ko Jiova; Raica, au na kauti ira na luve i Isireli maivei ira na veimatanitu, era sa dui yacova, ka vakasoqoni ira mai na veiyasana, ka kauti ira ki na nodra vanua:

²² ka cakavi ira me ra matanitu e dua bau vata ga e na vanua, e na veiulu-ni-vanua nei Isireli; ia na tui e dua bau ena nodra tui kecega: a ra na sega tale ni matanitu e rua, io era na sega sara ni wase rua tale me matanitu e rua:

²³ a ra na sega ni vakadukadukalitaki ira tale e na nodra matakau, se na nodra ka vakasisila, se dua na nodra talaidredre: ia kaʼu na vakabulai ira mai na nodrai tikotiko kece, erai valavala ca kina, ka vakasavasavataki ira: a ra na yaco me noqu tamata, oi au talega kaʼu na yaco me nodra Kalou.

²⁴ Ia na noqu tamata ko Tevita, ena nodra tui ko koya; io nai vakatawa e dua bau ena nodra kecega: a noqu lewa talega era na muria, kei na noqu vunau era na vakabauta, ka cakava.

²⁵ A ra na tiko ga e na vanua kaʼu a solia ki na noqu tamata ka Jekope, a ya sa ra tiko kina na nomudou qase; a ra na tiko kina ko ira, kei na luvedra, kei na luve ni luvedra ka tawa mudu: ia ko Tevita na noqu tamata, ena nodra turaga ko koya ka tawa mudu.

²⁶ Ia kaʼu na cakava na veiyalayalati ni veivinakati kei ira; sa na veiyalayalati tawa mudu kei ira: au na vakatikori ira talega, ka vakalewevuqataki ira, ka solia na noqu vale tabu me tu ga e na kedra maliwa ka tawa mudu.

²⁷ Ena tu vata talega na noqu vale malo kei ira: io kaʼu na yaco me nodra Kalou, o ira talega era na yaco me noqu tamata.

²⁸ A ra na kila na veimatanitu ni sai au ko Jiova sa vakatabui ira na Isireli, ni sa tu ga na noqu vale tabu e na kedra maliwa ka tawa mudu.