Aisea 65 - AI VOLA TABU

Sa ra kacivi me lotu na lewe ni veivanua, a sa biu laivi na matanitu vaka-Jutia e na vuku ni nodrai valavala ca, 1-7. Sa ra vakavoci e so ni ra vakabauta, 8-10. Sa ca sara ko ira na vakatitiqa, sa vinaka sara ko ira na vakabauta, 11-16. A gauna ni Mesaia sa vaka ni sa buli na lomalagi vou kei na vuravura vou, ena tubu mai kina na ka vinaka sara, 17-25.

¹ SA torovi au rawa ko ira sa sega ni tarogi au: sa kunei au rawa ko ira sa sega ni vakasaqarai au: au a kaya, Oi au o qo, oi au o qo, ki na matanitu sa sega ni vakatokai e na yacaqu.

² Au a dodoka na ligaqu e na veisiga ki na dua na mataqali dautalaidredre, era lakova na sala sa tawa vinaka, ka muria na ka era dui nanuma;

³ na mataqali sa vakacudrui au ki mataqu e na veisiga; era cabora nai soro e na veiwere, ka vakacaudreva nai madrali boi vinaka e na vatu-buli:

⁴ era tiko ga e nai bulubulu, ka moce e na veiqara; era kania na lewe ni vuaka, ia na waibuta e vakasisilataki sa tu e na medra bilo;

⁵ a ra kaya, Mo tiko tani ko iko; kakua ni ko sudra mai vei au; niʼu sa yalosavasava vei kedaru. O ira o qo era sa kubou ki ucuqu, na buka sa waqa tu e na veisiga.

⁶ Raica, sa volai tu e mataqu; kaʼu na sega ni cegu, kaʼu na sauma ki na lomaseredra

⁷ na nomudou caka cala vata kei na nodra caka cala na tamamudou, sa kaya ko Jiova, era sa vakacaudreva nai madrali boi vinaka e na veiulu-ni-vanua, e na veiulu-ni-koro talega era sa vosavakacacataki au: ia kaʼu na vakarauta na nodra cakacaka eliu ki na lomaseredra.

⁸ Sa vosa vakaoqo ko Jiova; Me vaka ni sa kune na waini vou e nai yawa vaini, ka sa kaya e dua, Mo kakua ni vakacataka, ni sa tu kina na ka e veivakalougatataki; kaʼu na kitaka vakakina e na vukudra na noqu tamata, meʼu kakua ni vakacataki ira vakaoti:

⁹ ia kaʼu na kauta maivei Jekope e dua na kawa, ka maivei Juta e dua nai taukei ni noqu ulu-ni-vanua; ia ko ira kaʼu sa digitaka era na taukena, o ira talega na noqu tamata era na tiko maikina.

¹⁰ Ia ko Saroni ena yaco me bai ni sipi, kei na buca i Akori mei kotokoto ni karavau, me nodra na noqu tamata era sa vakasaqarai au.

¹¹ Ia koi kemudou, sa biuti Jiova, ka guilecava na noqu ulu-ni-vanua tabu, ka drauna nai kanakana kei Kata, ka tu yaqona nai sevu mei Meni,

¹² kau na lesi kemudou ki nai seleiwau, ia koi kemudou kece dou na cuva ga me vakamatei: e na vuku niʼu sa kaci, dou sa sega ni rogo mai; niʼu sa vosa, dou sa sega ni rogoca; ia dou a cakava na ka sa ca e mataqu; na ka talega kaʼu sa sega ni vinakata, dou sa digitaka.

¹³ O koya o qo sa vosa vakaoqo kina na Turaga ko Jiova, Raica, o ira na noqu tamata era na kana, ia dou na viakana; raica, o ira na noqu tamata era na gunu, ia dou na viagunu; raica, o ira na noqu tamata era na rereki, ia dou na madua;

¹⁴ raica, o ira na noqu tamata era na kaila ni sa marau na lomadra, ia dou na tagi ni sa rarawa na lomamudou; ni sa mavoa talega na yalomudou, dou na qoqolou.

¹⁵ Ia dou na vakalaiva na yacamudou me ka e veivakarusai vei ira kaʼu sa digitaka, ia na Turaga ko Jiova ena vakamatei iko, ka vakatokai ira na nona tamata e na dua na yaca tani:

¹⁶ ia ko koya sa vosavakalougatataki koya e vuravura me vosavakalougatataki koya e na yaca ga ni Kalou dina; o koya talega sa vosavavakini e vuravura me vosavavakini e na yaca ga ni Kalou dina; e na vuku ni sa guilecavi na ka rarawa eliu, ni sa tabonaki talega ki na mataqu.

¹⁷ Raica, kaʼu sa cakava na lomalagi vou kei na vuravura vou; ia ena sega ni nanumi na ka eliu, ena sega ni cabe tale ki na lomamudou.

¹⁸ Ia dou reki ka marau ka tawa mudu e na ka kaʼu sa cakava: raica, kaʼu sa cakavi Jerusalemi me ka ni marau, kei na lewena me ka ni reki.

¹⁹ Ia kaʼu na marautaki Jerusalemi, ka rekitaki ira na noqu tamata; ena sega ni rogoci tale e lomana na domo ni tagi, se na domo ni qoqolou.

²⁰ Ena sega ni kauti tani tale maikea e dua na gone sa vica ga na siga ni nona bula, se dua na qase sa sega ni taucoko sara na siga ni nona bula: ni na sa gone ga ena sa mate ka dua na drau na nona yabaki; ia na tamatai valavala ca sa dua na drau na nona yabaki ena ka veivakarusai.

²¹ A ra na tara vale, ka tikora; era na tea na veivainivaini, ka kania na vuana;

²² era na sega ni tara, ka tikora e dua tani, era na sega ni tea, ka kania e dua tani: ni na vaka na siga ni kau na nodra siga na noqu tamata, ia na cakacaka ni ligadra ena madra ka ra kaukauwa tikoga kaʼu sa digitaka.

²³ Era na sega ni oca walega, so vakasucu me taqaya; ni ra sa nodra kawa era sa vakalougatataki maivei Jiova, o ira kei na luvedra.

²⁴ Ia ena yaco ni sa bera na nodra kaci mai, kaʼu na rogo yani; ni ra sa vosa tiko, kaʼu na rogoca.

²⁵ A wolifa kei na lami, erau na kana vata; a laioni, me vaka na karavau, erau na kania na co ni sila; ia na gata, na kuvu-ni-soso ena sa kena kakana. Era na sega ni ia na veivakacacani se na veivakarusai e na noqu ulu-ni-vanua tabu kecega, sa kaya ko Jiova.