Isikeli 31 - AI VOLA TABU

Sa tukuni rei Fero, 1, 2, nai ukuuku ni matani tu ko Asiria, 2-9, kei na kenai sau ca na viavialevu, 10-17. Ena vakarusai vakakina ko Ijipita, 18.

¹ IA e nai katinikadua ni yabaki, e nai katolu ni vula, e nai matai ni siga ni vula, sa qai yaco vei au na vosa i Jiova, ka vaka,

² Na luve ni tamata, mo vosa vei Fero na tui Ijipita, kei ira na nona lewe vuqa, O sa vakataki cei beka kina ni ko levu?

³ Raica, sai koya na kai Asiria na sitari mai Lipanoni sa vakatabana matavinaka, ka vakadrauna rugurugua, ka cecere sara: ka sa tu na vusona e loma ni taba ni kau.

⁴ E na vuku ni wai sa tubu kina me levu, e na vuku ni wai titobu sa cecere kina, ni sa kena uciwai sa drodro volita na wakana, ia na kena soniwai sa tala yani ki na kau kecega ni were.

⁵ E na vuku ni ka o qo sa cecere cake sara kina ko koya e na kau kecega ni were, a sa vakalevutaki na tabana, ka babalavu na tabana e na vuku ni sa daulevu na wai, ni talai tu yani.

⁶ E na tabana era sa cakava kina na nodra sova na manumanu ni lomalagi kecega, e ruku ni tabana talega era sa vakasucu kina na manumanu ni vanua kecega, e ruku ni yaloyalona talega era sa tiko kina na veimatanitu lelevu kecega.

⁷ A sa matavinaka ko koya e na kena levu, ni sa balavu na tabana: e na vuku ni wakana ni sa ti ki na bati ni wai levu.

⁸ A sitari, sa tawa tabonaki koya rawa e na were ni Kalou: a paini, sa tawa tautauvata kei na tabana, na ivi talega, sa tawa tautauvata kei na tabana lalai; sa sega e dua na kau e na were ni Kalou me tautauvata kaya ni sa matavinaka.

⁹ Au a cakavi koya me matavinaka ni sa vuqa na tabana: a sa vuvutaki koya kece kina na kau ni Iteni, sa tu e na were ni Kalou.

¹⁰ O koya o qo sa vosa vakaoqo kina na Turaga ko Jiova: E na vuku ni ko sa laveti iko cake mo cecere, ka sa vakatura na vusona ko koya e na maliwa ni taba ni kau lalai, ka sa laveti cake na lomana e na vuku ni sa cecere ko koya;

¹¹ o koya o qo kaʼu sa soli koya kina ki na liga i koya na nodra qaqa na veimatanitu; ni sa ia ko koya, ena ia vakaidina: e na vuku ni sa ca kaʼu sa vakasevi koya tani.

¹² A sa muduki koya laivi ko ira na kai tani, na nodra bati qaqa na veimatanitu, a ra sa biuti koya tani: ki na veiulu-ni-vanua, kei na veibuca kecega sa lutu sobu kina na tabana, a sa musuki laivi tu na tabana lalai e na bati ni uciwai kecega ni vanua; a ra sa lako sobu mai na yaloyalona ko ira kece na kai vuravura, a ra sa biuti koya.

¹³ E delana na sitari o qo sa rusa koto ena lasa kina na manumanu kecega ni lomalagi, e na tabana talega ena tiko kece kina na manumanu ni vanua:

¹⁴ me kakua kina ni laveti koya cake e na vuku ni sa cecere e dua vei ira kece na kau e na bati ni wai, se vakatura cake na vusona e na maliwa ni taba ni kau, se na kau e so me tu vakacecere, vei ira era gunuva na wai: ni ra sa soli kece yani ki na mate, me ra laʼki koto ki na ruku i vuravura, kei ira na luve ni tamata, era sa lako sobu ki nai keli.

¹⁵ Sa vosa vakaoqo na Turaga ko Jiova; E na siga ka lako sobu kina ko koya ki bulu kaʼu a cakava na somate: au a tabonaka na wai titobu me kenai loloku, ka tarova na kena ua, ka bonota na wai levu: ia kaʼu a cakavi Lipanoni me tagicaki koya, na kau kece talega ni were sa ra waicala e na vukuna.

¹⁶ Ni sa rorogo na nona bale kaʼu a vakayavalataka kina na veimatanitu, niʼu sa biuti koya sobu ki bulu kei ira era sa lako sobu ki nai keli: sa ra qai vakacegui kina mai na ruku i vuravura na kau kecega ni Iteni, na kau digitaki ni Lipanoni, ka vinaka sara, na kau kece sa gunuva na wai.

¹⁷ O ira talega o qo sa ra lako sobu kaya ki bulu vei ira era vakamatei e nai seleiwau; kei ira ka ligana, ka tiko e ruku ni yaloyalona e loma ni veimatanitu.

¹⁸ O sa qai vakataki cei beka e nai ukuuku kei na levu cake ki na kau ni Iteni me vaka na ka ko ya? ia dou na kauti sobu vata ga kei ira na kau ni Iteni ki na ruku i vuravura: dou na koto vata ga kei ira na tawa cilivi, kei ira era vakamatei e nai seleiwau. Sai koya o qo ko Fero kei ira kecega na nona lewe vuqa, sa kaya na Turaga ko Jiova.