Esiteri 2 - AI VOLA TABU

Sa digitaki ko Esiteri me ranadi, 1-20. Sa kunea ko Moritikei na kena vere na tui, 21-23.

¹ NI sa oti na veika o qori, a sa malumu na cudru i Easiverosi na tui, sa qai nanumi Vasiti ko koya, kei na ka sa cakava ko koya, kei na ka sa rotaki e na vukuna.

² Sa qai kaya ko ira na nona tamata na tui era sa dauqaravi koya, Me so mada na gonealewa matavinaka me vakasaqarai me nomu na tui:

³ ka me lesia ko na tui e so na tamata e na veiqali kecega ni nona matanitu, me ra vakasoqona vata na gonealewa matavinaka kecega ki Susani na koro vakaturaga, ki na nodra vale na alewa, me vakatawai ira ko Ekei, na nona mata na tui, o koya sa dauvakatawai ira na alewa; ia me soli vei ira na nodra veika ni veivakasavasavataki:

⁴ ia me ranadi na gonealewa sa vinakata ko na tui, mei sosomi kei Vasiti. A sa vinaka na ka o qo vua na tui; a sa kitaka vakakina.

⁵ Sa tiko mai Susani na koro vakaturaga e dua na Jiu, na yacana ko Moritikei, na luve i Yairi, na luve i Simi, na luve i Kisi, na Penijamini;

⁶ o koya ka kauti tani vata mai Jerusalemi kei ira na bobula era a vakabobulataki vata kei Yikoniya na tui Juta, o koya ka kauta tani ko Nipukatinesari na tui Papiloni.

⁷ Ia ko koya o qo sa susugi Etasa, o ya ko Esiteri, na luve i tamana lailai: ni sa sega na tamana se tinana, a sa saweka ka rairai vinaka na gonealewa ko ya; ia ni sa mate na tamana kei tinana, sa susugi koya me luvena ko Moritikei.

⁸ A sa yaco, ni sa rogo na vunau ni tui kei na nona sau, a sa soqo vata ki Susani na koro vakaturaga ko ira na gonealewa e lewe vuqa, me vakatawai ira ko Ekei, sa qai kauti ko Esiteri talega ki na vale ni tui, me vakatawai koya ko Ekei, o koya sa dauvakatawai ira na alewa.

⁹ A sa vinakata na gonealewa o qori ko koya, a sa caka vinaka vua; a sa solia vakasauri vua na nona veika ni veivakasavasavataki, kei na nona ka tani e yaga vua, ka le vitu na gonealewa sa kili me soli vua mai na vale ni tui: a sa lewa me tiko ko koya kei iratou na nona gonealewa e na nodra vale e vinaka na alewa.

¹⁰ E sa sega ni vakatakila ko Esiteri na nona kawa sei ira na wekana: ni sa vakaroti koya ko Moritikei me kakua ni tukuna.

¹¹ A sa daulako e na siga kecega ko Moritikei e na mata ni bai ni nodra vale na alewa, me kila se sa vakaevei ko Esiteri, kei na ka sa yaco vua.

¹² A sa veitaravi na alewa kecega me yaco me nonai tavi me curu vua na tui ko Easiverosi, ni sa tiko ka tinikarua na vula, me vaka na nodrai valavala na alewa, (ni sa oti vakakina na nodra siga ni veivakasavasavataki, ka me ono na vula e na waiwai mura, ka ono na vula e nai saluaki boi vinaka, kei na veika me ra vakasavasavataki kina na alewa;)

¹³ era sa qai curu vakaoqo ko ira yadua na gonealewa vua na tui; a ka kece sa domona ko koya sa soli vua me lako kaya mai na nodra vale na alewa ki na vale ni tui.

¹⁴ Sa lako e na yakavi, ka lesu mai e na sabogibogi ki nai karua ni nodra vale na alewa, sa vakatawa kina ko Seesikasi, na nona mata na tui, o koya ka vakatawai ira na watina lailai: sa sega ni curu tale vua na tui ko koya, kevaka sa sega ni vinakati koya ko na tui, a sa cavuti na yacana.

¹⁵ Ia ni sa yaco na siga me curu vua na tui ko Esiteri na luve i Epieyili na tama lailai i Moritikei, o koya ka susugi koya me luvena, sa sega ni taroga e dua na ka, a ya ga o qori ka lesia ko Ekei na nona mata na tui, o koya sa dauvakatawai ira na alewa. A sa vinakati Esiteri ko ira kecega era sa raici koya.

¹⁶ A sa kau ko Esiteri vua na tui ko Easiverosi ki na vale ni tui e nai katini ni vula, a ya na vula ko Tipeci, e nai kavitu ni yabaki ni nona lewa.

¹⁷ A sa levu na loloma ni tui vei Esiteri, ka lailai vei ira kecega na alewa, a sa vinakati koya ka lomani koya vakalevu cake vei ira kecega na gonealewa; a sa tokara ki uluna nai sala vakatui, ka buli koya me ranadi mei sosomi kei Vasiti.

¹⁸ Sa qai cakava ko na tui e dua na solevu vakaidina, vei ira kecega na nona turaga kei ira na nona tamata, io na solevu kei Esiteri; a sa ia na vakacegu ki na veiqali, ka solia na veika-ni-loloma, me vaka sa daukitaka na tui.

¹⁹ Ia ni sa qai soqoni vata vakarua ko ira na gonealewa, sa qai tiko ko Moritikei e na matamata-ni-koro ni tui.

²⁰ E sa sega ni tukuna na nona kawa ko Esiteri se nona mataqali; me vaka na vosa i Moritikei vua; ni sa vakabauta na vosa i Moritikei ko Esiteri, me vaka ni ka susugi tiko vua.

²¹ E NA gauna o qori, ni sa tiko e na matamata-ni-koro ni tui ko Moritikei, erau sa cudru na lewe rua vei iratou na nona mata na tui, io koi rau vei iratou sa vakatawa na katuba, ko Pikicani kei Teresi, a rau sa vakasaqara me vakamatea na tui ko Easiverosi.

²² A sa kila ko Moritikei, a sa tukuna ko koya vei Esiteri na ranadi; a sa vakatakila vua na tui ko Esiteri nai tukutuku i Moritikei.

²³ Ia ni sa tarotarogi na ka o qo, sa kilai; a rau sa vakalili ruarua e na kau: a sa volai e matana na tui nai vola ni veika sa caka.