Esera 7 - AI VOLA TABU

Sa vakarau ko Esira me lako ki Jerusalemi, kei ira na lewe vuqa na Jiu, a sa soli vua nai vakaro i Aritasasita na tui.

¹ IA ni sa oti na veika o qo, e na gauna sa lewa kina ko Aritasasita na tui Perisia, o Esira na luve i Siraya, na luve i Asariya, na luve i Ilikiya,

² na luve i Salumi, na luve i Satoki, na luve i Eitupi,

³ na luve i Emariya, na luve i Asariya, na luve i Mirayoci,

⁴ na luve i Siraya, na luve i Usi, na luve i Puki,

⁵ na luve i Episua, na luve i Piniasi, na luve i Eliasari, na luve i Eroni na bete levu:

⁶ sa lako cake ko Esira o qo mai Papiloni; a sa vu-ni-vola totolo ko koya e na vunau i Mosese, a ya ka solia ko Jiova na nodra Kalou na Isireli: a sa solia vua ko na tui na ka kecega ka kerea ko koya, me vaka na liga i Jiova na nona Kalou sa tiko vua.

⁷ A sa lako cake ki Jerusalemi e so vei ira na luve i Isireli, ka so na bete, kei na Levi, kei na dausere, kei nai vakatawa ni katuba, kei na Necinimi, e nai kavitu ni yabaki i Aritasasita na tui.

⁸ A sa yaco ki Jerusalemi e nai kalima ni vula, o qori nai kavitu ni yabaki ni tui.

⁹ Ni sa vakatekivu ko koya me lako cake mai Papiloni e nai matai ni siga ni matai ni vula, a sa yaco ki Jerusalemi e nai matai ni siga ni kalima ni vula, me vaka na liga vinaka ni nona Kalou sa tiko vua.

¹⁰ Ni sa vakarautaka: oti na lomana ko Esira me vakasaqaqara e na vunau i Jiova, me cakava talega, ka mo vakavulica e Isireli nai lesilesi kei na lewa.

¹¹ A sa vakaoqo nai vola sa solia ko Aritasasita na tui kivei Esira na bete, na vu-ni-vola, io na vu-ni-vola e na vosa ni vunau i Jiova, kei na nona veivakaro vei ira na Isireli:

¹² O Aritasasita, na nodra tui na tui, kivei Esira na bete, na vu-ni-vola vuku e na vunau ni Kalou ni lomalagi, me nomu na vakacegu vakaidina, ia me vaka sa dauvolai.

¹³ Au sa ia nai vakaro, e na vukudra kecega na Isireli, kei ira na nodra bete, kei ira na Levi, e na noqu matanitu, me ra lako vata kei iko ki Jerusalemi ko ira kece era vinakata e lomadra vakai ira.

¹⁴ Ni sa talai iko na tui, kei na nona tamata e vitu eratou sa daubose kaya, me taroga e na vuku i Juta kei Jerusalemi, mo vaka na vunau i Jiova sa tu e ligamu;

¹⁵ a me kauta na siliva kei na koula, eratou sa vinakata me ratou vakacabora ko na tui kei iratou na nona turaga era sa daubose kaya vua na nodra Kalou na Isireli, sa tiko mai Jerusalemi na nona vale,

¹⁶ kei na siliva kei na koula kecega ko sa kunea rawa e na veiyasana kece vaka-Papiloni, kei na ka era vinakata ko ira na tamata mo ra cabora, kei ira na bete, ni sa lomadra me cabora e na vuku ni vale ni nodra Kalou, a ya mai Jerusalemi:

¹⁷ mo volia vakasauri kina e nai lavo o qo, na karavau e so, na sipi tagane e so, na lami e so, kei na nodrai madrali laukana, kei na nodrai madrali gunuvi, ka vakacabora e dela ni cabocabo-ni-soro e na vale ni nomudou Kalou, a ya mai Jerusalemi.

¹⁸ Ia na ka kecega sa vinaka vei iko kei ira na wekamu, me kitaka e na siliva kei na koula sa vo, mo kitaka o qori, me vaka na lomana na nomudou Kalou.

¹⁹ A veiyaya talega sa soli vei iko me ia kina na cakacaka e na vale ni nomu Kalou, mo solia e na matana na Kalou ni Jerusalemi.

²⁰ Kei nai kuri ni ka sa yaga ki na vale ni nomu Kalou, sa yaga mo solia, mo solia ga mai na nona vale ni yau na tui.

²¹ Ia koi au ko Aritasasita na tui, au sa vakaroti ira kecega na turaga ni yau mai tai kadua ni uciwai, me caka vakariri na ka kecega sa na kerea vei kemudou ko Esira na bete, na vu-ni-vola e na vunau ni Kalou ni lomalagi,

²² ka me yacova e dua na drau na taledi siliva, kadua na drau nai vakarau witi, ka vitu na drau ka limasagavulu na kaloni waini, ka vitu na drau ka limasagavulu na kaloni waiwai, kei na masima sa sega ni volai na kena levu.

²³ A ka kecega sa vakarota ko na Kalou ni lomalagi, me caka vakasauri e na vuku ni nona vale na Kalou ni lomalagi: ia me tubu meicavai na cudru ki na nona matanitu na tui, vei iratou talega na luvena?

²⁴ Keitou sa tukuna talega vei kemudou, e na vukudra na bete kei ira na Levi, na dausere, nai vakatawa ni katuba, na Necinimi, kei nai talatala era qarava na vale o qo ni Kalou, sa sega ni tara me taroga vei ira nai vakacavacava, se na kamunaga, se na ka e draweti kina na tui.

²⁵ Ia ko iko. Esira, me vaka na vuku ni nomu Kalou, a ya sa tu vei iko, mo lesia e so me dauveilewai lailai ka so me dauveilewai levu, me ra lewai ira kecega na tamata mai tai kadua ni uciwai, o ira kece era kila na vunau ni nomu Kalou; ka vakavulici ira era sega ni kila.

²⁶ Ia ko ira kece sa bese ni kitaka na vunau ni nomu Kalou, kei na vunau ni tui, me cudruvi vakasauri ko koya, se me mate, se me vakasevi tani, se me kovei na nona yau, se me kauti ki na vale ni veivesu.

²⁷ Me vakavinavinakataki ko Jiova na Kalou ni noda qase, o koya sa viria o qo ki na lomana na tui, me vakaiukuukutaka na vale i Jiova, a ya mai Jerusalemi:

²⁸ ka sa vakayacori au meʼu lomani e matadra na tui, kei na nona turaga era daubose kaya, kei ira kecega na nona turaga qaqa na tui. Ia kaʼu a vakaukauwataki ni sa tiko vei au na liga i Jiova na noqu Kalou, kaʼu a qai vakasoqona vata na tamata era sa liu maivei ira na Isireli, me ra lako cake vata kei au.