Isikeli 2 - AI VOLA TABU

Sa talai ko Isikieli, 1-5. Sa vakaukauwataki, 6, 7. Ai valavala ni ka sa lesi kina me parofisaitaka, 8-10.

¹ A SA kaya vei au ko koya, Na luve ni tamata, mo tu cake e na yavamu, kaʼu na qai vosa vei iko.

² A sa curumi au na Yalo ni sa vosa vei au ko koya, a sa vakaturi au e na yavaqu, kʼau sa qai rogoci koya sa vosa vei au.

³ A sa kaya vei au ko koya, Na luve ni tamata, au sa talai iko vei ira na luve i Isireli, ki na dua na matanitu dauvuki sa vuki tani vei au: o ira kei na nodra qase era sa talaidredre vei au, ka yacova sara na siga o qo.

⁴ Ni ra sa gone vosalevu ka yalokaukauwa. Au sa talai iko vei ira; ia mo kaya vei ira, Sa vosa vakaoqo na Turaga ko Jiova.

⁵ Ia ko ira, se ra na vakarorogo, se ra na kakua, (ni ra sa mataqali dautalaidredre,) era na kila ga ni sa dua na parofita ka tiko kei ira.

⁶ Ia ko iko, na luve ni tamata, mo kakua ni rerevaki ira; a nodra vosa talega kakua ni ko rerevaka, ia ka ra sa kau vakavotona ga ka soni era tiko kei iko, a ra sa batibasaga dou sa tiko kaya: ia na nodra vosa mo kakua ni rerevaka, a matadra talega kakua ni ko rerevaka, ia ka sa mataqali dautalaidredre ga.

⁷ Ia mo tukuna ga na noqu vosa vei ira, se ra na vakararogo, se ra na kakua: ni ra sa dautalaidredre vakalevu.

⁸ Ia ko iko, na luve ni tamata, mo rogoca na ka kaʼu sa kaya vei iko; Mo kakua ni talaidredre me vaka na mataqali dautalaidredre ko ya: mo dalaga na gusumu, ka kania na ka kaʼu sa solia vei iko.

⁹ Ia niʼu a vakasarava, raica, sa dua na liga sa talai mai vei au; ka, raica, sa tu kina e dua nai vola vivigi;

¹⁰ a sa tevuka e mataqu; a sa oti na lomana kei na dakuna e na ka sa volai: a sa volai kina na lele, kei na vutugu, kei na tagi yaso.