Isikeli 29 - AI VOLA TABU

Sa cudruvi ko Fero e na vuku ni nona vakaisini ira na Isireli, 1-12. Ni sa oti na yabaki e vasagavulu ena qai vinaka tale ko Ijipita, 13-16. Sa soli ko Ijipita rei Nipukatiresari mei voli ni nona cakacaka, 17-20. Ena vakabulai tale ko ira na Isireli, 21.

¹ E NAI katini ni yabaki, e nai katini ni vula, e nai katinikarua ni siga ni vula sa yaco vei au na vosa i Jiova, ka vaka,

² Na luve ni tamata, mo vaqara na matamu vei Fero na tui Ijipita, ka parofisaitaka na kena, kei na kena ko Ijipita kecega:

³ mo vosa, ka kaya, Sa vosa vakaoqo na Turaga ko Jiova; Raica, sai au na nomu meca, Fero na tui Ijipita, na gata levu sa koto e na maliwa ni nona uciwai, ka sa kaya, Sa noqu na noqu uciwai, ia koi au kaʼu sa cakava ga me noqu.

⁴ Ia kaʼu na vakacoba na siwa ki na gusumu, ka vakabita na ika ni nomu uciwai ki na varimu, ka yarataki iko cake mai na loma ni nomu uciwai, ia na ika kecega ni nomu uciwai ena kabita na varimu;

⁵ au na biuti iko laivi tu talega ki na veikau, ko iko kei na ika kecega ni nomu uciwai: ko na lutuka na dela ni vanua; dou na sega ni vakasoqoni, se kumuni vata: ki na manumanu ni vanua kei na manumanu ni lomalagi kaʼu sa soli kemudou kina me kedra.

⁶ A ra na kila na kai Ijipita kecega ni sai au ko Jiova, e na vuku ni ra a nodrai titoko gasau na mataqali nei Isireli:

⁷ ni ra a tauri iko e na ligamu, ko sa qai ramusu, ka mavoa sara kina na tabadra: ia ni ra vakaraviti iko ko sa ramusu, ka tu vakadua sara kina na tolodra.

⁸ O koya o qo sa vosa vakaoqo kina na Turaga ko Jiova; Raica, au na vakayacora nai seleiwau vei iko, ka muduka tani vei iko na tamata kei na manumanu.

⁹ Ia na vanua ko Ijipita, ena lala ka lekutu; a ra na kila ni sai au ko Jiova: e na vuku ni sa kaya ko koya, Sa noqu na uciwai, ia koi au kaʼu sa cakava.

¹⁰ O koya o qo, raica, sai au kina sa veimecaki kei iko kei na nomu uciwai, ia kaʼu na cakava na vanua ko Ijipita me lala sara me lekutu tu ga, mai Mikitoli ka yala ki Siini nai yalayala ni Kusi.

¹¹ Ena sega ni lako voli yani kina e dua na yava ni tamata, se dua na yava ni manumanu me na lako voli yani kina, ena sega talega ni tawa ka vasagavulu na yabaki.

¹² Ia kaʼu na cakava na vanua ko Ijipita me lala sara tu e na maliwa ni veivanua lala, a nona veikoro talega ena lala tu ga e na maliwa ni veikoro rusa ka vasagavulu na yabaki: ia kaʼu na dui vakasevi ira na kai Ijipita ki na veimatanitu, ka duibiubiuti ira ki na veivanua.

¹³ Ia ka sa vosa vakaoqo na Turaga ko Jiova; Ni sa oti na yabaki e vasagavulu, kaʼu na qai vakasoqoni ira na kai Ijipita maivei ira na lewe ni veivanua era dui vakasevi kina:

¹⁴ ia kaʼu na kauti ira tale mai na kai Ijipita ka vakabobulataki, ka vakalesui ira ki na vanua ko Pacirosi, ki na vanua era a sucu kina; a ra na matanitu kaisi maikina.

¹⁵ Ena matanitu kaisi sara ki na veimatanitu; ena sega talega ni vakalevulevui koya tale ki na veimatanitu: niʼu na vakalailaitaki ira, me ra kakua ni nodra turaga tale na veimatanitu.

¹⁶ Ia ena sega tale ni nodra ka na mataqali nei Isireli me vakararavi kina, na ka me ra vakananuma kina na nodra caka cala, ni ra golevi ira: ia era na kila ni sai au na Turaga ko Jiova.

¹⁷ IA e nai karuasagavulu ka vitu ni yabaki, e nai matai ni vula, e nai matai ni siga ni vula, sa qai yaco vei au na vosa i Jiova, ka vaka,

¹⁸ Na luve ni tamata, Sai Nipukatiresari na tui Papiloni ka lavaka vei ira na nonai valu e dua na cakacaka levu na kei Teiri: sa drika kece na uludra, ka drakulu kece na tabadra; ia ka sa sega na nodrai voli, se ko koya, se na nonai valu, mai Teiri, e na vuku ni kena cakacaka sa cakava:

¹⁹ o koya o qo sa vosa vakaoqo kina na Turaga ko Jiova; Raica, au na solia vei Nipukatiresari na tui Papiloni na vanua ko Ijipita; ia ena kauta ko koya na kena lewe vuqa, ka tokitaka na kenai toki ni valu, ka kovea na kenai yau; ia o qori ena nodrai voli na nonai valu.

²⁰ Mei voli ni kena cakacaka sa cakava ko koya kaʼu sa solia kina vua na vanua ko Ijipita, e na vuku ni ra sa cakava vei au sa kaya na Turaga ko Jiova.

²¹ E na siga ko ya kaʼu na cakava me kubu na kaukamea ni mataqali nei Isireli, ia vei iko, kaʼu na solia me dalaga na gusumu e na kedra maliwa; a ra na kila ni sai au ko Jiova.