Isikeli 25 - AI VOLA TABU

Sa cudruvaki koya na Kalou, vei ira na luve i Amoni, e na vuku ni nodra yalovosalevu ki na kai Jutia, 1-7; sa cudruvi Moapi talega kei Seira, 8-11; kei Itomi, 12-14; kei ira na kai Filisitia, 15-17.

¹ A SA yaco tale vei au na vosa i Jiova, ka vaka,

² Na luve ni tamata, mo vaqara na matamu vei ira na luve i Amoni ka parofisaitaka na kedra;

³ ka kaya vei ira na luve i Amoni, Mo rogoca na vosa ni Turaga ko Jiova; Sa vosa vakaoqo na Turaga ko Jiova; E na vuku ni ko sa vakaueue ki na noqu vale tabu, ni sa vakacacani; kei na vanua nei Isireli, ni sa lala; kei na mataqali nei Juta, ni ra sa vakabobulataki;

⁴ o koya o qo, raica, kaʼu na soli iko kina vei ira na kai na tu i cake me ra taukeni iko, a ra na vakatura na nodra vale vakaturaga e tikimu, ka cakava na nodrai tikotiko e tikimu: era na kania na nomu vuata, ka gunuva na memu wai-ni-sucu.

⁵ Ia kaʼu na cakavi Rapa me bai ni kameli, kei na nodra vanua na luve i Amoni mei kotokoto ni sipi: ia dou na kila ni sai au ko Jiova.

⁶ Ni sa vosa vakaoqo na Turaga ko Jiova; E na vuku ni ko sa cobo e na ligamu, ka butubutu e na yavamu, ka reki ni ko sa beca sara e na vu ni yalomu na vanua nei Isireli;

⁷ o koya o qo, raica, au na dodoka yani kina na ligaqu vei iko, ka soli iko me nodrai toki ni valu na veimatanitu; ia kaʼu na muduki iko tani maivei ira na veimataqali, ka vakarusai iko tani mai vuravura: au na vakawabokotaki iko; ia ko na kila ni sai au ko Jiova.

⁸ Sa vosa vakaoqo na Turaga ko Jiova; E na vuku ni sa kaya ko Moapi kei Seira, Raica, sa qai vakai ira kece na veimatanitu na mataqali nei Juta,

⁹ o koya o qo, raica, au na dolava kina nai yalayala nei Moapi mai na Veikoro, mai na nona veikoro mai na nonai yalayala, nai ukuuku ni vanua, ko Peci-yisimoci, kei Peali-mioni, kei Kiriyaceimi,

¹⁰ vei ira na kai na tu i cake, kei ira na luve i Amoni, ka solia me taukeni, me ra kakua ni nanumi na luve i Amoni e na veivanua.

¹¹ Ia vei Moapi kaʼu na ia na veicudruvi, a ra na kila ni sai au ko Jiova.

¹² Sa vosa vakaoqo na Turaga ko Jiova; E na vuku ni sa ia ko Itomi na veicudruvaki ki na mataqali nei Juta, ka sa caka cala vakalevu, ka saumi koya vei ira;

¹³ o koya o qo sa vosa vakaoqo kina na Turaga ko Jiova; Au na dodoka talega na ligaqu vei Itomi, ka muduka tani maikina na tamata kei na manumanu; ia kaʼu na vakalalataka sara mai Temani ka yala ki Titani; era na bale e nai seleiwau.

¹⁴ Ia kaʼu na cudruvaki au vei Itomi e na ligadra na noqu tamata na Isireli: a ra na cakacaka mai Itomi me vaka na noqu cudru ka vaka na noqu lesa; a ra na kila na noqu veicudruvaki, sa kaya na Turaga ko Jiova.

¹⁵ Sa vosa vakaoqo na Turaga ko Jiova; E na vuku ni ra ia na veicudruvaki na kai Filisitia, a ra ia na veicudruvaki e na yalodauveibeci, me ra vakarusa e na vuku ni veicati makawa;

¹⁶ o koya o qo sa vosa vakaoqo kina na Turaga ko Jiova; Raica, au na dodoka na ligaqu vei ira na kai Filisitia, ka muduki ira tani na Kiraci, ka vakarusai ira era vo mai baravi.

¹⁷ Ia kaʼu na ia vei ira na veicudruvaki levu kei na veivunauci cudrucudru; a ra na kila ni sai au ko Jiova, niʼu sa qai cudruvaki au vei ira.