Cakacaka 4 - AI VOLA TABU

Erau sa biu ko Petero kei Joni ki na vale ni veivesu, 1-4. E na sabogibogi erau sa lewai, a sa tukuni Jisu ko Petero, 5-22. Era sa masu na lewe ni soro kecega, a ra sa vakasinaiti e na Yalo Tabu, a sa kaukauwa na vunau; a ra sa veilomani sara na tamata lotu, 23-37.

¹ IA ni rau sa vosa tiko vei ira na tamata, sa cici mai vei rau ko ira na bete, kei na turaga ni vale ni soro, kei ira nai tokani i Satoki,

² ni ra sa cudru ni rau sa vakavulici ira na tamata, ka vunautaka na tu cake tale mai na mate e na vuku i Jisu.

³ A ra sa tauri rau, ka biuta ki na vale ni veivesu me sabogibogi mada mai; ni sa qai yakavi.

⁴ Ia ka lewe vuqa era sa rogoca na vosa, era sa vakabauta; ia na nodrai wiliwili na tagane sa lima beka na udolu.

⁵ Ia e na sabogibogi, era sa soqoni vata mai Jerusalemi ko ira na nodra turaga, kei ira na qase, kei ira na vu-ni-vola,

⁶ kei Anasi na bete levu, kei Kaiafa, kei Joni, kei Alekisadro, kei ira kecega na mataqali ni bete levu.

⁷ Ia ni ra sa vakaturi rau e na kedra maliwa, era sa taroga, A kaukauwa cava, se na yaca i cei, drau sa cakava kina na ka o qo?

⁸ Sa qai sinai ko Petero e na Yalo Tabu, a sa kaya vei ira, Oi kemudou na nodra turaga na tamata, kei na nodra qase na Isireli,

⁹ kevaka keirau sa tarogi e na siga edaidai e na cakacaka vinaka vua na tamata lokiloki, se na vuku ni cava sa qai bula kina;

¹⁰ mo dou kila kecega, kei ira kecega na Isireli, ni sa yaca i Jisu Karisito na kai Nasareci, o koya dou a vakota ki na kauveilatai, o koya sa vakatura cake tale ko na Kalou mai na mate, io, e na vukuna ga sa tu kina eke ko koya o qo e na matamudou ka sa bula vinaka.

¹¹ O qo na vatu dou a cata sara koi kemudou na matai ni vale, ko ya sa yaco mei teteki e na tutu ni vale.

¹² A sa sega na bula e na vukuna e dua tani: ni sa sega sara e dua tale na yaca e ruku i lomalagi sa soli kivei ira na tamata, me da bula rawa mai kina.

¹³ Ia ni ra sa raica na nodrau doudou ko Petero kei Joni, ni ra sa kila talega erau sa tawa vuku so, se rau turaga, era sa kidacala kina; a ra sa qai vakasami rau, ni ratou a dautiko vata kei Jisu.

¹⁴ Ia ni ra sa raica na tamata ka vakabulai mai, ni sa wavu tu vata kei rau, era sa sega ni vakatitiqataka rawa.

¹⁵ Ia ni ra sa vakatalai rau tani me rau lako tani e na vale ni veibose, era sa qai bose vakai ira,

¹⁶ ka kaya, A cava me da kitaka vei rau na tamata o qo? ni sa kila ko ira kecega sa tiko e Jerusalemi, ni sa dua na caka-mana rogo erau sa cakava; ia eda sa sega ni vakatitiqataka rawa.

¹⁷ Ia de tukuni vakalevu vei ira na tamata, me da kaya ga, me rau cudruvi sara kevaka erau vakavuvuli tale vua e dua na tamata e na yaca o qo.

¹⁸ A ra sa kacivi rau, a ra sa vakarota vei rau me rau kakua sara ni vosai se vakavuvuli e na yaca i Jisu.

¹⁹ Sa qai vosa ko Petero kei Joni, a rau sa kaya vei ira, E dodonu se segai e na mata ni Kalou me keirau vakarorogo vei kemudou ka kakua vua na Kalou, mo dou lewa ga mai:

²⁰ ni sa dredre vei keirau me kakua ni tukuna na veika keirau a raica ka rogoca.

²¹ Ia ni ra sai sega ni kunea e dua na ka me rau cudruvi kina, era sai vosa vakacudrucudruya tale vei rau, a ra sai qai laivi rau me rau lako, e im vukudra na tamata: ni ra sa vakarokorokotaka na Kalou ko ira kecega e na vuku ni ka sa qai caka.

²² Ni sa vasagavulu ka mani vakacaca na nona yabaki, o koya na tamata sa caka vua na caka-mana o qo ka bula kina.

²³ Ia ni rau sa vakatalai tani, erau sai lako vei ira na nodraui tokani, ka tukuna na ka kecega era a vosataka vei rau ko ira na bete levu kei ira na qase.

²⁴ Ia ni ra sa rogoca, era sa lomavata ka tabalaka cake na domodra vua na Kalou, ka kaya, Turaga, o iko na Kalou, o a buli lomalagi, kei vuravura, kei na waitui, kei na ka kecega sa tu kina:

²⁵ e na gusu i Tavita na nomu tamata ko a kaya, Sa daucudru na veimatanitu e na vuku ni cava, ka sa vakananuma na ka walega ko ira na lewe ni veivanua?

²⁶ era sa tuvai valu na tui kei vuravura, a ra sa soqoni vata ko ira na turaga me ra veivala kei Jiova, kei na nona Karisito.

²⁷ Ni sa dina era sa soqoni vata me ra veivala kaya na Luvemu yalosavasava ko Jisu, o koya ko a lumuta, (oi rau ko Eroti kei Ponitio Pilato, kei ira na veimatanitu, kei ira na veiyavusa ni Isireli,)

²⁸ me ra kitaka kecega na ka ko a lesia eliu me caka, me vaka na nomu kaukauwa kei na nomui naki.

²⁹ Ia o qo, Turaga, mo raica na nodra vosa vakacudrucudruya; ka solia kivei ira na nomui talatala, me ra doudou vakalevu ni ra tukuna na nomu vosa,

³⁰ ni ko sa dodoka tiko na ligamu me ia na veivakabulai, me caka talega nai vakatakilakila e so kei na ka e veivakidacalataki, e na yaca ni Luvemu yalosavasava ko Jisu.

³¹ Ia ni ra sa masu oti, sa vakayavalati na vale era sa soqoni vata kina; a ra sa dui vakasinaiti kecega e na Yalo Tabu, a ra sa doudou kina ni ra sa tukuna na vosa ni Kalou.

³² Ia ko ira na lewe vuqa era sai vakabauta, era sa lomavata ka yalovata; a sa sega e dua e kaya me nona duaduaga na ka sai tu vua; a ra sa taukena vata na nonai yau yadua.

³³ A sa levu na nodratou kaukauwa nai apositolo, ni ratou sa tukuna ni sai tu cake tale mai na Turaga ko Jisu: a sa vinakati vakalevu ko ira kecega.

³⁴ Ni sa sega e dua vei ira sa dravudravua; o ira kecega sa taukena na vanua se na veivale, era sa volitaka, a ra sai kauta nai voli ni ka era sai volitaka,

³⁵ a ra sa virikotora ki na yavadratou nai apositolo: a sai vota yadua vei ira kecega me vaka na nodra dui dravudravua.

³⁶ O Josese talega, o koya eratou sa vaka-toka ko iratou nai apositolo me Parinapa, (ai kenai balebale, A gone ni vakacegu,) a luve i Levi, a kai Kipiro,

³⁷ o koya sa taukena e dua na tiki-ni-vanua, sa volitaka, a sa kauta na kenai voli, ka virikotora ki na yavadratou nai apositolo.