Isikeli 15 - AI VOLA TABU

Sa tukuni e na vosa vakatautauvata ni kau ni vaini na nodra tawa yaga kei na kedra biuti na kai Jerusalemi, 1-8.

¹ A SA yaco vei au na vosa i Jiova, ka vaka,

² Na luve ni tamata, A cava na kena yaga cake na kau ni vaini ki na kau e so, se ki na taba ni kau e so mai na veikau?

³ Me na kauti beka e dua na tikina me yaga ki na dua na cakacaka? se ra na kauta beka e dua na tikina mei vako me rube kina e dua nai yaya?

⁴ Raica, sa soli ga ki na buka waqa me kena buka; na muana ruarua sa katia na buka, ia na tolona sa yavu. Me na gumatua li e na dua na cakacaka?

⁵ Raica, ni sa taucoko, sa tawa yaga ki na dua na cakacaka: io ni sa katia na buka, ka yavu, me na qai yaga vakacava tale ki na dua na cakacaka?

⁶ O koya sa vosa vakaoqo kina na Turaga ko Jiova; Me vaka na vaini e na kau ni veikau, a ya kaʼu sa solia ki na buka waqa me kena buka, kaʼu na soli ira vaka kina na kai Jerusalemi:

⁷ ia kaʼu na vaqara na mataqu vei ira me ca; era na lako tani mai na buka e dua, ia na buka e dua tani tale ena kati ira; ia dou na kila ni sai au ko Jiova; niʼu sa vaqara na mataqu vei ira me ca.

⁸ Ia kaʼu na solia na vanua me lala sara, e na vuku ni ra sa dautalaidredre vakalevu, sa kaya na Turaga ko Jiova.